A deputada parlamentar do BNG, Carme Adán alertou de que o 20% das persoas desempregadas no Estado español son galeg@s. Adán, advertiu ao presidente da Xunta de Galiza, Alberto Núñez Feijóo, que Galiza se atopa nunha "situación límite", despois de coñecer os datos do paro proporcionados esta sexta pola EPA.
A nacionalista, exixiu a Núñez Feijóo que asuma as súas responsibilidades e deixe de esconderse detrás de cortinas de fume, "como a redución de democracia", apelando á supresión de deputad@s no Parlamento de Galiza. Carme Adán, lembrou as verbas do presidente, cando en 2009 aseguraba que acabaría co paro en 45 días e "nestes momentos Galiza está á cabeza do Estado en destrucción de emprego", aseverou Adán.A deputada do BNG lembrou que neste trimestre o diferencial a respecto da media estatal é dun 25,64% máis que o pasado ano nestas datas.
As familias verán incrementado o prezo do material escolar do 4 ao 21%
Carme Adán lembrou a suba do IVE aprobada polo goberno español na última vaga de reformas e asegurou que o vindeiro curso académico exixirá un "esforzo inasumíbel". Neste senso, o grupo parlamentar do BNG vén de presentar unha proposición non de lei para que o goberno da Xunta de Galiza manteña o tipo impositivo no 4%. Así mesmo, a deputada nacionalista dixo que agarda coñecer a postura do conselleiro de Educación sobre o anteproxecto de lei “regresivo que prepara o Ministerio, que recupera as reválidas como medida contra o fracaso escolar".
A fraude electoral promovida por Feijóo supón merma da democracia
A respecto do anuncio de Núñez Feijóo que pretende reducir o número de parlamentares de 75 a 61, Carme Adán asegurou que non se trata dunha medida de aforro, como pretende facer crer o goberno da Xunta, senón unha "merma da democracia" encamiñada a favorecer electoralmente ao Partido Popular a través dun "pucheirazo electoral". Adán intou ao goberno de Feijóo a reducir os gastos da administración galega "suprimindo as campañas publicitaria como a publicada a pasada semana no DOG" cuxo custo alcanzaba o millón de euros.
