A crise nuclear en Fukushima continúa sen control após dous anos do tsunami que fixo saltar todas as alarmas. O grao de contaminación da auga que rodea os reactores e as constantes fugas da mesma cara o océano están a pór en xaque ao goberno nipón. E é que logo após declararen a incapacidade da empresa TEPCO --encargada da xestión da central-- e asumiren o control da catástrofe as autoridades gobernamentais xaponesas, non deixan de se sucederen as fugas de auga radiactiva.
A central acumula a día de hoxe grandes cantidades de auga contaminada, as fugas son constantes e supoñen un grande risco
A última, acontecida esta mesma fin de semana ao paso do tifón Wipha que deixa tras de si máis dunha vintena de vítimas mortais. Os ventos furacanados e as choivas --que chegaron a triplicar as previsións-- provocron a quebra dos sistemas de seguridade instalados para impedir a saída de auga dos contedores. "Nestes momentos estamos a investigar", indicaron fontes do goberno nipón, "aínda non temos coñecemento da cantidade de auga" vertida mais non descartan que se producisen novos trasvases ao océano.
A auga contida polas barreiras sitúase nuns niveis de radioación 24 veces superiores aos permitidos (710 becquereis por litro fronte os 30 autorizados). "Tentamos bombear a auga mais non foi suficiente", explicaron os técnicos. Asemade, @s responsábeis da central xa levaran a cabo días atrás vertidos controlados ao mar para reducir os riscos. No entanto, a concentración de auga radioactiva continúa a ser o maior risco en Fikushima.
Tamén así, e segundo recolle a imprensa internacional, diversos erros humanos deviñeron en distintas fugas ao longo deste mes. Após dous anos do estourido da crise atómica, a central nuclear continúa sen control.
