Hungría ratifica o ingreso de Suecia, que se converterá no 32º membro da OTAN

A Asemblea Nacional de Hungría, con dous terzos dos asentos controlados pola extrema dereita de Fidesz, a formación do primeiro ministro Viktor Orbán, aprobou hoxe a adhesión sueca á Organización do Tratado do Atlántico Norte (OTAN), case dous anos despois da solicitude inicial. O voto favorábel do lexislativo á incorporación de Suecia á alianza militar liderada polos Estados Unidos produciuse após o acordo asinado a finais da pasada semana entre Orbán e o seu homólogo sueco, o conservador Ulf Kristersson, que encabeza un Executivo sustentado no apoio parlamentario da ultradereita de Demócratas, polo que Hungría se fará con catro cazas suecos Gripen. Amais, unha vez que remate en 2026 o contrato de arrendamento de 14 avións de combate deste tipo operados por Budapest, pasarán a ser propiedade húngara. Aínda que Hungría atrasou a votación entre críticas de Orbán a Suecia por “denigrar” o seu Executivo e adoptar unha “actitude abertamente hostil”, o principal obstáculo durante o proceso de adhesión nórdico foi Turquía, nunha cuestión que en última instancia se resolveu tamén con cazas de por medio. Non obstante, nese caso tratouse de avións de combate F-16 dos Estados Unidos, que deu luz verde á súa venda pouco despois de que o Parlamento turco avalara o ingreso de Suecia en xaneiro. Así e todo, e como tamén aconteceu con Finlandia, que entrou o pasado ano na alianza militar, a adhesión de Suecia chegou logo de adaptar a súa lexislación antiterrorista ás exixencias do presidente turco, Recep Tayyip Erdogan, que reclamou perseguir organizacións soberanistas kurdas, especialmente o Partido dos Traballadores do Kurdistán (PKK), e persoas seguidoras do clérigo Fethullah Gulen, ao que acusa dun golpe de Estado en 2016, que considera terroristas. A comunidade kurda, que agrupa entre 50.000 e 100.000 persoas en Suecia, asegura que a entrada na OTAN tivo lugar “ás súas expensas”, denunciando ataques sistemáticos, informa o xornal The Guardian. “En Suecia sempre falamos de valores, dereitos humanos e seguridade para as persoas inmigrantes ou solicitantes de asilo, mais agora non están seguras”, explica Amineh Kakabaveh, ex lexisladora kurda no país, detallando que Estocolmo abandonou a defensa dos dereitos humanos “e pasouse aos países que teñen unha axenda política”. Ao tempo, o autor Kurdo Baksi subliñou que “nunca pasei por un período tan difícil en Suecia como agora”, narrando como a Policía presentou informes de seguridade sobre centenares de persoas kurdas para suspender os seus permisos de residencia, entre advertencias de que ducias de permisos foron interrompidos. Isto tamén afecta institucións kurdas, como lle ocorreu en decembro á Media Lúa Vermella Kurda en Suecia, que confirmou a súa clausura tras serlle fechada a súa conta bancaria, algo “100% relacionado” coas negociacións con Turquía para entrar na OTAN, incide un solicitante de asilo kurdo. En paralelo, hai poucas semanas fíxose público que Sveriges Radio, a emisora pública, se dispuña a acabar cos seus servizos en kurdo, ruso e tigriña, o que foi criticado por membros da comunidade kurda como un intento de acougar Erdogan. Antes, o Executivo sueco transmitiu que decidiu cancelar todo o financiamento público dirixido a organizacións pacifistas. Á vez, o proceso de adhesión sueco tamén impulsou as extradicións de persoas kurdas a Turquía. A Organización das Nacións Unidas (ONU) constatou asasinatos, torturas, desaparicións e destrución masiva de localidades no marco da ofensiva turca contra o PKK. Cando entre en vigor a adhesión de Suecia á OTAN, converterase no 16º novo membro da alianza militar desde que os Estados Unidos se comprometeron a comezos da década de 1990 coa Unión Soviética a non efectuar novas ampliacións cara ao leste. Nord Stream Un dos membros do grupo liderado por Washington, Dinamarca, trasladou hoxe que resolveu fechar a investigación polo atentado en 2022 contra os gasodutos Nord Stream, que unen Rusia con Alemaña, aducindo que “non hai motivos suficientes” para un caso penal, pese a que recoñeceu que se produciu unha sabotaxe deliberada. O 7 de febreiro fora Suecia quen acabara coas pescudas sinalando que non tiña xurisdición nun ataque que decorreu nas zonas económicas exclusivas sueca e danesa. Dmitri Peskov, voceiro do Kremlin, cualificou a decisión de “case absurda” tendo en conta que “admiten que foi unha sabotaxe”. "É obvio" que nas pescudas descubriron que “están involucrados os seus aliados máis próximos”. Só se mantén activa a investigación en Alemaña, que “non pode” chegar a unha conclusión diferente, adiantou á axencia AP Kenneth Ohlenschlager Buhl, do Real Colexio de Defensa Danés, que indicou en que Dinamarca usou case a mesma explicación que Suecia, que tiña “unha idea bastante clara de quen estaba detrás disto” pero non contaba con xurisdición “sobre aqueles cos que quería falar”. A CIA pagou 12 bases na fronteira rusa desde 2016 A Axencia Central de Intelixencia (CIA) dos Estados Unidos financiou desde 2016 a construción de 12 bases secretas do Exército ucraíno ao longo da fronteira con Rusia, máis dun lustro antes da invasión lanzada por Moscova, revelou o xornal The New York Times. Esta colaboración, que incluíu formar espías de Kíiv, tivo especial incidencia nos primeiros compases da ofensiva rusa, recoñeceu o daquela responsábel de Intelixencia interna de Ucraína, Ivan Bakanov. “Sen eles, non teríamos maneira de resistir os rusos ou de vencelos”, recalcou. Asemade, o medio fixo énfase en que xusto despois do golpe de Estado instigado por Washington e Bruxelas en Ucraína hai unha década, o responsábel de espionaxe do Goberno golpista, Valentyn Nalyvaichenko, reclamou axuda rapidamente aos Estados Unidos e ao Reino Unido. Intercambio por Navalni Ao respecto da morte nunha prisión rusa de Alexei Navalni, considerado por Occidente como o principal opositor ao presidente ruso, Vladimir Putin, o seu equipo aseverou hoxe que “en cuestión de días” ía producirse o intercambio de Navalni e dous presos estadounidenses por Vadim Krasikov, un ruso condenado a cadea perpetua en Alemaña polo asasinato dun cidadán de Xeorxia.