Xeorxia na encrucillada

Despois de dous días de protestas masivas, incluíndo disturbios, violencia policial e a detención de 130 manifestantes, os cales foron xa postos en liberdade, o 10 de marzo o parlamento xeorxiano finalmente retirou a polémica "lei sobre transparencia en influencia estranxeira". Concibida para controlar e intervir as actividades das organizacións da sociedade civil xeorxiana que reciban máis de 20% de financiamento desde o exterior, a reforma lexislativa era moi similar á que foi aprobada en Rusia en 2012, e por iso foi cualificada por sectores da oposición como "a lei rusa". A diferenza do que sucede no caso de armenios e azerís, onde boa parte dos seus territorios e poboación estendéronse historicamente á Anatolia Oriental e ao norte do actual Irán respectivamente –é dicir, fóra do Cáucaso–, as terras históricas xeorxianas son caucásicas na súa totalidade. Á independencia do país en 1991, coa caída da URSS, seguíronlle uns anos 90 marcados polas guerras de Osetia do Sur e Abkhazia, graves conflitos civís e inestabilidade interna, e unha profunda crise económica. Despois da guerra ruso-xeorxiana de 2008, e especialmente desde a chegada ao poder do partido Soño Xeorxiano en 2012, as autoridades tentaron volver ao business as usual con Rusia, buscando desconflitivizar a relación co veciño do norte. Espazo xeopolítico Bielorrusia, Moldavia, Armenia-Acerbaixán, Asia Central… A agresión militar de Rusia contra Ucraína fixo tremer os cimentos da historia ao longo e ancho do espazo postsoviético, e a combinación de agresividade e debilidade mostrada por parte de Moscova provocou movementos e xiros xeopolíticos impensábeis pouco tempo atrás, o agravamento de conflitos latentes, así como a aceleración de procesos de afastamento ou de achegamento en relación á propia Rusia. No caso de Xeorxia, dúas fallas tectónicas atravesan o país e condicionaron o seu devir durante as últimas décadas: a primeira, o litixio territorial non resolvido con Abkhazia e Osetia do Sur, en situación de independencia de facto desde a guerra de agosto de 2008, baixo protección militar de Moscova, e cun recoñecemento internacional moi limitado (só media ducia de países, con Rusia á cabeza). En segundo lugar, e moi vinculada a esta cuestión, o espazo xeopolítico do cal o país debe formar parte. A diferenza de Ucraína ou Moldavia, Xeorxia non conseguiu o status de país candidato á adhesión á UE o ano pasado Precisamente, a guerra de Rusia contra Ucraína afastou aínda máis unha poboación entre a cal durante os últimos anos consolidáronse as posicións a favor da integración na Unión Europea, un 75-85% segundo todas as enquisas. A diferenza de Ucraína ou Moldavia, Xeorxia non conseguiu o status de país candidato á adhesión á UE en xuño do ano pasado. A pesar do seu reducido tamaño, Xeorxia é o país onde se produciron algunhas das manifestacións máis importantes e multitudinarias en contra da agresión militar rusa, e por todas as partes nas cidades e pobos xeorxianos pódense divisar mostras e iniciativas de apoio e solidariedade con Ucraína. Unha parte importante da poboación vive esta guerra como propia, e é precisamente no contexto de neutralidade fáctica do Goberno de Soño Xeorxiano (o país é un dos territorios utilizados por Rusia para facer bypass ás sancións comerciais occidentais), e de europeísmo retórico, pero non nos feitos, no que se producen as mobilizacións e a crise política que vive o país, sendo a "lei rusa" interpretada como un grave retroceso democrático, e un afastamento aínda maior polo que respecta ás aspiracións de integración na UE. Bidzina Ivanishvili Os cada vez máis imposíbeis equilibrios do Goberno explícanse en gran medida a través da figura do todopoderoso oligarca Bidzina Ivanishvili. Cunha fortuna de 5,6 mil millóns de dólares, a súa riqueza equivale a nin máis nin menos que o 30% do PIB xeorxiano, e dirixe o partido de Goberno Soño Xeorxiano desde a sombra. El e varios membros da súa familia manteñen negocios en Rusia, e grazas a estes vínculos desde Moscova percíbese o Goberno xeorxiano con bos ollos. Unha posición que cada vez será máis insostíbel, no marco dunha crise política que parece que chegou para quedar, e que fixa Xeorxia e a súa encrucillada xeopolítica, así como os riscos asociados a esta, no mapa dos novos-vellos conflitos reactivados pola guerra en Ucraína.