Galiza

A Operación Zeta pon o foco en Beatriz Mato

O úLTIMO MOVIMENTO DA XUíZA APUNTA A UNHA EVENTUAL IMPUTACIóN DA CONSELLEIRA

A Operación Zeta pon o foco en Beatriz Mato

Se unha xuíz se dirixe a un goberno para saber se unha conselleira fai parte del, é que estamos ante a máis que probábel imputación desa persoa. No mínimo iso é o que afirman as fontes xurídicas consultadas por Sermos Galiza. A xuíza tamén pon baixo sospeita os negocios de Pachi Lucas, o amigo íntimo de Feijóo, e pide información á unidade de delincuencia económica da policía.

Beatriz Mato [Imaxe Xunta]
photo_camera Beatriz Mato e Díaz López [Imaxe Xunta]

 

O Xulgado de Instrución número 6 da Coruña emitiu este 23 de febreiro unha providencia en relación á operación Zeta, a trama presuntamente corrupta arredor dos cursos de formación. A xuíza interésase por Beatriz Mato e tamén por Pachi Lucas, amigo íntimo de Feijóo e suposto "conseguidor" da rede que tería urdido o empresario Gerardo Crespo.

Na providencia, á que tivo acceso Sermos Galiza, e que foi notificada o 2 de marzo, a xuíza María Jesús García García ordena que se remita oficio á Xunta de Galiza "a fin de que certifiquen se Beatriz Mato Otero e Ana María Díaz López" ocupan cargo algún ou, no seu defeito, o ocuparon entre os anos "2008 e 2012, con indicación da toma de posesión e cesamento".

Beatriz Mato é a conselleira de Traballo e Benestar e Ana María Díaz López é a directora xeral de Emprego e Formación.

A Operación Zeta é presuntamente unha trama que obtiña fondos públicos a cambio en teoría da realización de cursos de formación, que ou ben non se impartían ou ben se facían de forma irregular.

Segundo fontes da investigación, a rede, que presuntamente dirixía o empresario coruñés Gerardo Crespo, facturou até 20 millóns de euros de 2008 a 2012 (15 millóns da Xunta de Galiza e 5 da Administración central). Gerardo Crespo aínda está pendente de ir ao xulgado a emprestar declaración.

Na eventualidade de aprezar finalmente indicios de delito, a xuíza daría traslado do asunto ao Tribunal Superior de Xustiza de Galiza, sendo que Bea Mato é aforada

A xuíza quer agora ter toda a información sobre as "subvencións e axudas concedidas durante o período 2008-2012", para o que demanda que se lle remita "certificación coa referencia de cada subvención concedida, departamento concedente, autoridade ou funcionario concedente da subvención e o responsábel do seguimento e inspección da subvención unha vez concedida".

Fontes xurídicas consultadas por Sermos Galiza apuntan a que a aparición dos nomes de Beatriz Mato e Ana María Díaz López nesta providencia podería ser o paso previo para a súa imputación.

A xuíza estaría recollendo información sobre estas persoas. No caso da conselleira, e sendo que é aforada, na eventualidade de aprezar finalmente indicios de delito daría traslado do asunto ao Tribunal Superior de Xustiza de Galiza, a instancia xudicial competente para imputar a integrante do goberno Feijóo.

Na hipótese máis favorábel para Mato e Díaz López, a xuíza só estaría interesada en as chamar como testemuñas.

A maxistrada tamén quer saber saber se Francisco Ramón Lucas Blanco ocupa ou ocupou cargo público algún entre 2008 e 2012, e para iso remite oficio ao Ministerio de Administracións Públicas e á Xunta da Galiza.

A xuíza pide á Unidade Central de Delincuencia Económica e Social da Policía que informe sobre as empresas que puidese ter ao seu nome Pachi Lucas

Francisco Ramón Lucas Blanco é un empresario madrileño máis coñecido como Pachi Lucas e, segundo fontes da investigación, era o conseguidor da trama orquestrada por Gerardo Crespo, isto é, a persoa que conseguía contratos das Administracións públicas dada a súa cercanía a persoas relevantes do Partido Popular, entre elas sinaladamente Alberto Núñez Feijóo, do que é amigo íntimo.

Gerardo Crespo ten declarado que até agora Pachi Lucas non ten sido imputado polo vínculo que o une a Feijóo.

Segundo as afirmacións de Crespo, o conseguidor tería conectado a trama coas máis altas instancias do PP, até o ponto de a colocar a un paso de entrar no despacho de Rajoy na Moncloa.

Sobre Pachi Lucas, a xuíza dá un paso máis e pide que se remita oficio á Udef, a Unidade Central de Delincuencia Económica e Social da Policía, "a fin de que informe sobre as empresas que puidese ter ao seu nome Francisco Ramón Lucas Blanco".

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

Máis en Galiza
comentarios