Trump e Putin comprométense a iniciar negociacións "de inmediato" sobre a guerra en Ucraína

O presidente dos EUA, Donald Trump, e o seu homólogo ruso, Vladimir Putin, mantiveron esta cuarta feira unha conversa telefónica na que, entre outros asuntos, abordaron a guerra en Ucraína e comprometéronse a iniciar negociacións “de inmediato” para acabar co conflito.

“Acordamos traballar xuntos, moi de perto, incluso visitando as nacións de cada un. Tamén acordamos que os nosos respectivos equipos inicien as negociacións de inmediato e comezaremos chamando ao presidente (Volodimir) Zelenski, de Ucraína, para informalo da conversa, algo que farei agora mesmo”, anunciou.

De acordo co magnate, o obxectivo principal destas negociacións, que está convencido que serán todo un “éxito”, é o de pórlle fin a unha guerra que non tería estalado se el fose presidente dos EUA e que lamentabelmente deixa “millóns” de mortos. “Non se deben perder máis vidas”, insistiu.

O equipo negociador estadounidense estará integrado polo secretario de Estado, Marco Rubio; o director da CIA, John Ratcliffe; o asesor de Seguridade Nacional, Michael Waltz; e o enviado especial do presidente Steve Witkoff, segundo precisou Trump no seu perfil de Truth Social, a súa propia rede social.

O presidente dos EUA asegurou que a chamada foi “longa e moi produtiva”, e nela abordaron tamén a situación de Oriente, cuestións de enerxía e sobre IA. “Ambos reflexionamos sobre a gran historia das nosas nacións e o feito de que loitamos xuntos con éxito na Segunda Guerra Mundial”, engadiu.

Máis tarde, o Kremlin confirmou a conversa entre Putin e Trump, e precisou que o mandatario ruso defendeu “a necesidade de eliminar as causas profundas do conflito” para acabar co a guerra en Ucraína, mentres que ambos coincidiron en que “se pode lograr unha solución a longo prazo mediante negociacións pacíficas”.

Igualmente, Putin apoiou a tese de Trump de que chegou o momento de que Rusia e os EUA deixen de lado as súas diferenzas e “colaboren”.