O Papa Francisco: "Quizais os ladridos da OTAN ás portas de Rusia levaron Putin a desencadear o conflito"

O máximo representante da Igrexa católica subliña que "para que haxa paz non abonda a vontade" e pide un encontro con Vladimir Putin en Moscova: "Debemos deter tanta brutalidade".
O Papa Francisco, no Vaticano, o pasado 27 de abril. (Foto: Evandro Inetti / ZUMA Press)
photo_camera O Papa Francisco, no Vaticano, o pasado 27 de abril. (Foto: Evandro Inetti / ZUMA Press)

"Quizais os ladridos da OTAN ás portas de Rusia levaron [o presidente, Vladimir Putin] a reaccionar mal e desencadear un conflito". Nestes termos pronunciouse esta terza feira o Papa Francisco Bergoglio, nunha entrevista concedida ao xornal italiano Corriere della Sera.

A ollos do Papa, esa "ira" de Putin tería sido consecuencia, cando menos en parte, dos movementos estratéxicos da organización militar en Europa: "Non sei se [a ira] foi provocada, mais facilitada seica si".

A respecto do envío de armamento ofensivo a Ucraína, Bergoglio amosa tamén certas reticencias: "Non podo responder á pregunta de se é correcto abastecer os ucraínos. O que está claro é que se están a probar armas nesa terra. Os rusos agora saben que os tanques serven de pouco e están pensando noutras cousas. As guerras líbranse para isto: para probar as armas que producimos".

Este foi o caso, segundo o Papa, da Guerra Civil española como paso previo ao estoupido da Segunda Guerra Mundial. "O comercio de armas é un escándalo, poucos se opoñen. Hai dous ou tres anos chegou a Xénova (Italia) un barco cargado de armas que houbo que trasladar a un gran cargueiro para transportalas ao Iemen. Os traballadores do porto non querían facelo. Dixeron: 'Pensemos nos nenos do Iemen'. É un xesto pequeno, mais un bonito xesto. Debería haber máis casos así", precisou.

A respecto dunha posíbel visita a Kíiv, o Papa defendeu que xa viaxaron alí dous cardeais da Igrexa católica e que a el, polo de agora, non lle corresponde ir: "Primeiro teño que ir a Moscova para reunirme con Putin. Mais eu tamén son un sacerdote, que podería facer? Fago o que podo. Se Putin abrise a porta...".

Con todo, Francisco Bergoglio afirmou que o primeiro día de guerra chamou o presidente Volodimir Zelenski, mais non a Putin. "Chameino en decembro, polo meu aniversario, mais desta volta non".

Si falou, pola contra, co embaixador ruso en Italia para instar o Kremlin a "deter" a invasión de Ucraína. Posteriormente fíxolle chegar a Putin, a través do cardeal Pietro Parolin, que estaba disposto a viaxar a Moscova e sentar a falar con el. "Porén, Putin non pode e non quere ter esta reunión agora. Mais tanta brutalidade... como non detela? Hai 25 anos vivimos o mesmo con Ruanda", manifestou.

Bergoglio conclúe a súa intervención sobre a guerra cunha frase contundente: "Para a paz non abonda con ter vontade, a guerra é terríbel e debemos berralo".

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios