Suráfrica di que o 'apartheid' imposto por Israel é "aínda máis extremo" que o vivido durante décadas no país africano

Suráfrica denunciou esta terza feira ante a Corte Internacional de Xustiza (CIX) que o apartheid imposto por Israel contra a poboación palestina "é unha forma aínda máis extrema" do institucionalizado durante décadas no Estado do continente africano. Palestina insta a Corte Internacional de Xustiza a acabar coa "impunidade" de Israel "Nós, como surafricanos, vemos, escoitamos e sentimos totalmente as políticas e prácticas inhumanas e discriminatorias do réxime israelí como unha forma aínda extrema do apartheid institucionalizado contra os negros no meu país, casualmente desde 1948", dixo Vusimuzi Madonsela, embaixador de Suráfrica nos Países Baixos. "A loita do pobo palestino evoca a nosa contra o apartheid", dixo o embaixador "O apartheid de Israel debe rematar", sinalou o surafricano, que manifestou que a poboación palestina "debe ter permiso a exercer o seu dereito inalienábel á autodeterminación". Así mesmo, o embaixador tamén fixo fincapé en que "a loita do pobo palestino evoca lembranzas da nosa loita contra o apartheid, a segregación e a opresión" e lamentou que as "décadas de colonialismo" por parte de Israel teñan derivado "nun ciclo interminábel de violencia". Por todo isto, Mandosela incidiu en que "unha solución xusta para todos os que viven legalmente na Palestina histórica debe ser negociada coa axuda da comunidade internacional", ao tempo que lembrou á CIX a súa sentenza en xaneiro sobre a ofensiva contra Gaza, onde sostivo que as accións israelís "son plausibelmente un xenocidio". As vistas comezaron esta segunda feira a respecto das "consecuencias legais" das políticas de Israel nos Territorios Ocupados Palestinos tras unha petición neste sentido presentada en decembro de 2022, antes do comezo da actual ofensiva en Gaza, pola Asemblea Xeral das Nacións Unidas. Durante a xornada, o ministro de Exteriores palestino, Riad al Maliki, denunciou as décadas de "impunidade" de Israel e reclamou ao tribunal que ordene a fin "inmediata" da ocupación. Á súa vez, o primeiro ministro de Israel, Benjamin Netanyahu, afirmou que "non recoñece a lexitimidade" da CIX neste caso. Trátase da segunda vez na que a CIX ten que pronunciarse sobre a situación nos territorios ocupados palestinos. A primeira ocasión foi en 2004, cando sentenciou que o muro de separación construído por Israel na Cisxordania ocupada violaba o dereito internacional e pediu o seu derrubamento, aínda que na actualidade continúa en pé. Cando menos 107 mortes 29.200 persoas morreron en Gaza desde o comezo da ofensiva de Israel Neste contexto, as mortes palestinas a causa dos bombardeos israelís sobre a Faixa de Gaza aumentaron cando menos en 107 durante as últimas horas, deixando a cifra total desde o comezo da ofensiva en case 29.200 falecementos, ao que hai que sumar as 393 persoas asasinadas polas accións das forzas de seguridade e de colonos israelís en Cisxordania e Xerusalén Leste. A OMS exixe entrar no hospital Nasser entre mortes pola falta de enerxía Ademais, un mínimo de 10 persoas resultaron feridas, así como unha morta, tras seren tiroteadas por militares do Exercito israelí cando agardaban por unha entrega de axuda humanitaria na cidade de Gaza. A falta de seguridade provocou a "pausa" da axuda do Programa Mundial de Alimentos no norte da faixa. Mentres tanto, a Organización Mundial da Saúde (OMS) confirmou a finalización dunha segunda operación de evacuación de pacientes do Hospital Naser, situado na cidade de Jan Yunis, ao sur da Faixa de Gaza, o que permitiu realizar un traslado de 32 doentes en estado crítico, incluídas dúas crianzas. Ao mesmo tempo, continúa a extensión do conflito noutras frontes do Oriente Medio. O Exército de Israel informou esta terza feira da realización de bombardeos contra "edificios militares" da milicia Hezbolá no territorio do Líbano, sen que polo momento haxa información sobre vítimas. Ademais, os hutís (grupo que controla parte do territorio de Iemen) denunciaron esta terza feira un novo bombardeo dos Estados Unidos contra a rexión de Hodeida, no oeste do país e na beira do mar Vermello. Ante este ataque, anunciaron unha intensificación das súas operacións "até que cese a agresión e se levante o asedio israelí na Faixa de Gaza". Pola súa parte, o líder do brazo político de Hamás, Ismail Haniye, chegou esta terza feira a Exipto para comezar un proceso de negociacións para un posíbel cesamento do fogo na Faixa de Gaza a cambio da liberación de reféns secuestrados pola organización. Conflito Brasil-Israel O primeiro ministro da Autoridade Palestina, Mohamed Shatayé, agradeceu ao presidente do Brasil, Luiz Inácio Lula da Silva, os seus esforzos en diferentes foros internacionais a favor dun cesamento do fogo na Faixa de Gaza, unha vez Israel o nomeou como persoa non grata por comparar os seus ataques co Holocausto da Alemaña nazi. A crise diplomática entre o Brasil e Israel está a ser aproveitada pola oposición a Lula, que asinou unha petición de impeachment (proceso de destitución). Aínda que é difícil que prospere, a iniciativa, liderada por Carla Zambelli, do Partido Liberal (o PL, a formación do ex presidente Jair Bolsonaro), tensa aínda máis o ambiente no Congreso brasileiro. Ademais, a Cámara tamén recibiu unha proposta de moción de repudio a Lula, de Júlia Zanatta, tamén do PL. Os hutís piden á UE "non xogar con lume" no mar Vermello Os hutís pediron esta terza feira á UE "non xogar con lume" ante o anuncio do lanzamento da súa nova operación naval, nomeada Aspides, para escoltar buques mercantes e repeler ataques no mar Vermello. O Mar Vermello, perto dunha nova guerra após os ataques de Londres e Washington en Iemen O presidente do Comité Revolucionario de Iemen -o Goberno estabelecido polos hutís-, Mohamed Alí al Huti, considerou que "a súa presenza aumenta a militarización do mar", mentres que "a navegación internacional é segura". "Aprendede a lección do Reino Unido. Non precisades o apoio do demo estadounidense para protexer a entidade ocupante [Israel] que practica o exterminio da poboación de Gaza sen molestias", aseverou. Subministracións A militarización, dixo Al Huti, "afecta as cadeas de subministracións de alimentos ás tendas". Horas antes, a presidenta da Comisión Europea, Ursula von der Leyen, daba a "benvida á decisión de lanzar a operación naval". "A UE garantirá a liberdade de navegación no mar Vermello, traballando man a man cos socios internacionais", afirmou Von der Leyen sobre a operación na que participan buques de Alemaña, Grecia, Italia e Francia. Así mesmo, Bélxica porá a disposición unha fragata para futuras rotacións desta misión.