O pleno do Concello de Vigo rexeitou a proposta que o BNG de derrubar a cruz do Castro, cabalo de batalla desde hai anos do movemento asociativo de recuperación da memoria histórica na cidade.O grupo nacionalista esixía o cumprimento da Lei da Memoria Histórica que contempla a eliminación dos símbolos franquistas que, en Vigo, teñen na coñecida como cruz dos caídos o seu maior emblema. A cruz continuará presidindo o Castro, xusto fronte ao edificio municipal no que a abstención do PSOE e a negativa do PP permitían que o elocuente símbolo continúe a homenaxear aos vencedores no espazo privilexiado dos paseos do franquismo.
“Todas estas reivindicacións son unha cuestión de xustiza, que nos ten que facer asumir a nosa historia” sinalou Iolanda Veloso
Os doce metros de altura da cruz situada no popular monte do Castro sitúan o punto cero da represión en Vigo, o lugar dos asasinatos franquistas, e o seu derrube é un dos principais retos de entidades como a Asociación Viguesa pola Memoria Histórica do 36 que desde hai anos teñen na desaparición deste monumento á exaltación do fascismo un dos principais retos das súas reivindicacións. En especial, a posición do PSOE e do alcalde Abel Caballero está a crear grande malestar en descendentes das vítimas da represión que continúan a protagonizar mobilizacións no Castro esixindo a súa retirada. Acusan a Abel Caballero e ao grupo socialista no concello de desatender as indicacións da Lei da Memoria Histórica, aprobada no goberno de José Luís Rodríguez Zapatero e piden ao PSOE galego que aclare a súa posición con respecto ao tema, agora na mesa do novo secretario xeral do PSOE galego, Gómez Besteiro.
A cruz foi inaugurada por Franco en 1961, promovida pola Falange, e non conta con ningún tipo de protección patrimonial como ben artístico. Tanto PP como PSOE botaron man dun acordo municipal tomado en 1981 no que se aprobara que a cruz representaba a todos os caídos para xustificar a posición que unha vez máis impide o seu derrube e perpetúa na cidade o maior símbolo de ostentación da represión de Franco.
A moción do BNG que foi debatida no pleno reclamaba tamén a “revisión exhaustiva” dos nomes do rueiro de Vigo co fin de eliminar o recoñecemento de personaxes que participaron na represión e no réxime franquista e mudalo por persoas que defenderon a liberdade e a democracia.
“Todas estas reivindicacións son unha cuestión de xustiza, que nos ten que facer asumir a nosa historia” sinalou a voceira nacionalista Iolanda Veloso, arredor dunha iniciativa que recollía o apoio ao xuízo que ese desenvolve na Arxentina contra os delitos de xenocidio da ditadura franquista e a colocación dun panel explicativo próximo aos restos do capitán Carreró no que se indentificara como criminal fascista.