Pensar en todas as voltas que dei

Ana Moreiras recunca con Aira Editorial para publicar este Xaora, a súa segunda banda deseñada logo daquela excelente Madialeva (Aira, 2020). Continúa así a senda encetada no primeiro libro aínda que ollo, non é a continuación daquel, non se confundan. Ana conta historias de vida, o que os anglosaxóns chaman "slice of life". E abofé que o fai moi ben. Xaora conta como Virxinia, unha muller que entra nesa zona indefinida que é a mediana idade, anda un pouco perdida. Quen non, que diría outro! Ten algunha dor física, mais as que máis doen son as emocionais, que a teñen nun momento de encrucillada vital. É dicir, o estado normal na mediana idade. Virxinia é unha traballadora da televisión pública comprometida na loita pola dignidade profesional e contra a manipulación dos medios públicos galegos. É doado e divertido facer o xogo de quen é quen. Os problemas vánselle acumulando até que recibe unha axuda especial, a súa avoa, unha muller alegre e atrevida que fai contraste coa neta e que empurrará a Virxinia para que esta recupere a ledicia. Por máis, a familia e as amizades estarán aí para axudar a protagonista. O guión desta novela gráfica é ben divertido e interesante, tanto polo que conta como por como o conta. Un fermoso exercicio de valorización deste noso país, da hibridación permanente que habitamos entre a tradición e a modernidade, a aldea e o urbano, o aquén e o alén. Tamén é unha fermosa homenaxe ás aldeas, a unha vida distinta afastada das urxencias, as máis das veces absurdas, do cotián na cidade. En resumo, un sentido e emocional recoñecemento do propio, do que nos fai ser o que somos e ver o mundo como o vemos, da familia e dos lugares que habitamos, que, de xeito indefectíbel, modelan o que vivimos e, porén, o que somos. Será especialmente interesante para quen, igual que a Virxinia, estea nese punto de introspección persoal e encrucillada vital, que cedo ou tarde chega. Quen se mova polos mesmos lugares que a protagonista recoñecerán axiña xentes, recunchos e emocións. Nos deseños tamén é unha obra excelente. Un debuxo realista, de trazo lixeiro para conseguir unha forma dinámica, que non sexa asfixiante, nin en exceso realista, pero que nunca deixa de selo de todo. Recoñécense os trazos de acuarela e mesmo case se distingue a textura do papel dos orixinais. Non perdan a fermosísima splash page que nos agasalla Moreiras dunha vista moi familiar para quen coñeza Bonaval en Compostela. Moreiras demostra con esta segunda novela gráfica que é unha grande narradora e para alén diso, tamén unha excelente debuxante. Para finalizar hai que falar dunha edición que é moi correcta, nun xusto equilibrio entre valor e custo. Un libro honesto na forma e no fondo, cun contido de altísimo valor e unha calidade no papel e na impresión que lle dan unha agradábel forma final a toda a obra. O prezo é axustado, por volta dos vinte euros, o que aínda mellora, máis se cabe, esta banda deseñada tan redonda.