O sector cárnico da Galiza só xera 5% da produción total do Estado español

Incremento moderado da produción galega Caída do consumo nos Estados desenvolvidos Medidas para asegurar o relevo xeracional no país Necesidade de axudas por parte das Administracións Elaboración de produtos de maior valor engadido A reducida base territorial das granxas xera gran dependencia de pensos e forraxes Analistas do Foro Económico da Galiza presentaron esta quinta feira un informe sobre o estado "dun dos sectores cun importante potencial de crecemento, o da produción cárnica". O obxectivo do estudo e das numerosas propostas presentadas é mellorar a competitividade e a capacidade de xeración de valor para todos os elos da cadea. Que rendibilidade económica teñen as gandarías a pasto? No documento, os autores do traballo, José Manuel Andrade e Alfonso Ribas, recoñecen a complexidade do propósito, mais apostan pola colaboración dos diferentes actores, con intereses ás veces contraditorios mais tamén compartidos e que, por tanto, "deberían traballar cunha ollada estratéxica para mellorar o impacto económico, social e ambiental que este sector ten nos espazos rurais da Galiza e na economía agraria do país". Incremento moderado da produción galega A produción de carne a nivel mundial vén medrando de forma continuada, chegando en 2021 a un volume total de 357 millóns de toneladas. Dentro da Unión Europea (UE), o valor do gando e da carne representa 20% da produción agraria, unha cifra que acredita a importancia estratéxica deste sector na economía agraria da UE. Pola súa parte, o español é desde 2020 o principal Estado produtor comunitario de carne, seguido de Alemaña, Francia, Polonia e Italia, sendo ademais o principal produtor da UE de porcino. Xan Pouliquen: "A Xunta prioriza as axudas ás gandarías intensivas" Neste contexto, as principais autonomías produtoras do Estado son Catalunya, Aragón, Castela e León e Andalucía, achegando conxuntamente 69% da produción cárnica estatal. O país "rexistra un incremento moi moderado da produción cárnica", din os autores do estudo Mentres, a Galiza sitúase na oitava posición, representando tan só 5% da produción total, no entanto ocupa a terceira posición en canto a produción de carne de bovino e de aves. No período 2004-2022 reflíctese un aumento da produción en case todas as autonomías do Estado, especialmente nas principais produtoras. Porén, a Galiza presenta un incremento moi moderado, ao redor de 4%, alcanzando en 2020 as 422.800 toneladas. Caída do consumo nos Estados desenvolvidos Os autores do traballo advirten que un dos retos importantes aos que se enfronta o sector cárnico é a caída do consumo nos Estados desenvolvidos, "por unha cada vez maior preocupación da poboación polo medio ambiente, pola saúde e polo benestar animal". Así o indican as cifras de consumo que, no caso de Estado español, indican unha diminución continua desde 2010 a un ritmo medio interanual de 2,5%. "Outros retos aos que se debe enfrontar o sector e que actúan como limitacións da produción son o cambio climático e os factores sanitarios", explica o informe do Foro. Medidas para asegurar o relevo xeracional no país No caso da Galiza, os principais retos pasan, no eido da produción, "por garantir o relevo xeracional das explotacións, aumentar o seu tamaño e súa base territorial, así como mellorar a profesionalización". Para iso, os autores do estudo propoñen "pór en marcha os instrumentos da lei de recuperación da terra agraria da Galiza, promover o relevo e a incorporación de persoas mozas ao sector a través da posta en funcionamento do banco de explotacións, o impulso da formación, o asesoramento e a dixitalización da gandaría". No que atinxe á transformación industrial do produto, din, "cómpre aumentar o tamaño e nivel tecnolóxico das empresas, mellorar a súa capacidade loxística e de acceso a novos mercados e aumentar a súa aposta pola investigación, o desenvolvemento e a innovación (I+D+i)". Necesidade de axudas por parte das Administracións A Fruga pide a execución das axudas para explotacións de tenreira galega Neste sentido, os autores propoñen "mellorar as axudas públicas e a intensidade das mesmas para investimentos en transformación, comercialización e innovación". Tamén se aposta pola "elaboración dun plan de formación continua para a industria e a posta en marcha dunha formación profesional dual, como mecanismo para solucionar os problemas da falta de man de obra que lle afecta". Elaboración de produtos de maior valor engadido "A Galiza pode medrar no sector da carne de alta calidade", sinala o informe do Foro Económico No eido da comercialización, sinalan os autores, "é necesario reverter ou mitigar a caída do consumo e mellorar a capacidade de chegar a novos mercados en crecemento no segmento das carnes de alta calidade, no que a Galiza pode xogar un papel relevante". Para isto é preciso, afirman, "abordar unha reorientación da industria cárnica cara á elaboración de produtos que teñan maior valor engadido". Neste sentido, os investigadores recomendan no seu informe unha serie de medidas orientadas a "mellorar a percepción das persoas consumidoras e da poboación xeral sobre a produción cárnica", e outras destinadas a "garantir a sostibilidade ambiental, a sanidade animal e a seguridade alimentaria". A reducida base territorial das granxas xera gran dependencia de pensos e forraxes En canto ás características das explotacións gandeiras galegas, destaca, sinalan os investigadores, "o seu elevado número, o reducido número de cabezas ou prazas por explotación, a elevada idade media dos titulares e a escasa base territorial nas producións de carácter extensivo". Con todo, din, "a súa importancia estratéxica para o medio rural é clave, non só en termos económicos e sociais, senón tamén no eido ambiental porque xestionan algo máis de 300.000 hectáreas de superficie agraria útil". Neste sentido, coa escasa base territorial, os autores refírense á pouca cantidade de territorio que o sector cárnico emprega para fornecerse de alimento para os animais, o que xera maior dependencia de pensos ou do mercado de forraxes e a alza dos custos de produción.