A Xunta perdoou en 2023 ás grandes fortunas galegas máis de 27 millóns de euros

Esta cuarta feira principiou a campaña para a declaración da renda, que se estenderá até 1 de xullo e na que miles de contribuíntes da Galiza terán que realizar as súas declaracións e pórse ao día con Facenda. A competencia sobre o IRPF está partillada en dúas metades entre o Goberno do Estado e o galego. Así, o primeiro fixa un tipo impositivo que varía en tramos en función da renda para a parte que xestiona, estabelecendo o segundo uns tipos impositivos que mudan atendendo a diferentes niveis de ingreso. A Xunta da Galiza decidiu, no marco das súas competencias, estabelecer unha bonificación de até 50% no Imposto ao Patrimonio que aplica ás fortunas en territorio galego. O Banco de España e o Ministerio de Facenda veñen de, ás portas do inicio da campaña da renda, dar a coñecer a recadación en 2023 por este imposto nas comunidades. Na Galiza foi de 84 millóns, o que representa 4,6% menos que en 2022 (cando a bonificación era de 25%). O informe Panorama da fiscalidade autonómica ou foral, un estudo elaborado anualmente polo Rexistro de Economistas Asesores Fiscais (Reaf) e polo Consello Xeral de Economistas (CXE) e que publicou a finais de marzo o relativo a 2023, incide en que en 2020 —antes de existir esas bonificacións— recadáranse na Galiza por este imposto 111,3 millóns de euros. O ano pasado, pois, ingresouse por este concepto 24% menos que daquela, 27 millóns menos para as arcas galegas. De feito, e como recolle o mencionado estudo, aqueles patrimonios de 15 millóns de euros pasaron entre 2021 e 2023 de aboar algo máis de 273.000 euros a 136.000. O Constitucional rexeita o recurso de Alfonso Rueda contra o imposto ás grandes fortunas O Panorama da fiscalidade rexistra Galiza como o terceiro territorio do Estado onde menos ten que pagar o posuidor dun patrimonio de 40 millóns de euros, só en Madrid e Andalucía pagan menos. A mesma posición ocupamos a respecto dos patrimonios de 15 millóns. A Galiza é, tamén, a cuarta comunidade onde menos teñen que desembolsar polo seu patrimonio aqueles que teñan patrimonios de 4 millóns ou 800.000 euros. Cambio tributario Porén, a Axencia Tributaria indicou esta cuarta feira que manexa unha previsión de 63 millóns de euros en ingresos no Imposto de Patrimonio na Galiza para 2024, case 10 millóns máis que en 2023. Esta forte suba da recadación neste concepto débese a que algunhas comunidades, como Madrid ou a Galiza, incorporaron cambios nas bonificacións que tiñan neste tributo para recadar elas por Patrimonio, en lugar de que eses importes se ingresasen mediante o Imposto de Solidariedade das Grandes Fortunas, que é estatal e ao que a Xunta se opuxo e denunciou. Madrid e a Xunta anunciaron que o cobrarían elas para reducilo. O Observatorio sobre o reparto dos impostos publicado recentemente pola Fundación de Estudos de Economía Aplicada (Fedea), indica que o 1% máis rico paga na Galiza menos de impostos que o 20% máis pobre. A política fiscal do Goberno galego fai que a fenda entre o que paga o 20% máis pobre e a décima parte do 1% máis rico sexa de case 4 puntos, mentres que no Estado é de 3,5. Así, na Galiza os contribuíntes máis ricos rexistran tramos impositivos de 4 puntos porcentuais por baixo que os que soporta o quintil máis pobre de fogares galego. As rebaixas fiscais do Goberno galego levan a Xunta a deixar de ingresar 1.114 millóns en dous anos Novidades e devolucións A Axencia Tributaria prevé devolver na Galiza un total de 673 millóns de euros na campaña de Renda que arrincou esta cuarta feira, 1,2% menos que no anterior exercicio. En cambio, ingresará 11,4% máis, até 898 millóns. Hai unha serie de deducións que a persoa contribuínte que resida na Galiza vai poder aplicar nesta campaña. Unha das grandes novidades é que os que teñan máis dunha crianza poderán ter deducións no IRPF. Así, pódense deducir 250 euros no caso de ter dúas, equiparándose coas familias numerosas. Ademais, unha persoa contribuínte ten dereito a deducir 10% da cantidade paga o ano anterior polo aluguer da vivenda habitual, cun límite máximo de 300 euros, aínda que pode chegar até 20% (ou 600 euros) en caso de ter dous ou máis fillos e fillas. Iso si, a contribuínte non pode ter máis de 35 anos e a suma das bases impoñíbeis non pode superar os 22.000 euros. Na Galiza hai un abano de motivos de desgravación, que pode ir desde por gastos dirixidos ao uso de novas tecnoloxías nos fogares galegos até deducións por investimento en accións de entidades que cotizan no segmento de empresas en expansión do mercado alternativo bolsista, ou ben a dedución por doazóns con finalidade en investigación e desenvolvemento científico e innovación tecnolóxica. Noutros territorios Pola contra, noutros territorios existen unha serie de deducións que na Galiza non se aplican. Por exemplo, deducións á mocidade pola súa emancipación ou ben diferentes axudas para a conciliación. Neste aspecto a Rexión de Murcia, por exemplo, ofrece deducións para nais traballadoras de até 400 euros; ou as Illes Balears, con toda unha ampla serie de deducións por conciliación (como escolas infantís, comedores ou incluso actividades extraescolares). A débeda pública galega ascende a 12.170 millóns e fecha 2023 en máximos históricos En moitos territorios hai desgravacións relacionadas co material escolar, estudos superiores e libros de texto. En Balears, por exemplo, pódese desgravar o gasto de aprendizaxe extraescolar dun idioma estranxeiro e nas Illas Canarias os gastos de estudos, desde Infantil até Bacharelato e Formación Profesional. As entidades do terceiro sector chaman a marcar na renda "o X solidario" Entidades do terceiro sector de toda a Galiza organizaron esta cuarta feira en Compostela un acto simbólico no que debuxaron na Praza da Quintana un 'X' para concienciar as persoas contribuíntes de que marquen o cadro de Actividades de Interese Social na súa declaración da renda, baixo o lema 'Equipo X Solidaria'. No acto participou, en representación das organizacións que traballan con persoas con discapacidade, o presidente do Consello Territorial da ONCE, Carlos Fernández Lamigueiro, que declarou que con esta acción preténdese pór en valor o traballo de todas as organizacións comprometidas na loita contra a pobreza, na defensa das persoas vulnerábeis, en risco de exclusión e con menos oportunidades. A presidenta da Plataforma de Organizacións de Infancia na Galiza (POIG), Mónica Viqueira, quixo lembrar que marcando o 'X Solidario' nin se paga nin se recibe menos, simplemente apóiase ás entidades que traballan polo benestar dos máis de 600.000 galegos e galegas en risco de pobreza, das familias con enfermidades e discapacidades e de mulleres vítimas de violencia de xénero, entre outras. Ademais, recalcou que grazas a que 54,9% de galegos e galegas marcaron en 2023 o 'X Solidaria', puidéronse levar a cabo 773 proxectos para apoiar máis de 146.000 persoas vulnerábeis. O director de EAPN na Galiza, Xosé Cuns, dirixiuse aos 647.628 contribuíntes que non marcaron o 'X Solidario', pedíndolles a súa axuda, coa que no canto dos 24 millóns de euros recadados, poderíanse recadar perto de 15 millóns de euros máis.