Rusia alerta dunha guerra coa OTAN se envía tropas a Kíiv

Nese caso, “deberíamos falar non de probabilidade, senón de inevitabilidade, así é como o avaliamos”, resolveu hoxe o voceiro do Kremlin, Dmitri Peskov, ao ser cuestionado sobre a posibilidade dunha guerra entre Rusia e a Organización do Tratado do Atlántico Norte (OTAN) se a alianza militar dirixida polos Estados Unidos envía os seus soldados a Ucraína. Peskov engadiu que “prestamos atención a que se debateu o tema” e a que “non existe un consenso”, facendo fincapé en que “isto non convén aos intereses destes países, deben ser conscientes diso”. Esa opción xa fora abordada polo presidente ruso, Vladimir Putin, advertindo que a chegada de tropas da OTAN “porá a humanidade ao bordo dun conflito global moi grave”. Poucas horas antes, durante unha cimeira en París co fin de tratar a situación en Ucraína, na que participaron líderes dunha vintena de Estados da Unión Europea (UE) e representantes de Washington e Londres, o mandatario francés, Emmanuel Macron, confirmou que non existe consenso ao respecto, mais reiterou que, “en termos dinámicos, non hai que descartar nada”. Ademais, o presidente sostivo que a UE fará “todo o necesario para que Rusia non poida gañar esta guerra”, chegando a afirmar que “nuns anos haberá que prepararse para que Rusia ataque”. O primeiro en alertar do cariz do debate foi o primeiro ministro eslovaco, Robert Fico, que transmitiu que membros da UE e da OTAN estaban a analizar acordos que implicarían “a participación directa” de soldados da OTAN en Ucraína, polo que “nos preguntamos onde están as nosas garantías de seguridade”. O líder centroeuropeo, un dos poucos que demandou na cimeira negociacións para un alto o fogo, admitiu que “estamos extremadamente nerviosos co desenvolvemento da situación, posto que esta guerra non leva a ningures e haberá máis mortos”. En intervencións anteriores, Fico acusou a OTAN de mentir cando se comprometeu coa Unión Soviética a non expandirse cara ao leste, e mais de negarse a admitir que a estratexia de “utilizar o conflito en Ucraína para destruír a Federación de Rusia non está a funcionar”. En paralelo, culpou os “neonazis ucraínos” por desencadear o conflito interno no país hai unha década. As palabras de Macron provocaron un aluvión de declaracións de membros da alianza militar, co rexeitamento de Alemaña, Italia, Hungría, Polonia, Chequia, Finlandia ou o Estado español a enviar militares a Ucraína, e un funcionario dos Estados Unidos comunicou á axencia Reuters que non teñen intencións de despregar tropas. O secretario xeral da OTAN, Jens Stoltenberg, tratou de acabar co debate subliñando que “non hai plans para tropas de combate da OTAN sobre o terreo”, destacando que a alianza militar “e os seus aliados están a prestar un apoio militar sen precedentes a Ucraína. Fixémolo desde 2014 e intensificámolo tras a invasión a grande escala de Rusia”. Após a entrada rusa no conflito interno ucraíno os Estados membros ou da contorna da OTAN comprometéronse a entregar 250.000 millóns de euros a Kíiv, entre eles máis de 100.000 millóns en armas. Non obstante, a negativa de Stoltenberg a apoiar este tipo de escalada non implica unha negativa da OTAN a escalar a situación tendo en conta as dificultades ucraínas no conflito, con Rusia rachando as súas defensas en varios puntos da fronte, como demostrou a pasada semana Stoltenberg dando luz verde a Kíiv para atacar “obxectivos militares rusos fóra de Ucraína”. Con anterioridade, a OTAN condicionara a entrega de armamento a que non se utilizase para atacar territorio ruso, o que segundo o presidente Putin podería supor unha escalada nas hostilidades. En todo caso, Moscova xa denunciara que un sistema estadounidense Patriot foi usado en xaneiro para derribar un avión militar ruso no seu territorio con prisioneiros ucraínos que se dirixían a un intercambio de presos. Washington xógase a súa credibilidade O certo é que os Estados Unidos e a UE “teñen moito en xogo”, pois a “derrota de Ucraína probabelmente danaría máis a credibilidade de Washington en todo o mundo” que a súa saída de Afganistán, explica Kristi Raik, do Centro Internacional para a Defensa e a Seguridade. Isto xera un escenario complicado para os Estados Unidos por mor de que “Ucraína non pode gañar a guerra”, constata Anatol Lieven, do Instituto Quincy para a Arte de Gobernar Responsabelmente, na revista Time, debullando nesa liña que “os partidarios dunha vitoria completa de Ucraína albergaron esperanzas que van desde o demasiado optimista até o máxico”. Os arsenais occidentais, ao límite Perante un hipotético conflito con Rusia, os arsenais da OTAN están nun nivel “perigosamente baixo”, recoñecera un alto xeneral estadounidense, no contexto dos envíos de armas a Ucraína, e o propio Stoltenberg sinalara que o país eslavo consume munición a un ritmo superior do que pode producila a alianza militar. Asemade, Rheinmetall, a principal empresa de armas do bloque comunitario, alertou de que é necesaria unha década para encher os arsenais da UE e que poida “defenderse”.