Putin acusa Occidente de esquecer quen derrotou a Alemaña nazi

Acompañado dos líderes das repúblicas de Belarús, Armenia, Kazhakhstán, Usbequistán, Kirguizistán, Taxiquistán e Turcomenistán, daquela integradas na Unión Soviética, o presidente ruso Vladimir Putin presidiu a terza feira en Moscova os actos polo Día da Vitoria contra o fascismo, que conmemora a rendición de Alemaña ás tropas soviéticas en 1945, na Segunda Guerra Mundial. O desfile, no que participaron máis de 10.000 soldados e 125 equipos militares, estivo marcado este ano pola guerra en Ucraína, con especial intensidade despois do intento de ataque con drons contra Putin a semana pasada. Nunha vintena de urbes, os desfiles foron cancelados e parte dos actos en Moscova foron suspendidos pola ameaza terrorista de Kíiv, transmitiu o Kremlin. O mandatario ruso subliñou que “calquera ideoloxía de superioridade é repugnante, criminal e mortal”, e acusou as “elites occidentais globais” de “insistir na súa exclusividade". "Enfrontan as persoas e dividen a sociedade, provocan conflitos sanguentos e golpes de Estado” co fin de “impor a súa vontade, os seus dereitos, as súas regras, e en esencia, un sistema de roubo, violencia e opresión ás nacións”. "Semella que esqueceron a que conduciron as tolas afirmacións de dominación mundial dos nazis", asegurou Putin, que proclamou que “esqueceron quen derrotou ese monstruoso mal total, quen se puxo como un muro para a súa patria e non escatimou vidas pola liberación dos pobos de Europa”. No seu discurso abordou a invasión rusa de Ucraína, insistindo en que se está a “librar unha verdadeira guerra contra a nosa patria”, e que a pesar da súa vontade dun “futuro pacífico, libre e estábel” non renunciarán a garantir a súa seguridade, alertando de que “hoxe a civilización volve atoparse nun punto de inflexión crucial”. Nese sentido, recalcou que o pobo ucraíno “converteuse en refén do golpe de Estado e do réxime criminal dos seus amos occidentais, e en moeda de cambio na execución” dos seus plans, algo que atribuíu ao intento dos países occidentais de “desintegrar e destruír o noso país, reverter os resultados da Segunda Guerra Mundial, rachar definitivamente o sistema de seguridade global e o dereito internacional, e estrangular calquera centro soberano de desenvolvemento”. Arredor do conflito armado, fixéronse públicas unhas declaracións do secretario xeral da Organización das Nacións Unidas (ONU), António Guterres, nas que apuntaba que “neste momento non vexo ningunha posibilidade de conseguir inmediatamente un alto o fogo global”, aludindo a que “as dúas partes están convencidas de que poden gañar”. Non descartou un posíbel entendemento no futuro, no medio dos movementos protagonizados pola China para fomentar unha saída negociada ás hostilidades. En todo caso, Guterres reclamou “arsenais diplomáticos” para garantir a paz en Ucraína. Xa en Kíiv, cuxas autoridades proclamaran que o Día da Vitoria contra o nazismo será conmemorado o 8 de maio e o 9 pasa a ser o Día de Europa, unha data impulsada pola Unión Europea (UE), estivo a presidenta da Comisión Europea, Ursula von der Leyen, que trasladou que Ucraína pode contar coa “solidariedade” do bloque comunitario o “tempo que faga falta”, e aseverou que eventualmente haberá “unha Ucraína libre e en paz na UE”, adiantando que no outono os Estados membros comunicarán se aceptan abrir negociacións de acceso. Ao tempo, o presidente ucraíno, Volodimir Zelenski, cualificou de “absolutamente inaceptábeis” as restricións comerciais temporais impostas a importacións agrícolas ucraínas por Polonia, Hungría, Romanía, Eslovaquia e Bulgaria, e que finalmente foron aceptadas por Bruxelas, tras incidir en que a política comercial é unha atribución exclusiva da UE. Así e todo, Zelenski ratificou que agardaba decisións “fortes” para acabar coas restricións, á vez, a Eurocámara aprobaba estender até xuño de 2024 a suspensión dos aranceis para produtos ucraínos. Pola súa parte, o chanceler alemán, Olaf Scholz, definiu o desfile en Moscova como “un xogo de poder” e pediu “non deixarnos intimidar” e continuar apoiando Ucraína “tanto tempo como faga falta” para non volver “aos tempos nos que rexía a lei do máis forte”, algo que vinculou co “noso futuro na UE”, defendendo a presión de nove Estados membros para acabar coa unanimidade exixida en política exterior e fiscal para mellorar o funcionamento interno das institucións comunitarias. No que atinxe a esa asistencia a Kíiv, os Estados Unidos (EUA) anunciaron un novo paquete militar para Ucraína de 1.100 millóns de euros, entrementres, o Parlamento da UE aprobou acelerar o trámite lexislativo dunha norma para impulsar con 500 millóns a produción de munición co fin de aumentar as entregas a Ucraína. O último reporte do Kiel Institute, que abarca desde o comezo da invasión rusa até finais de febreiro de 2023, cifra en máis de 70.000 millóns de euros o valor do armamento entregado polos membros da Organización do Tratado do Atlántico Norte (OTAN) a Ucraína, sobre todo polos EUA. "Desfacerse" de Putin Nos EUA, Robert F. Kennedy Jr., candidato nas primarias demócratas contra o actual presidente, Joe Biden, cuestionou o envío de máis de 100.000 millóns de euros en asistencia xeral a Ucraína cando “unha cuarta parte dos estadounidenses vai á cama con fame”, e fixo fincapé en que “matamos 300.000 soldados ucraínos e 40.000 civís” para intentar “desfacerse” de Putin. No plano militar, as Forzas Armadas rusas lanzaron onte unha vaga de ataques con mísiles contra depósitos de munición ucraínos, que segundo Kíiv foi interceptada na súa maioría. Amais, Yevgueni Prigozhin, do grupo ruso de mercenarios Wagner, sinalou que forzas ucraínas bombardearon unha instalación usada como prisión para militares ucraínos, e continuou reclamando máis munición ao alto mando ruso, indicando que foron advertidos de que sería considerado traizón se abandonan as súas posicións. Ao respecto da anunciada contraofensiva de Kíiv, que determinará se os países da OTAN proseguen a sustentar o Exército ucraíno, como admitiu Zelenski, á vez que o Alto representante para a Política Exterior da UE, Josep Borrell, ratificaba que sen o apoio occidental “Ucraína é incapaz de defenderse e terá que renderse”, o primeiro ministro ucraíno, Denys Shmyhal, xustificou os atrasos no lanzamento da operación nunha preparación moi coidadosa. Conversa da iniciativa do mar Negro Hoxe e mañá a cidade turca de Istambul acollerá unha xuntanza de alto nivel sobre a iniciativa humanitaria de exportación de gran polo mar Negro entre as partes asinantes, Rusia, Ucraína, Turquía e a ONU, para intentar pactar unha prórroga que evite que expire o 18 de maio, cando xa alcanzou as 30 millóns de toneladas de gran. Porén, a ONU destacou que non se exportou nada de amoníaco ruso, un dos aspectos do pacto que Moscova denuncia que non se está a cumprir.