Medio cento de ONG exixen acabar coa "obstrución" aos rescates no mar Mediterráneo

Case 2.300 persoas migrantes morreron ou desapareceron no mar Mediterráneo tratando de chegar a Europa no que levamos de ano, revelan os datos da Organización Internacional para as Migracións, nunha estatística que vai camiño de converter 2023 no exercicio con máis decesos desde 2016 na ruta migratoria máis mortífera do mundo. Todos estes falecementos eran “evitábeis”, proclamaron a segunda feira nun comunicado conxunto máis de 50 organizacións non gobernamentais, incluídas varias que desenvolven rescates de persoas migrantes como Médicos Sen Fronteiras ou SOS Méditerranée. Estas entidades denunciaron que “os Estados membros da Organización das Nacións Unidas (ONU), sobre todo Italia, están a obstruír de maneira activa os traballos de pescuda e rescate”, e reiteran en referencia ao país transalpino, gobernado pola extrema dereita, que as súas políticas provocan “máis sufrimento e máis mortes”, descartando que xeren unha diminución do número de persoas que intentan chegar a Europa, como sostén o Executivo de Roma, que ten activo un estado de emerxencia migratorio. A normativa que obstaculiza o traballo dos buques de rescate no Mediterráneo -tres están bloqueados por distintas sancións emanadas da norma- “forma parte do longo historial italiano de criminalizar e obstruír” os labores de salvamento, subliñan, remarcando que a lexislación é contraria ao dereito internacional. O decreto limita o número de rescates que pode levar a cabo cada buque, obrígaos a atracar en portos designados polas autoridades, que en moitos casos se sitúan a centos de quilómetros dos lugares de rescate, ou fórzaos a desprazarse a diferentes puntos da xeografía italiana. Tamén houbo denuncias por obrigar os barcos a cruzar áreas con condicións climatolóxicas límite. Dous dos navíos bloqueados durante 20 días infrinxiron a normativa por facer rescates de camiño aos portos asignados, e o terceiro por atracar nun porto diferente. Nese sentido, e como xa fixera con anterioridade a ONU, o medio cento de ONG reclamou á Unión Europea (UE) que impulse “corredores legais e seguros” para que as persoas migrantes non se vexan obrigadas a subirse a barcos que “non son aptos para navegar”, e instouna a intervir para que o Executivo italiano reverta as medidas. De non producirse cambios e manterse a obstrución á “asistencia humanitaria no mar, probabelmente vexamos unha drástica desaparición ou incluso a desaparición dos barcos civís de pescuda e rescate no Mediterráneo central a finais de ano”. A pesar das restricións impostas por Italia, a propia primeira ministra, Giorgia Meloni, solicitou colaboración a mediados de agosto aos buques civís de rescate perante un aumento das chegadas, contradicindo o seu discurso público, que ten no combate ás migracións como un dos seus eixos, chegando a advertir o Gabinete de extrema dereita da posibilidade da “substitución étnica” da poboación italiana. Máis aló da normativa italiana, “existe unha obriga legal moi clara sobre o deber de rescatar as persoas en perigo no mar”, ratificou Irini Papanicolopulu, profesora de Dereito Internacional na Universidade SOAS de Londres, no Reino Unido, após presentar cinco ONG unha queixa á Comisión Europea sobre estas políticas, aludindo as dúbidas sobre a súa compatibilidade coa legalidade da UE e coas obrigas dos Estados en base aos tratados internacionais. Así e todo, Bruxelas ofreceu apoio público a boa parte das reclamacións italianas ao respecto, como intensificar a cooperación económica cos países nos que embarcan as persoas migrantes en dirección a Europa, o que levou ao acordo asinado con Tunisia para que o país africano free os migrantes no seu territorio. Roma tamén logrou impor as súas exixencias no acordo inicial para a reforma do sistema de asilo na UE. Aínda así, o ministro de Empresas italiano, Adolfo Urso, sostivo que a UE “debe botarnos unha man aos italianos para xestionar mellor este fenómeno” tras a chegada de máis de 100.000 persoas ás súas costas ao longo de 2023. Catro crianzas mortas Precisamente a segunda feira volveuse pór de manifesto a situación denunciada por máis de 50 ONG, coa morte de cinco persoas que procuraban alcanzar a costa grega desde Turquía en dous incidentes separados. Catro das falecidas eran crianzas, unha de 11 meses, dúas de 8 anos e unha de 14. Un dos barcos afundiu perto da illa grega de Lesbos e no outro, nas proximidades de Samos, as persoas migrantes botáronse ao mar ao ver a Garda Costeira grega, que sinalou que no primeiro caso os feitos decorreron en augas territoriais turcas, mais decidiron axudar as 18 persoas rescatadas perante a ausencia dunha operación de rescate turca. Os gardacostas gregos están baixo investigación pola súa actuación no naufraxio dun buque ateigado de persoas migrantes no mar Xónico en xuño, no que terían morto máis de 500 persoas, polo que tamén está sendo investigada a axencia da Unión Europea Frontex. Aínda así, logo de múltiples denuncias por violacións aos dereitos humanos das persoas migrantes noutros casos, ningún acusado foi condenado no país, que xa endurecera a súa política migratoria, xerando un incremento das travesías longas e máis perigosas cara a Italia. Londres estuda pór un GPS a solicitantes de asilo O Goberno británico analiza “todas as opcións” para “exercer algún control” sobre as migracións polo canal da Mancha, polo que considera preciso aumentar a “capacidade de detención”, defendeu a segunda feira a ministra de Interior, Suella Braverman, en paralelo á difusión dunha listaxe de opcións estudadas polo Executivo no que atinxe á prevención de fugas de persoas solicitantes de asilo que non fiquen recluídas en centros vixiados, que recolle a posibilidade de colocarlles dispositivos para controlar a súa situación xeográfica. No marco da aprobación de políticas restritivas contra os migrantes, que para a ONU son contrarias ao dereito internacional, Londres tratou de forzar solicitantes de asilo a instalarse na barcaza Bibby Stockholm, nunhas condicións que levaron a un intento de suicidio. Esta instalación, que tivo que ser fechada aos poucos días da súa apertura ao detectarse legionella no sistema de auga, algo que xa era coñecido cando as primeiras persoas migrantes foran enviadas, estaba pendente da volta das persoas migrantes unha vez confirmada a fin da ameaza. Porén, o equipo legal do Sindicato de Bombeiros, que a definira anteriormente como unha “potencial trampa mortal”, remitiu unha misiva a Braverman advertindo das eivas da barcaza no ámbito da seguridade contra o lume.