GpS invoca o legado da Asemblea de Lugo de 1918
Coincidindo coa conmemoración do 95 aniversario da Asemblea nacionalista de Lugo (1918), a iniciativa social Galiza pola Soberanía volve á cidade amurallada para proclamar o dereito de Galiza a un Estado de seu plenamente soberano. O acto terá lugar este sábado 16 ás 12.00h no Pazo de San Marcos.
GpS organiza un acto público para lembrar aquela xuntaza, mais tamén para “testemuñar a forza do nacionalismo” e “consolidar”, din, “nestes cinco anos que restan para o cumprimento do centenario” a data do 18 de novembro “como unha data do soberanismo, en positivo”, explica Teresa Moure desde a Coordenadora nacional da GpS, e ir “pondo en valor” un almanaque de festividades propias, asegura.
Asemade, sinala, “imos a Lugo” para rachar “coa fenda entre o occidente e o oriente” que existe na Galiza e que en non poucas ocasións leva a concentrar os actos do nacionalismo galego nas cidades do eixo atlántico en detrimento do interior –e do rural-- do país.
Discurso político
A que será a terceira acción pública de Galiza pola Soberanía –após a presentación desenvolvida en Compostela o pasado 20 de xullo e das concentracións simultáneas levadas a cabo o 12 de outubro-- visa divulgar os contidos básicos do "discurso político". E será en tres planos. Tres planos, tres discursos. Tres focaxes da soberanía, nun acto que terá como cenario o emblemático Pazo de San Marcos.
Así, a economista Mar Pérez Fra explicará desde unha perspectiva económica “as vantaxes reais” que ten “para toda a poboación” unha Galiza soberana, adianta Teresa Moure en conversa con Sermos Galiza. Pola súa banda, o xurista Héitor López de Castro afondará no “dereito dos pobos a se autodeterminaren”, un dereito recollido polo ordenamento xurídico internacional como “universal” e “inalienábel”. Finalmente, a propia Teresa Moure intervirá en nome da Coordinadora nacional da GpS e abordará “a realidade da nosa nación”, sinala, “en termos culturais”.
Asemade, o acto contará cunha proxección audiovisual en que se recollen “as actividades que levamos feito” até o de agora, indica Teresa Moure, e unha actuación musical a cargo do grupo Habelas Hainas. Aliás, explica Moure, a Asemblea Nacional Catalana enviou folgos á iniciativa Galiza pola Soberanía após saber que non podería tomar parte do acto –ao que fora inicialmente convidada-- por razóns de axenda. Tamén así, e aproveitando os actos que algunhas das asociacións culturais de Lugo veñen desenvolvendo anualmente por estas datas, terá lugar unha ofrenda florar perante o Hotel Méndez Núñez en conmemoración daquela primeira asemblea nacionalista que hoxe lembra unha placa face o emblemático hotel.
“Queremos mudalo todo”
Desde aquel tempo, lembra Teresa Moure, “mudaron moitas cousas” e “sería precisa unha análise de fondo” arredor dos artigos que compoñen o manifesto aprobado polos asistentes á asemblea en 1918. Porén, salienta, “había ideas moi libertarias” afirma, como a defensa “da participación cidadá nos concellos” ou a loita pola igualdade de dereitos para as mulleres recollida no capítulo III. Se ben, matiza Moure, “non había mulleres convocadas” á xuntanza. O manifesto, di, tería “moitos matices” mais reflicte que “o nacionalismo galego é moi “liberador”, “moderno” e “revolucionario”, afirma.
Eis o cerne da loita de Galiza pola Soberanía, unha iniciativa social que, lembran, “non quere só unha nación soberana” senón “un estado transformador”. “Queremos mudalo todo”, sentencia.
