Rusia e Ucraína acúsanse de estar a preparar unha sabotaxe na central nuclear de Zaporiyia

Os Gobernos de Rusia e Ucraína volveron cruzar esta cuarta feira acusacións sobre a suposta preparación de sabotaxes na central nuclear de Zaporiyia, ao leste de Ucraína, considerada a maior do continente europeo e controlada polas tropas rusas desde comezos de marzo de 2022. Neste contexto, as consecuencias que podería ter un potencial ataque converteuse nun temor a nivel internacional. A ONU chama a dialogar para evitar un accidente nuclear en Zaporiyia O portavoz do Kremlin, Dimitri Peskov, recoñeceu esta cuarta feira que a situación é "bastante tensa", xa que existe unha "ameaza de sabotaxe" por parte do "réxime de Kiív". Un extremo que "pode ter consecuencias catastróficas", advertiu, aínda que garantiu que "están tomando medidas" para contrarrestar dita ameaza. Pola súa parte, o presidente de Ucraína, Volodimir Zelenski, xa avisou na xornada previa dunha posíbel "provocación" sinalando as forzas rusas. A Intelixencia ucraína afirma que detectou a colocación de explosivos no tellado da central nuclear, con vistas presuntamente á simulación dun bombardeo que Moscova pretendería atribuír a Kiív. A viceministra ucraína de Defensa, Hanna Maliar, advertiu esta cuarta feira novamente do risco de que haxa algún tipo de "acto terrorista", asumindo que un Estado como Rusia "é capaz de calquera cousa", por moi "imprudente" que poida parecer. As autoridades ucraínas iniciaron os preparativos ante un posíbel accidente e pediron á poboación que confíe só nas fontes oficiais. Pola contra, a colocación de explosivos no tellado da central foi negada por Rusia. "Para que iamos ter explosivos alí? É un sen sentido dirixido a manter a tensión ao redor da planta", dixo o asesor de Rosenergoatom, a operadora rusa das plantas nucleares, Renat Karchaa. Refrixeración "estábel" A empresa ucraína Energoartom subliñou esta cuarta feira que o nivel de auga no estanque de refrixeración da central nuclear de Zaporiyia é "estábel" e apuntou que a situación "está baixo control" a pesar da destrución en xuño da presa de Kajovka (a auga do encoro era necesaria para que a planta de Zaporiyia reciba electricidade para os condensadores de turbina e os sistemas de seguridade da central nuclear), situada no Oblast de Kherson. A OIEA solicita estabelecer unha "zona de protección" na central nuclear de Zaporiyia Moscova e Kiív xa se acusaron mutuamente de destruír parcialmente a presa de Jakovka, o que derivou en graves inundacións nas beiras do río Dniéper. De feito, Peskov aludiu a este caso para expor o que estarían dispostas a facer as forzas ucraínas. "O nivel de auga no estanque de refrixeración da central nuclear de Zaporiyia non cambiou, na actualidade sitúase nos 16,56 metros", detallou Energoatom. Neste sentido, a compañía apuntou que o nivel de auga no canal que serve de subministración de auga para o estanque é de 11,15 metros, ao tempo que fixo fincapé en que "o nivel de auga no canal non caeu de forma significativa en tempos recentes" e que "os seus indicadores non dependen xa do encoro de Jakovka". "É necesario lembrar que hai unidades da central nuclear de Zaporiyia que non operan desde setembro de 2022, polo que non tivo lugar unha evaporación da auga no estanque de refrixeración", concluíu Energoatom. Esta mensaxe foi publicada un día despois de que a central quedara durante unhas horas sen a liña principal que a conecta á rede eléctrica, o que lle obrigou a depender dunha vía de apoio que foi reconectada hai apenas tres días, despois de catro meses de corte polos ataques na zona. "Precaria seguridade" Fronte á calma que transmitiu a empresa ucraína, o director xeral do Organismo Internacional para a Enerxía Atómica (OIEA), Rafael Grossi, aseverou, despois de coñecerse a desconexión da central nuclear de Zaporiyia da rede eléctrica principal, que "esta vez" a central evitou quedarse por completo sen subministración externa, mais advertiu que esta situación "demostra a precaria situación de seguridade" que experimenta a planta. De feito, no transcurso da actual guerra entre Rusia e Ucraína, en máis dunha ocasión, a central nuclear tivo que usar xeradores diésel de emerxencia. A Central Nuclear de Zaporiyia tivo que ser conectada en varias ocasións a xeradores diésel A central nuclear de Zaporiyia, que se construíu na década de 1980 a beiras do encoro de Kajovka e que ten seis reactores de auga presurizada VVER-1000, é a maior do continente europeo e unha das 10 maiores do mundo. Antes da invasión rusa de Ucraína, pertencía á empresa estatal ucraína Energoatom, mais desde comezos de marzo de 2022, a instalación atópase baixo control de Rusia. Durante o ano pasado, Moscova denunciou en repetidas ocasións que a central e a cidade de Energodar, onde se atopa situada, foron obxecto de ataques regulares por parte das forzas ucraínas. A principios de setembro de 2022, unha misión do OIEA chegou á central nuclear. A organización pediu que cesasen os ataques contra a central e estabeleceuse unha zona segura ao redor dela. Con todo, na primavera de 2023, no medio de informacións sobre a contraofensiva planeada polo Exército ucraíno e a defensa rusa da súa posición, a cuestión da seguridade da planta volveu agudizarse con acusacións cruzadas entre os dous bandos da contenda. O Xapón recibe luz verde para as verteduras de Fukushima O Organismo Internacional para a Enerxía Atómica (OIEA) anunciou nun comunicado que os plans do Xapón para descargar ao mar a auga tratada e almacenada da central nuclear de Fukushima Daiichi axústanse ás normas de seguridade do ente. Tokio pretende verter durante 40 anos augas da planta enerxética de Fukushima Segundo un informe do traballo realizado durante case dous anos por un grupo de especialistas de 11 Estados, o Sistema Avanzado de Procesamento de Líquidos (ALPS) xaponés "garante a seguridade das descargas da auga tratada e non representa ningún perigo para as persoas e o medio ambiente", posto que tería un "impacto radiolóxico insignificante". O perigo do tritio (e do que non é tritio) que Xapón deitará ao mar desde Fukushima Porén, aínda que o sistema de filtrado ALPS reduce a contaminación radioactiva, o tratamento actualmente non pode eliminar a presenza de tritio. Por este motivo, antes de verter os residuos ao mar, o Xapón planea diluílos até lograr un nivel de tritio por baixo do estabelecido nas normas. Tensión internacional O plan de Tokio de descargar máis dun millón de metros cúbicos de auga tratada nos próximos 40 anos recibiu un forte rexeitamento tanto dentro do Estado nipón como a nivel global. No Xapón as críticas son lideradas polo sector pesqueiro mentres que a nivel internacional o principal opositor é a China.