O BNG ve "imprescindíbel" que Sánchez compareza "de inmediato" e o PSdeG defende que "se están tomando medidas"
A portavoz nacional do BNG, Ana Pontón, asegurou esta segunda feira que lle parece "imprescindíbel" que o presidente do Goberno español, Pedro Sánchez, compareza "de inmediato" para explicar unha situación que cualificou de "moi grave" tras coñecerse a investigación por presunta corrupción ao ex secretario de Organización do PSOE Santos Cerdán, mentres que o líder da formación socialista na Galiza, José Ramón Gómez Besteiro, defendeu que "se están tomando medidas".
A preguntas dos medios, Pontón volveu pedir "tolerancia cero" coa corrupción e reivindicou que o BNG mantén "unha folla de ruta moi clara": "Levamos 40 anos neste país xestionando recursos públicos e nestes 40 anos non hai nin unha soa condena. Estamos aquí para traballar pola xente, polo ben común e para demostrar que hai outra forma de facer política".
Así mesmo, insistiu en que a "liña vermella" do BNG é que non queren corrupción "en ningunha institución". Por iso, sinalou que lles parece "imprescindíbel" que Sánchez "compareza de inmediato" ante unha situación "moi grave" que "merece explicacións" e "medidas rotundas" para evitar situacións deste tipo.
Tamén ve necesarias medidas no modo no que se adxudican contratos públicos para evitar que "empresas que corrompen poidan contratar coa Administración pública". "Sería un paso adiante moi importante que tamén poría coto a todas estas prácticas corruptas, que atravesan o bipartidismo, atravesan a propia monarquía, e o que nos preocupa é unha corrupción sistémica", explicou. "O BNG non ten absolutamente nada que ver con iso", manifestou.
"Están a tomarse medidas", di Gómez Besteiro
Pola súa parte, o secretario xeral do PSdeG, José Ramón Gómez Besteiro, cuestionado sobre se prevén "medidas máis contundentes", defendeu que "se están tomando medidas". Neste sentido, recoñeceu que os "indicios máis que serios sobre corrupción por parte de quen foi secretario de Organización" producen na formación socialista "unha enorme dor" e unha "crise de confianza grave".
Con todo, volveu defender a forma de afrontalo do partido, "con determinación" e "apartando aos que cometen eses actos deshonestos, sen prexulgar a presunción de inocencia". "Mais inmediatamente apártase, extírpase da nosa organización e sométese a exposición pública e xudicial", destacou.
"Non todos reaccionan así", continuou para sinalar ao PP que, na súa opinión, "non se manifestou ante casos de corrupción como un partido que fixese iso, senón todo o contrario". Tamén sinalou Vox, "que acaba de ser sancionado con 800.000 euros polo Tribunal de Contas por irregularidades no seu financiamento". "A suma de dous partidos corruptos non dá un Goberno limpo", aseverou Besteiro.
Desta maneira, o líder socialista insistiu en que o PSOE reaccionou "como se tiña que reaccionar", tamén ensinando "o sentimento de dor" do partido, o que, apuntou, "non impide seguir o camiño e marcar que é mellor para os intereses dos españois e dos galegos".
