Ucraína e Rusia acúsanse dos ataques con drons dirixidos contra Moscova e Kíiv

Pasados poucos minutos das 6 da mañá da terza feira en Moscova, a capital rusa, testemuñas presenciais reportaron explosións no suroeste da urbe, unha zona onde residen persoas de altos ingresos, nun ataque con drons que o Kremlin atribuíu a Ucraína, e que provocou feridas en dúas persoas tras conseguir impactar tres dos vehículos aéreos non tripulados en varios edificios residenciais, sinalou Sergei Sobyanin, alcalde da cidade. Tras o ataque, que xerou danos menores no exterior das vivendas, os edificios foron evacuados durante varias horas. O Ministerio de Defensa ruso cualificouno como un “ataque terrorista” ucraíno con oito drons, todos “neutralizados”, indica, apuntando a que tres foron inutilizados polos sistemas de defensa electrónica e cinco derrubados polos mísiles antiaéreos, mentres o presidente do país, Vladimir Putin, fixo fincapé en que Kíiv buscaba agredir “obxectivos civís” e provocar unha contestación militar por parte da Federación Rusa. Así e todo, medios como Al Jazeera elevan a cando menos 25 o número de drons que participaron no ataque, con varios testemuños de explosións en cidades na contorna de Moscova que o gobernador provincial, Andrei Vorobiov, detallou que correspondían á interceptación de drons por parte da defensa antiaérea. O principal asesor do presidente ucraíno Volodimir Zelenski, Mykhailo Podolyak, insistiu en que “non temos nada que ver directamente con iso”, reiterando que “nos comprace observar e predicir un aumento na cantidade de ataques”. O rexeitamento de Kíiv á autoría do ataque chega pouco despois de que a Intelixencia de Washington responsabilizara Ucraína polas bombas que acabaron coa vida dunha e dun xornalista ruso ou da incursión na rexión rusa de Belgorod, trasladando a incomodidade do Goberno de Joe Biden polas operacións ucraínas fóra das súas fronteiras após entregar a alianza militar que lidera, a Organización do Tratado do Atlántico Norte (OTAN), máis de 70.000 millóns de euros en armamento aos militares do país, amais de asesoría e colaboración en tempo real. Drons ucraínos O británico The Guardian confirmou que as imaxes no aire dun dos drons que participaron no ataque concordan cun modelo de fabricación ucraína e que Rusia vincula con ataques anteriores. Aliás, ratifica que o obxectivo principal da operación militar “semella máis psicolóxico que calquera outra cousa” e é “un intento de levar a guerra en Ucraína ás portas dos rusos” despois do presunto intento sen éxito de asasinar a Putin noutra operación con drons a comezos de maio. Andrei Kartapolov, presidente do Comité de Defensa da Cámara baixa rusa, minimizou os efectos do ataque en RBC e subliñou que é “un acto de intimidación dirixido á poboación civil”, “deseñado para crear unha onda de pánico”. Pola súa parte, Maxim Ivanov, tamén deputado da forza oficialista Rusia Unida, considerou que é o ataque máis grave contra a cidade desde a Segunda Guerra Mundial e lanzou un chamamento a apoiar o esforzo militar. O voceiro do Kremlin, Dmitri Peskov, explicou o ataque como “unha resposta” de Kíiv aos “moi efectivos ataques” contra “un centro de toma de decisións” o pasado domingo, en alusión a un cuartel da Intelixencia militar de Ucraína. Pouco despois dos acontecementos en Moscova, as Forzas Armadas rusas lanzaron unha vaga de ataques aéreos con drons contra a capital ucraína, Kíiv, nos que segundo o alcalde Vitali Klitschko faleceu unha persoa e catro resultaron feridas, deixando danos nun edificio residencial. En paralelo, as autoridades ucraínas sostiveron que a súa defensa antiaérea derrubou a maioría dos aparellos non tripulados. AP apunta que non está claro se os danos no edificio foron provocados polos restos dun dron ou polo impacto de mísiles da defensa aérea ucraína. Esta foi a terceira operación militar rusa en Kíiv nas últimas horas, nas que medios especializados destacaron a destrución dun depósito de municións. Ademais, o ministro de Asuntos Exteriores ruso, Sergei Lavrov, afirmou que “Occidente apoia directamente o xenocidio” da poboación que se considera rusa en Ucraína ao que conduciría o plan de paz defendido por Zelenski, ao que acusou de buscar destruír “todo o ruso”, no marco dun aumento nas xornadas pasadas das intervencións de autoridades ucraínas negando a posibilidade dun alto o fogo no conflito, en paralelo ao desenvolvemento de iniciativas para acabar coa guerra por parte de Suráfrica, a China, o Brasil ou o Vaticano. Contraofensiva militar Malia que nesta semana altos cargos de Ucraína volveron aseverar que a contraofensiva militar ucraína anunciada hai meses pode comezar en calquera momento, unha mensaxe repetida desde a perda de Bakhmut, en Donetsk, non hai indicios polo de agora do seu comezo máis aló do que se consideran accións previas para tratar de saturar as defensas rusas, nese sentido, The Telegraph revela que Kíiv está a facer un “esforzo desesperado por repor o seu Exército” e compensar “os baleiros creados por decenas de milleiros de baixas no campo de batalla”, aplicando métodos de recrutamento máis “agresivos”. Suráfrica ratifica a inmunidade de Putin Medios internacionais corroboraron onte que o Goberno de Suráfrica, que acollerá a cimeira do grupo Brics entre o 22 e o 24 de agosto, promulgou unha norma de inmunidade para as persoas que participen no cumio e noutros eventos asociados, unha medida que o Executivo considerou típica cando exerce como anfitrión de foros internacionais. O Exército tamén afirmou que en ningún caso arrestaría o presidente ruso por falta de competencias se asistise á reunión, tras a orde de detención da Corte Penal Internacional, que o acusa de deportación forzosa de crianzas ucraínas no contexto da guerra. Peskov informou que enviarán unha representación do "nivel axeitado" e confiou en que “os países socios nese formato tan importante non se guíen por esas decisións ilegais”. Xeorxia reta a UE Xa en Xeorxia, Kaja Kaladze, membro do gobernante Soño Xeorxiano e alcalde de Tbilisi, a capital, salientou que a pesar da presión de Bruxelas para sumarse ás sancións coercitivas contra Rusia implantadas por unha cuarta parte dos Estados do mundo só “tomaremos unha decisión que satisfaga os intereses comúns” cando sexan aceptados como Estado membro da Unión Europea.