Xi Jinping, presidente da China, destacou a cuarta feira, no segundo é último día do terceiro foro da Franxa e a Ruta, que “os representantes empresariais concluíron acordos de cooperación por un valor total de 92.000 millóns de euros”, recolleu a axencia Tass.
Máis de 4.000 delegados de 140 Estados e 30 organismos internacionais participaron na reunión, unha década despois do comezo da iniciativa, que busca levar a cabo unha versión moderna da antiga Ruta da Seda por medio da cooperación internacional, e que levou á construción de plantas de enerxía e infraestruturas arredor do mundo, especialmente en África, Asia e América Latina.
Corredor loxístico
O mandatario chinés presentou un plan de oito puntos que detalla a seguinte fase da iniciativa para xerar un crecemento de “alta calidade” a longo prazo. En primeiro lugar, subliñou o obxectivo de desenvolver un “corredor loxístico que atravese Europa e Asia”, con base no transporte ferroviario pero incluíndo o marítimo, aéreo ou por estrada.
A proposta incide na promoción das innovacións científicas e tecnolóxicas, cunha cooperación “baseada na integridade” arredor de plataformas de cooperación multilateral que abarcarían desde o sector enerxético até a cultura ou a loita contra a corrupción.
Asemade, fixo énfase na defensa do desenvolvemento sostíbel e recalcou a necesidade de apoiar unha economía mundial aberta. Tamén comprometeu 45.000 millóns de euros para milleiros de programas de apoio a pequena escala nos 152 países afiliados á iniciativa.
Reunións bilaterais
En paralelo, o presidente da China participou en reunións bilaterais co secretario xeral da Organización das Nacións Unidas, António Guterres, o presidente ruso, Vladimir Putin, ou o arxentino, Alberto Fernández.
