Noticias do Imperio

Este ano 2024 realizaranse eleccións presidenciais nos Estados Unidos de América (EUA). O desenlace destes comicios será vital para Cuba. A contenda, até o de agora, parece perfilarse como un novo enfrontamento entre Donald Trump, republicano, e o demócrata Joe Biden. Aínda que Biden non cumpriu a maior parte das súas promesas electorais, a súa Administración tampouco foi das máis hostís contra o país, limitándose a manter políticas e restricións aprobadas no anterior mandato. Con todo, un retorno de Trump á Casa Branca pode marcar unha nova volta de porca á histórica campaña de agresión contra o país. O legado de Trump Aínda que desde os inicios da Revolución cubana os EUA despregaron un amplo arsenal de medidas en contra da illa, entre os gobernos recentes o que máis se empregou en atacar todas as arterias vitais da nación foi o goberno de Trump. Nos seus catro anos o magnate republicano aprobou 243 medidas en contra da illa, moitas delas mentres o país e o mundo estaban enfrascados no enfrontamento da Covid. Entre as medidas tomadas contra Cuba podemos destacar a activación do Título III da Lei Helms-Burton, aprobada en 1996, pero cuxo terceiro título fora suspendido por sucesivas administracións norteamericanas. Tamén se restrinxiron as viaxes á illa, creouse unha Lista de Aloxamentos Prohibidos que incluíu 422 hoteis e casas de renda, limitouse o monto das remesas e suspendeuse a licenza que permitía desde os anos 90 á Western Union operar estas transferencias cara a Cuba. Pouco antes de deixar o mandato, Trump incluíu Cuba na lista de países que patrocinan o terrorismo Atacouse a cooperación médica cubana, sumando a esta campaña organismos internacionais e gobernos aliados de Washington. Perseguíronse as operacións de comercio exterior do país, sancionando a navieiras, almacenistas e institucións financeiras por levar adiante operacións mercantís lexítimas de Cuba. Creouse unha lista de entidades cubanas restrinxidas, onde se incluíron 231 empresas de todos os sectores da economía nacional. O asedio chegou ao momento de perseguir todas as embarcacións e operacións financeiras orientadas a garantir a subministración de combustíbel á nación. Pouco antes de deixar o mandato, Trump tamén incluíu Cuba na Lista de Países Patrocinadores do Terrorismo, da cal Biden negouse a sacar o país malia as numerosas peticións da sociedade civil norteamericana. Unha pantasma electoral Desde hai anos Cuba é un tema importante no debate presidencial norteamericano. As razóns son varias. A primeira é que a hostilidade cara ao proxecto social e político da illa é un punto de consenso entre os dous grandes partidos da política estadounidense. As elites imperiais nunca perdoaron á nación o romper coas estruturas de dominación neocolonial que durante medio século teceu o capital norteamericano sobre ela, apropiándose das súas principais riquezas. A existencia de Cuba, seis décadas e media despois, é un reto ademais para o proxecto de dominación norteamericano en todo o continente. O exemplo da illa bloqueada é unha pantasma que preocupa as elites latinoamericanas, e por iso axítano atemorizadas cada vez que as condicións do neoliberalismo xeran estalidos prerrevolucionarios nas súas sociedades. É o caso da Colombia de Duque en 2018 ou o Chile de Sebastián Piñera en 2019. Enseguida a gran prensa encheuse de acusacións sobre supostos "axentes cubanos" que dirixían estas protestas. Afundir e demonizar Cuba é afundir e demonizar a esperanza que representa. Cuba é tamén clave para a contenda política interna. A influencia de certos sectores cubanoamericanos na Florida, o carácter pendular deste estado (inclinado cada vez máis cara ao lado republicano) e a gran cantidade de votos electorais que achega fan que, á hora de tentar gañar votantes, as promesas de que facer ou non cara a Cuba sexan consideradas fundamentais. O novo florecer da Guerra Fría que estamos a ver, produto da agudización das contradicións de EUA Unidos con Rusia e China, así como a emerxencia de bloques económicos e políticos alternativos ao mundo unipolar, fai que Cuba sexa unha das pantasmas que se pode axitar cara ao interno para "preocupar" a certos sectores do electorado. Así, por exemplo, en decembro de 2023, El Nuevo Herald, diario ultraconservador da Florida, axitaba a ameaza dunha posíbel intromisión cubana nas eleccións estadounidenses de 2024. Isto conéctase cos rumores amplamente difundidos por esta prensa de supostas bases espías rusas e chinesas na illa. Levantar estes temores regularmente permite dotar dalgún fundamento unha política xenocida contra un país pequeno e a súa poboación. Unha política que ten máis de seis década e carece de todo fundamento xurídico, político e moral e así foi denunciado repetidamente en diversos espazos internacionais. É unha política ao servizo dunha axenda punitivista, imperialista e neocolonial.