Aumento da violencia en Cisxordania e Xerusalén Leste

Desde o inicio da guerra o 7 de outubro na Faixa de Gaza, os palestinos e palestinas dos territorios ocupados de Xerusalén Leste e Cisxordania son vítimas dun incremento exponencial da violencia por parte das forzas da ocupación israelís e dos colonos. No marco do proxecto colonizador de expansión de Israel, as operacións militares sucédense de norte a sur, con 260 palestinos asasinados e máis de 3480 arrestados. Segundo o Ministerio de Saúde Palestino, a cifra de palestinos asasinados polo exército israelí e polos colonos desde o 7 de outubro superou a cifra total de palestinos que perderon a vida en 2022 a mans da ocupación israelí. Máis operacións militares Se ben ao longo de todo 2023 Xenín e Nablus foron as áreas máis afectadas polas incursións israelís, durante os dous últimos meses en numerosas cidades e vilas de Cisxordania tiveron lugar operacións a grande escala, máis longas e violentas, tanto de noite coma a plena luz do día. O uso de drons con munición volveuse habitual, así como a utilización de escavadoras para arrasar rúas e estradas enteiras. Ademais de atacar a poboación civil baixo a escusa de ter como obxectivo real a persecución de membros da resistencia propalestina, hospitais e persoal médico, así como mesquitas, tamén son albo dos ataques da ocupación. O 23 de novembro, no campo de refuxiados de Balata (Nablus), o Exército israelí detivo os equipos médicos de varias ambulancias, confiscando os seus teléfonos e as chaves das ambulancias, para impedir que os feridos durante a incursión militar fosen asistidos. O 28 de novembro, na cidade de Xenín, o Exército sionista bloqueou a entrada dos tres hospitais principais da cidade, forzou parte do persoal sanitario a abandonar os hospitais e arrestou a un ferido que estaba sendo transportado nunha ambulancia. Na madrugada do 6 de decembro producíronse varias operacións en diferentes puntos do mapa palestino, unha situación habitual desde outubro. O campo de refuxiados de Xenín e o de Dheisheh (Belén) sufriron invasións do Exército. Na cidade de Tubas, onde se produciron confrontacións entre a resistencia palestina e os miliares sionistas, dous mozos palestinos, Abdulrahman Odeh e Muath Zahran, foron asasinados por bala real. Ademais de matar 260 palestinos, as forzas da ocupación israelí e os colonos feriron máis de 3.200 persoas desde outubro. Máis arrestos e degradación nas prisións Israel está a levar a cabo unha campaña de arrestos masiva en Cisxordania (Xerusalén Leste tamén). A noite do 3 de decembro foi especialmente violenta, con ataques do exército en Qalqylya, Xenín, Salfit, Hebrón, Belén e Xericó e un total de 60 arrestos, 45 deles só na área metropolitana de Hebrón. Os estudantes universitarios están a ser especialmente perseguidos. Desde o 7 de outubro 40 estudantes da Universidade de Birzeit foron arrestados. Alén de arrestar a poboación palestina na noite ou de madrugada durante incursións militares, a policía e as forzas da ocupación practican outro tipo de arrestos desde o 7 de outubro. Na cidade de Xerusalén, por exemplo, a policía para de forma aleatoria na rúa persoas palestinas e accede ao contido dos seus teléfonos para ver que tipo de publicacións comparten nas redes sociais. Varias persoas foron arrestadas por publicar imaxes ou mensaxes en contra do xenocidio en Gaza. En Cisxordania, nos checkpoints espallados polas estradas, tamén se repetiron escenas similares nos últimos dous meses. Este ano é o máis sanguinario desde a Segunda Intifada para Cisxordania e evidencia as intencións do Estado de Israel A vida nas prisións israelís para os prisioneiros palestinos degradouse de forma considerable desde o inicio da mal chamada Guerra Hamas-Israel. As condicións inhumanas ás que están sendo sometidos fixéronse públicas a través dos testemuños dos prisioneiros que foron liberados durante o alto o fogo: comida e auga racionadas, ataques con gas pementa, limitación do uso do baño a 30 minutos ao día… Tamén son privados de se comunicar coas súas familias e nalgúns casos, algúns presos son levados a células de illamento. As ameazas e diferentes formas de tortura física e psicolóxica repítense en tódalas prisións. Algunhas presas foron ameazadas con seren violadas e seren enviadas xunto coas súas familias a Gaza. No mes de novembro, o Parlamento israelí comezou as primeiras lecturas sobre o novo proxecto de lei proposto polo Ministro de Seguridade Nacional, Itamar Ben Gvir, quen pretende legalizar a condena de morte para presos palestinos. Este ano é o máis sanguinario desde a Segunda Intifada para os territorios ocupados de Cisxordania e evidencia as intencións do Estado de Israel: continuar coa colonización de Palestina perseguindo e eliminando á súa poboación indíxena.