Miguel Santalices repetirá como presidente do Parlamento da Galiza durante a XII Lexislatura que se estreará esta segunda feira no Pazo do Hórreo e estará acompañado na Mesa da Cámara pola deputada popular Elena Candia, como vicepresidenta primeira, e pola até o de agora conselleira de Infraestruturas e Mobilidade, Ethel Vázquez, como secretaria primeira.
Esa é a proposta que o PP deu a coñecer este domingo e que está previsto que se corrobore coa maioría absoluta que os populares obtiveron nas eleccións galegas do 18 de febreiro.
Para a elección, faranse tres votacións en urna separadas: unha para elixir á persoa que ocupará a Presidencia, outra para escoller á Vicepresidencia primeira e á Vicepresidencia segunda, e unha terceira para designar ás persoas que ocuparán a Secretaría e a Vicesecretaría.
Miguel Santalices, que é deputado desde 1997, xa ostentou a Presidencia do Parlamento da Galiza nas dúas últimas lexislaturas (X e XI) e tamén no último tramo da IX, desde o 26 de xaneiro de 2016.
Pola súa parte, Elena Candia, xa foi vicepresidenta primeira do Parlamento galego na segunda metade da anterior lexislatura, desde maio de 2022. Até ese momento exercía como vicevoceira do Grupo Parlamentario Popular.
Así mesmo, o Partido Popular proporá Ethel Vázquez, actual conselleira de Infraestruturas e Mobilidade en funcións, como secretaria primeira da Mesa do Parlamento da Galiza durante a XII Lexislatura.
