mércores 26/01/22

Adega convoca unha limpeza “expansiva” de praias

O pasado ano retiraron tres toneladas e media de lixo nunha acción na que participaron 700 persoas e, desta volta, Adega volve convocar unha limpeza simultánea de praias no Día Mundial dos Océanos. 

Limpeza de praias
Limpeza de praias

Para conmemorar o próximo 8 de xuño o Día Mundial dos Océanos, Adega convoca a entidades e particulares a unha nova acción contra a contaminación mariña. Tratarase dunha acción de limpeza colectiva e simultánea para a que fan un chamamento a centros de ensino, escolas e clubes de deportes relacionados co mar, asociacións e grupos de persoa a título particular que participen nesta iniciativa que busca tamén denunciar a situación das praias e contribuír a unha mellor educación ambiental. 

“A xestión dos residuos que producimos en Galicia non é axeitada, o noso lixo remata en vertedoiros ou incinerado, e outra grande parte de aquel material que xa non consideramos útil vai parar ao mar” valoran en Adega, asociación ecoloxista que manexa o dato de 7 toneladas de plástico que cada ano remata nos océanos, procedente nunha elevada porcentaxe do interior. 

Unha acción para educar

Os residuos son tamén, segundo lembran, un grave perigo para a fauna mariña que enredan en cordas ou bolsas ou mesmo inxiren plásticos que lle poden producir a morte. A cadea alimentaria, pode volver traer o plástico ás nosas casas, cando, reducido a pequenas cantidades é inxerido polos peixes que logo comemos. 

Como experiencia de educación ambiental, no que se promociona a reciclaxe fronte á produción incontrolada de desperdicios, Adega convida a partillar desta nova acción que está concibida para contribuír a un cambio na conciencia ambiental. A asociación editou tamén un manual de limpeza na que indica a necesidade de retirar os residuos a man, respectando os ecosistemas dinares e tendo conta da flora e fauna que habita nas praias. 

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Adega convoca unha limpeza “expansiva” de praias
comentarios