O conselleiro de Medio Rural, José González, anunciou esta sexta feira a apertura dunha liña de axudas ás explotacións gandeiras que certifiquen —perante informe veterinario— a perda de gando por mor da enfermidade hemorráxica epizoótica (EHE), a coñecida como 'Covid das vacas'. Estas indemnizacións concederanse o vindeiro ano, mais terán carácter retroactivo ao presente 2023.
Até o momento notificáronse no conxunto do país trece focos, con dez mortos. É unha doenza, lembrou o conselleiro "de baixa afectación e mortalidade", que ademais "non se transmite nin aos seres humanos nin a unha vaca que estea á beira doutra infectada", pois ten que picala un mosquito.
Os abortos e caídas da produción, fóra
Precisamente esta sexta feira a comisión 7ª do Parlamento galego aprobou a proposición non de lei do BNG encamiñada a demandar á Xunta axudas económicas para as granxas afectadas. A proposta, porén, deixou fóra as baixadas "notábeis" de produción e os abortos bovinos derivados da EHE, no marco dunha emenda do grupo popular.
