110 tablets compradas para a coordinación de emerxencias con Portugal e Castela levan 15 meses almacenadas e sen usar

A deputada do PSdeG Paloma Castro critica a “deficiente xestión” de emerxencias, que ten os dispositivos parados na sede da Axega dende hai máis dun ano.

Terreo queimado polo grande incendio de comezos de mes en Muíños, na Baixa Limia. (Foto: Rosa Veiga / Europa Press)
photo_camera Terreo queimado en Muíños, na Baixa Limia. (Foto: Rosa Veiga / Europa Press)

A portavoz de Interior do grupo socialista no Parlamento galego, Paloma Castro, reclamou esta quinta feira á Dirección Xeral de Emerxencias que faga entrega “canto antes” das 110 tablets adquiridas hai agora un ano e 3 meses para a coordinación con Portugal e Castela e León.

Castro preguntou en Comisión polo destino destes dispositivos, e o director xeral confirmou que estaban almacenadas na sede da Axega á espera de ser actualizadas.

A deputada salientou salientou que un ano e 3 meses é “tempo máis que de abondo” para a actualización técnica das aplicacións, a mais cando en Portugal e Castela e León as levan utilizando sobre o terreo dende hai tempo.

Estes dispositivos foron adquiridos dentro do programa Ariem interrexional de colaboración nas emerxencias, e que supuxeron un custe de 80.000 euros co cofinanciamento nun 75% do Fondo Europeo de Desenvolvemento Rexional.

Criticou a xestión “nada áxil” dos recursos de emerxencias, sinaladamente no caso dun instrumento específico para a colaboración sobre o terreo, que estivo aparcado nun almacén nun ano “negro con incendios transfronteirizos terribles”.

Lembrou o incendio iniciado en agosto nas localidades portuguesas de Monçâo e Valença que se estendeu a Tui e Salvaterra, ou hai uns dúas o que se estendeu dende o país veciño ao Parque Natural Baixa Limia – Serra do Xurés.

Paloma Castro explicou que esta aplicación resulta “necesaria” e “melloraría o tempo de resposta”, axudando na coordinación co país veciño e supostamente optimizando a resposta ante sucesos coma os incendios que enumerou hoxe, permitindo por exemplo que o persoal sobre o terreo dispoña datos en tempo real sobre a evolución dunha emerxencia.

Comentarios