A axuda a Ucraína está no nivel máis baixo desde o comezo da invasión rusa

Desde o comezo da invasión rusa o 24 de febreiro de 2022, os países membros ou da contorna da Organización do Tratado do Atlántico Norte (OTAN) comprometéronse a entregar a Ucraína 233.930 millóns de euros, revela o informe do Kiel Institute difundido hoxe, que abarca até o 31 de outubro. Esta cifra é case cinco veces a que requiriu a Organización das Nacións Unidas (ONU) para cubrir os gastos de axuda humanitaria en 2023, e 35 veces o gasto anual estimado para acabar coa fame no mundo. Dese total, máis de 90.000 millóns de euros foron en armamento, case 16.000 en axuda humanitaria e 125.000 en compromisos financeiros, nunha listaxe que encabeza a Unión Europea, con 77.000 millóns, seguida dos Estados Unidos, con 71.000, porén, Washington lidera os envíos de armas, moi por diante de Alemaña e do Reino Unido. A pesar do volume destas cifras, as estatísticas apuntan que entre agosto e outubro produciuse un descenso dos compromisos de 87% en relación a ese mesmo período de 2022, e este trimestre foi no que menos anuncios se produciron desde a invasión rusa, sumando pouco máis de 2.000 millóns. Desde febreiro de 2022 en ningún mes se efectuaron menos compromisos que en agosto, setembro e outubro. Isto responde a “unha actitude máis vacilante dos doantes” que leva a que Ucraína “dependa cada vez máis duns poucos doantes principais que seguen a brindar un apoio substancial, como Alemaña, os Estados Unidos ou os países nórdicos”, explica o xefe do equipo do Kiel Institute encargado do seguimento da axuda a Ucraína, Christoph Trebesch. Asemade, e tendo en conta a “incerteza sobre unha maior axuda estadounidense, a Ucraína só lle queda agardar que a UE aprobe finalmente o seu longamente anunciado paquete de apoio de 50.000 millóns”, admitindo que “un novo atraso reforzaría claramente a posición de [o presidente ruso Vladimir] Putin”. No que atinxe a este paquete da UE para o período 2024-2027, hai múltiples desacordos sobre como financialo, e Bruxelas trasladou que apenas entregará un terzo do millón de municións prometidas a Kíiv. Xa a respecto da axuda estadounidense, no Senado -no que o Partido Demócrata do presidente Joe Biden ten unha maioría moi axustada- a proposta do mandatario dun proxecto de lei con 56.000 millóns de euros para Ucraína non obtivo suficientes votos, nun documento que tamén implicaba máis de 13.000 millóns de euros para Israel e fondos para Taiwán e o control fronteirizo. Precisamente detrás deste último punto está a negativa do Partido Republicano a avalar a proposición, pois exixe medidas máis estritas para reducir a entrada de persoas migrantes no país. A OTAN, consciente de que Ucraína tampouco gañará a guerra en 2024 Antes da votación, o xefe de Gabinete do presidente ucraíno Volodimir Zelenski, Andriy Yermak, incidiu en que aprazar a axuda xeraría un “gran risco” de que Ucraína perda a guerra fronte Rusia. Ucraína estima que en 2024 o déficit do seu orzamento será de 40.000 millóns de euros, e a comezos desta semana a Casa Branca alertou que esgotou practicamente todos os fondos dos que dispoñía para envíos a Kíiv. Entrementres, Biden aseverou que “se Putin captura Ucraína, non se deterá”, defendendo que provocará “algo que non estamos a buscar”, como ver “tropas estadounidenses combatendo coas tropas rusas”. “Lamentamos moito que os dirixentes estadounidenses continúen co seu costume de usar Rusia como unha ferramenta nos seus asuntos internos” co fin “de manipular” para “seguir queimando o diñeiro dos contribuíntes no forno da guerra ucraína”, respondeu o voceiro do Kremlin, Dmitri Peskov. O certo é que con anterioridade ao comezo en xuño da contraofensiva militar ucraína, Zelenski sinalara que era consciente de que o fluxo de axuda dependía da evolución no campo de batalla. Medio ano despois, e tras asumir a OTAN o fracaso da operación de Kíiv, constátase a diminución na axuda. O diario Politico detallara que nestas condicións medran as posibilidades de que a presión sobre Zelenski para resolver a disputa por vías diplomáticas aumente, logo de que a alianza militar liderada polos Estados Unidos freara un acordo para acabar co conflito nos primeiros compases da invasión. Von der Leyen advirte da "obriga" dos Estados de brindar armamento a Ucraína Ao tempo que o líder ucraíno responsabiliza a agresión israelí contra Palestina da baixada dos compromisos -“atención é igual a axuda”, resolveu-, a súa figura é cada vez máis cuestionada, primeiro tras o choque co comandante en Xefe das Forzas Armadas ucraínas, Valeri Zaluzhni, ao que desacreditou por confesar de forma implícita o fracaso da contraofensiva, e agora polo alcalde de Kíiv, Vitali Klichko, que o acusou de “autocrático” e de “mentir ao noso pobo e aos nosos aliados”. Ucraína tiña que desenvolver comicios parlamentarios este ano e presidenciais en marzo de 2024, non obstante, todo indica que as eleccións serán adiadas. Onde si decorrerán é en Rusia. A Cámara Alta deu luz verde a unha resolución que convoca as votacións presidenciais para o 17 de marzo do próximo ano. Israel, á cabeza da axuda militar dos EUA Os datos da Administración estadounidense confirman que Israel é o Estado ao que enviaron máis axuda de carácter militar (a meirande parte dela en armamento) desde a Segunda Guerra Mundial, até 120.000 millóns de euros, proporcionándolle acceso “ao equipo militar máis avanzado” de Washington, informa o portal Axios, que debulla que a cambio o país americano ten “un aliado militar estratéxico en Oriente Medio”. Entre 1950 e 2020, 80% das importacións de armas israelís procederon dos EUA, moi por riba das vendas de Alemaña, Francia ou o Reino Unido. Desde 2016, os sionistas reciben 3.500 millóns de euros anuais de Washington en axuda militar, unha cifra que alcanza unha quinta parte do seu orzamento de Defensa malia que o seu gasto militar é moi superior ao dos países da rexión, máis do dobre que Turquía e catro veces o de Irán. A ONU intenta frear unha agresión militar que pode ser "irreversíbel" para Palestina e a paz na rexión Estas axudas permitiron o desenvolvemento da industria militar israelí, cuxas armas e equipamento son probados nas reiteradas incursións e invasións dos territorios palestinos, así como na represión para manter o réxime de apartheid instalado para favorecer as persoas de relixión xudía. Todo isto levou Israel a ser o décimo exportador de armamento pesado do mundo, recollen os estudos do Instituto Internacional para a Investigación da Paz de Estocolmo. Israel, un país militarizado Aínda que o gasto militar en relación ao produto interior bruto de Israel alcanza 4,5%, máis do dobre do obxectivo neste sentido da OTAN, a agresión militar contra Palestina está sostida polo apoio estadounidense. Desde o 7 de outubro, Washington remitiu 57.000 proxectís de artillaría e 15.000 bombas, entre elas 100 dunha tonelada, segundo transmitiron funcionarios dos Estados Unidos de América ao xornal The Wall Street Journal.