O Goberno español vén de solicitar a retirada da orde do día do Pleno do Congreso a reforma a da Lei do Solo ante a falta de apoios parlamentarios e para que a norma "non se vexa afectada pola situación electoral", segundo trasladaron a primeira hora desta cuarta feira fontes do Ministerio de Vivenda e Axenda Urbana.
A decisión ten lugar dous días despois de que a Cámara Baixa tombase a lei do PSOE para prohibir o proxenetismo, que tivo o voto en contra de PP pero tamén de socios de goberno como Sumar, ERC, Junts, EH Bildu e PNV. Só votaron a favor a bancada socialista e o BNG, mentres Podemos e Vox optaron pola abstención.
Nesta ocasión, o partido minoritario do Goberno, Sumar, xa anunciara a súa intención de rexeitar a Lei do Solo, mentres que os de Alberto Núñez Feixoo dixeron que non axudarían ao PSOE "cando lle faltasen os seus aliados independentistas". Por este motivo, e con tal de evitar unha segunda derrota no Parlamento en menos de 48 horas, o Goberno decidiu retirar a norma, que se tramitaba esta quinta feira.
O Ministerio dirixido por Isabel Rodríguez cargou contra o PP pola súa "falta de sentido de Estado" e por primar " os seus intereses electoralistas" a unha demanda de concellos e comunidades autónomas "para favorecer o desenvolvemento de vivenda pública".
Ademais, defendeu que o proxecto de lei foi tramitado "coa máxima celeridade para dar resposta á necesidade" da promoción e ampliación do parque público de vivenda, ademais de servir para "garantir a seguridade xurídica dos desenvolvementos urbanísticos" e ofrecer "máis garantías de protección ambiental" cumprindo cos obxectivos da Axenda 2030.
Finalmente, despois de dar a coñecer que esta quinta feira non se tramitará a Lei do Solo, a ministra de Vivenda ofrecerá declaracións aos medios no Congreso para explicar os motivos da retirada da norma.
