martes 03/08/21

O BNG recolle nun mes máis de 23.600 sinaturas contra a suba da luz e a favor dunha tarifa eléctrica galega

Ana Pontón denuncia unha normativa "a favor do lobby eléctrico" na fixación de prezos.

BNG sinaturas

O BNG rexistrou esta cuarta feira na Xunta un total de 23.610 sinaturas en contra da suba da luz e a favor da posta en marcha dunha tarifa eléctrica galega. Perto de 24.000 firmas que foron recollidas en apenas un mes.

"Facemos a entrega das sinaturas contra a estafa da factura da luz, que é máis estafa que nunca, que está a afogar familias, traballadores e traballadoras autónomas e pequenas e medianas empresas en plena crise", manifestou a portavoz nacionalista, Ana Pontón, en declaracións aos medios ante a sede do Goberno galego en Santiago de Compostela.

Na súa intervención, Pontón censurou que un país como Galiza, "rico en electricidade, leve décadas pagando os custos sociais e ambientais" mais "sen obter ningún beneficio".

Así mesmo, argumentou que a "imparábel escalada" do prezo da luz no Estado español, "a máis cara de Europa e a máis cara da historia", "só se explica por un sistema normativo pensado a favor do lobby eléctrico e en contra da maioría social", en particular un sistema de fixación de prezos que deriva no que se coñece como "beneficios caídos do ceo", polo que o custo final márcao a enerxía máis cara aínda que sexa minoritaria na cesta da poxa.

É coma se imos a un restaurante, pedimos un ovo frito e pagámolo a prezo de bogavante, pareceríanos un disparate mais iso é o que pasa agora porque son as eléctricas as que definen as leis pensadas para maximizar os seus beneficios á conta de espremer á cidadanía, sinala Pontón

"É coma se imos a un restaurante, pedimos un ovo frito e pagámolo a prezo de bogavante, pareceríanos un disparate mais iso é o que pasa agora porque son as eléctricas as que definen as leis pensadas para maximizar os seus beneficios á conta de espremer á cidadanía", criticou Pontón, que ve na rápida recollida de firma "unha mostra de que os galegos e as galegas están fartas desta estafa e queren que se plante cara ás eléctricas".

É por iso, considera, que suman o seu apoio a unha campaña para reclamar "a tarifa eléctrica galega e a intervención pública no sector da enerxía para que sexa xestionada desde o público e a favor da maioría social".

A líder nacionalista lembrou que países da contorna como Alemaña e Francia teñen tarifas diferenciadas nas que as zonas produtoras pagan menos. "Por pura lóxica, posto que é máis barato dar subministración eléctrica alí onde se produce; e tamén por xustiza, para compensar polos custos ambientais e sociais".

"Por que neses países si e aquí non?, preguntouse para considerar que o motivo é que o "lobby eléctrico" ten cadeira "tanto no Consello de Ministras como no Consello da Xunta". "Vemos como nos consellos de administración de Endesa, Naturgy ou Iberdrola sentan expresidentes, exministros e ministras do PP e do PSOE", denunciou en referencia ás portas xiratorias. "E se lle pagan un pastón non é polo seu coñecemento do sector eléctrico, senón para influír nos gobernos", concluíu.

comentarios