63 palestinos asasinados en 2023

*Nas últimas horas o total de palestinos asasinados ascendeu a 64. Onte, 1 de marzo, o mozo Mahmoud Hamdan (22 anos) foi asasinado durante unha nova redada militar no campo de refuxiados de Aqbat Jabar (Xericó). No ano 2022, produciuse unha forte escalada da violencia en Palestina, co maior número de vítimas mortais desde 2006. En Xerusalén Leste, Cisxordania e Gaza foron asasinados 224 palestinos e palestinas, dos cales 53 eran crianzas. A Faixa de Gaza sufriu un importante ataque en agosto: a Operación Amencer, na que houbo 49 mártires. Cun novo goberno israelí de extrema dereita inaugurado en decembro e liderado por Netanyahu, o ano 2023 comezou marcado pola violencia e na liña de pensamento do ministro de Seguridade Nacional Ben Gvir, para quen as violacións dos dereitos humanos cometidas polas forzas israelís constitúen un acto heroico. Nos primeiros dous meses do ano, 63 palestinos foron vítimas da ocupación israelí: 57 a mans do exército, 5 por ataques de colonos e 1 tras serlle denegada a asistencia médica na prisión. Do total, 13 eran menores de idade de entre 14 e 17 anos. Violencia militar: política de "tiro fácil" e impunidade As incursións militares, que aumentaron desde marzo de 2022, son unha constante nas vidas palestinas, sendo Nablus e Xinín as rexións máis castigadas. O 2 de xaneiro, Mohammad Hoshiyeh e Fuad Abed, de 22 e 17 anos, morreron polas balas recibidas durante a primeira redada do ano, en Kofr Dan (Xinín). As forzas israelís asaltan de forma sistemática aldeas, cidades e campos de refuxiados a plena luz do día e de noite, xustificando que se trata de operacións para perseguir membros da resistencia palestina (mocidade miliciana acusada de terrorismo por combater o apartheid israelí). Durante as redadas, ademais de producirse arrestos, o exército dinamita casas e ataca con munición real e gas lacrimóxeno a poboación civil, xornalistas e persoal sanitario. En Cisxordania, o inicio do 2023 comezou con tres violentos masacres sen precedentes desde a Segunda Intifada. O 26 de xaneiro o campo de refuxiados de Xinín viviu un asedio que acabou coa vida de 10 palestinos e palestinas. Unha das vítimas, Omar Saadi (24 anos), morreu tres días máis tarde debido ás feridas por balas vivas. O 6 de febreiro produciuse unha segunda matanza no campo de Aqbat Jabr (Xericó), con 5 mártires. O último masacre tivo lugar o 22 de febreiro na cidade vella de Nablus, con 10 asasinatos nun só día e unha persoa que faleceu posteriormente por inhalación de gas (Anan Onab, 61 anos). Os soldados israelís actúan baixo unha política de "tiro fácil" que permite neutralizar calquera persoa palestina sen seren investigados A violencia militar adopta outras formas, pois os soldados israelís actúan baixo unha política de "tiro fácil" que lles permite neutralizar calquera persoa palestina sen seren investigados. As mentiras coas que adoitan xustificar os seus crimes repítense nos comunicados oficiais. Ahmed Kahla (45 anos) foi asasinado con munición real diante do seu fillo cando foron parados de camiño ao traballo nun checkpoint móbil entre Ein Yabrud e Silwad. Os vídeos desmentiron as diferentes versións das forzas israelís acusando a Ahmed de intentar atacar os soldados. Aref Lahlouh (21) recibiu un disparo diante da súa nai e do seu irmán nun checkpoint en Qalqilya. O exército alegou que levaba un coitelo. Violencia colona: alianza entre colonos e militares Armados e baixo a protección do exército, os colonos israelís que viven nos asentamentos ilegais espallados por toda Cisxordania atacan a poboación palestina e asaltan aldeas e vilas impunemente. En xaneiro, houbo tres mártires a mans de colonos en Hebrón, Kofr Nama e Qalqilya. No mes de febreiro, en Qarawat Bani Hassan, Mothqal Rayan (27 anos) morreu desangrado ante o ollar dun grupo de colonos e militares despois de recibir un balazo. A última vítima da brutalidade colona é Sameh Aqtash (37), asasinado en Zatara o 26 de febreiro, nunha xornada de extrema violencia por parte dos colonos en toda Cisxordania. Neste día numerosos grupos de colonos asaltaron vilas e estradas, creando un clima de terror. Na vila de Hawara, máis de 200 colonos atacaron a poboación palestina durante a noite: queimaron 100 vehículos, 35 casas completamente e 40 parcialmente, e provocaron decenas de feridos. Nas redes, circulan vídeos de colonos celebrando a agresión de Hawara. Zvika Vogel, presidente do Comité de Seguridade Nacional, felicitou as accións dos colonos polo seu "fermoso resultado". Os días de folga xeral e de loito oficial son cada vez máis habituais en Palestina, con cifras de asasinatos que non deixan de aumentar e masacres que se suceden. Os muros das rúas, case a diario en xaneiro e febreiro, fóronse cubrindo coas fotografías de cada novo mártir, sen que os seus asasinos sexan investigados e condenados.