O delegado do Goberno español na Galiza, José Ramón Gómez Besteiro, deixou esta terza feira á tarde á marxe o carácter máis institucional para, como valor do PSdeG, recuperar músculo electoral e tomar parte en tres actos para as eleccións municipais do 28-M.
Primeiro, en Fene, comarca de Ferrol, onde Besteiro compareceu co candidato á Alcaldía deste concello de 13.000 habitantes, Joaquín Ayala. Iso foi a primeira hora da tarde. A media tarde, Besteiro estaba xa en Neda, na mesma comarca, onde realizou un paseo xunto ao alcalde socialista da localidade, Ángel Alvariño.
E, cara á noitiña, Gómez Besteiro puxo o ramo en Oza-Cesuras, onde interveu na presentación da candidatura socialista neste Concello da comarca das Mariñas, unha lista liderada por Pilar Pedreira.
Pola mañá, e alí si como delegado do Goberno español, Besteiro visitou Ames, na comarca de Compostela, onde abordou co alcalde, Blas García, a marcha de diversos proxectos.
