Os conservadores arxentinos inician o achegamento á extrema dereita de Javier Milei

A “40 anos da súa refundación [tras a ditadura militar], a democracia arxentina atópase nunha encrucillada na que xa ingresaron outras nacións”, nun debate arredor “da capacidade do sistema para ofrecer as prestacións por cuxa carencia é invalidado”, sostivo a segunda feira en La Nación o xornalista Carlos Pagni para explicar os resultados das PASO -primarias, abertas, simultáneas e obrigatorias- que decorreron o domingo. Unha vez recontados os sufraxios “xa non se pode entender o proceso atendendo a polarización entre dous bloques que cubrían a escena”, ao ser xa catro os actores chave para o futuro do país. A progresista Unión pola Patria, a conservadora Xuntos polo Cambio, a extrema dereita da Liberdade Avanza e “unha masa de cidadáns que, na súa decisión de absterse, determinarán o destino dos outros tres xogadores”. Nas mesmas páxinas, o medio aborda o triunfo “dunha vasta e profunda protesta social”, á que atribúe a vitoria nas primarias presidenciais de Javier Milei, da Liberdade Avanza, con 30% dos votos, por diante de Xuntos polo Cambio, que superou 28% das papeletas e seleccionou a Patricia Bullrich (17%) como candidata en detrimento de Horacio Larreta (11,3%). En terceira posición ficou Unión pola Patria, un punto por baixo dos conservadores. Como prevían as enquisas, a designación como candidato recaeu no ministro de Economía Sergio Massa (21,4%), que se impuxo a Juan Grabois (5,9%). É a primeira vez que a alianza progresista, que se fixo coa Presidencia en 2019 baixo o nome de Fronte de Todos, cae da segunda praza, e os seus niveis de voto son os máis baixos nunhas primarias presidenciais desde que comezaron a desenvolverse as PASO en 2009. Só dúas listas máis superaron o 1,5% de sufraxios, o que lles permitirá participar nas eleccións do 22 de outubro, a centrista Facemos polo Noso País, con 3,8%, e a Fronte de Esquerda, que alcanzou 2,7% e nomeou a Myriam Bregman (1,9%) como candidata presidencial. No que atinxe á participación, foi a máis baixa nunhas primarias presidenciais. A abstención aumentou máis de seis puntos, até superar 30%, en comparación coas PASO de 2019. A vitoria de Milei, que foi rapidamente felicitado por forzas de ultradereita como Vox ou Irmáns de Italia, da primeira ministra Giorgia Meloni, excedeu as cifras das enquisas previas, que lle outorgaban unha importante intención de voto mais sen superar a terceira praza xeral. Voto popular Nese sentido, e logo de que antes das votacións medios progresistas advertiran da alza da intención de voto a Milei en barrios populares perante a difícil situación económica e a demanda dunha ruptura perante a situación actual, Página/12 dubida até que punto foi votado como un candidato críbel a presidente ou “con exclusividade como vehículo da rabia”, salientando o apoio a Milei “no voto da mocidade, maiormente masculino, de sectores localizados entre o fondo da pirámide ou apenas un pouco por riba”, “esa franxa á que Unión pola Patria xamais soubo falarlle”, nin das cuestións económicas nin ao respecto da seguridade, un tema que marcou as votacións do domingo despois da morte poucos días antes dunha crianza por mor dunha agresión nun roubo e dun militante progresista e fotógrafo no marco da represión da Policía de Bos Aires, a capital arxentina. A campaña para as PASO deixou un forte cruce de acusacións entre Milei e Bullrich a medida que esta última se amosaba nas sondaxes como a candidata conservadora máis probábel. Así e todo, a fin das primarias, que implica o comezo da precampaña para as xerais, provocou un novo achegamento por parte da ex ministra, que destacou “a achega” ao debate de Milei e puxo o foco en que o candidato da ultradereita “non quere que o Estado sexa unha cova da Cámpora”, unha organización progresista próxima á ex presidenta Cristina Fernández de Kirchner, que na actualidade é vicepresidenta no Goberno de Alberto Fernández. O ex presidente Mauricio Macri, en cuxo Goberno Bullrich foi ministra por última vez, incidiu en que “sumando os resultados de Javier Milei e os nosos, é enorme esta maioría de arxentinos que defendemos un cambio profundo como non existiu en décadas”. O propio Milei recalcou o “excelente vínculo” que ten con Macri, mais descartou polo de agora un acordo con Xuntos polo Cambio aludindo a “elementos dentro das súas estruturas” que definiu como “socialistas con boas maneiras”. En paralelo, subliñou que coas súas propostas non terá ningún problema para pactar co Fondo Monetario Internacional, afirmando que programan “un axuste fiscal moito máis profundo”, tras facerse pública a decisión do Banco Central de proceder a unha redución do valor do peso de 22%. Pola súa parte, Massa asegurou que teñen “60 días para gañar a aqueles que convocaron desde o odio”, facendo un chamamento a construír “unha nova maioría” na liña da “transversalidade” impulsada polo defunto presidente Néstor Kirchner, ratificando que a forza progresista vai “pelexar até o último minuto”. Nesa liña, varios dirixentes progresistas comunicaron a Télam que contan con posibilidades de “reverter o resultado” en outubro. De feito, foron os progresistas os que se impuxeron nas primarias presidenciais de 2015 con máis de 14 puntos de vantaxe sobre Macri, que rematou por facerse co poder na segunda volta das eleccións presidenciais.