Consello Nacional do BNG

Ana Pontón: "Fronte a un PP que representa o pasado e un proxecto esgotado, o BNG representa o porvir e un país novo"

A portavoz nacional do Bloque interveu este sábado no Consello Nacional coa vista posta nas eleccións municipais, unha cita á que a súa formación chega, asegurou, co "aval" da experiencia dos seus gobernos municipais, que "marcan a diferenza" e son "referentes de políticas e de bo facer".
Intervención de Ana Pontón no Consello Nacional do BNG, este sábado. (Foto: Nós Diario)
photo_camera Intervención de Ana Pontón no Consello Nacional do BNG, este sábado. (Foto: Nós Diario)

A portavoz nacional do BNG, Ana Pontón, asegurou este sábado que o proxecto do Bloque representa "o entusiasmo, a vitalidade e o optimismo que tanto necesitan a Galiza e a sociedade galega". "Somos capaces de pór en marcha as solucións máis vangardistas e avanzadas, adaptándoas á nosa realidade. E así vemos como os concellos onde gobernamos son o mellor exemplo de como construír unha realidade, pobos e cidades con futuro", reivindicou a nacionalista, na súa intervención no Consello Nacional do BNG decorrido esta mañá.

Pontón apuntou que estamos ante unhas eleccións "moi importantes" porque, alén de definir os gobernos dos concellos, "teñen unha transcendencia que vai máis aló do local, porque son realmente o comezo dun ciclo decisivo para o futuro do país", con catro procesos electorais consecutivos nun ano, "as municipais, as xerais, as europeas e as galegas".

"Estamos nun momento político especial que supón grande oportunidade para un BNG que está máis forte, máis unido e máis ilusionado que nunca, con obxectivos realistas e ambiciosos", manifestou. Na mesma liña, asegurou que se "alegra" do que está a observar nesta precampaña, na que ve "moita participación, mocidade, colectivos que se unen ao BNG, ilusión, esperanza e emoción nos ollos da xente, alegría e futuro".

"O BNG está nun gran momento, eu diría que no mellor da súa historia. Fronte a un Partido Popular que representa o pasado, un proxecto esgotado sen ideas e sen impulso, o BNG representa o porvir, un país novo, con confianza, esperanza e con orgullo de país", celebrou.

O "aval" dos concellos

Aliás, a portavoz do Bloque afirmou que están "preparados para gobernar" e, para facelo, subliñou que contan "cos avais" dos seus gobernos municipais, que son "unha marca de calidade, con garantía de participación, de democratización, de identidade, de equidade, de dinamismo e de futuro"

"Gobernos fiábeis con ideas claras, gobernos valentes que rompen privilexios e acaban con tratos de favor, que poñen as persoas no centro, que xestionan ben cada euro, que defenden os nosos sinais de identidade, que coidan o medio ambiente, que xeran confianza, estima e orgullo", reivindicou.

Neste senso, sinalou que cando se pensa en concellos "referentes" pénsase "en concellos do BNG", que "marcan a diferenza" e son "referentes de políticas e de bo facer". Por iso, Pontón insistiu en que as eleccións municipais son "moi importantes" para a súa formación e "teñen que supor un gran salto cara adiante" para o Bloque, "multiplicando a representación e ampliando os gobernos municipais".

Ademais, mostrouse "moi orgullosa" da organización nacionalista polo "compromiso da militancia e de todos os simpatizantes", así como do traballo de "cada unha das persoas que traballan con xenerosidade, con paixón e con ilusión, pondo por diante o ben común e o interese colectivo".

Na súa intervención, Pontón tamén avanzou que o BNG participará na mobilización prevista para este domingo en Santiago "contra o espolio enerxético". "Imos estar á beira da xente do rural e do mar para plantarlle cara ás eléctricas e a un PP, con Rueda á cabeza, que actúan como o seu axente comercial", expuxo.

Comentarios