A potencia eólica instalada no Estado alcanza 60% do obxectivo para 2030

A potencia de enerxía eólica instalada no Estado español ascendía a máis de 30 xigawatts (GW) ao feche de marzo deste ano, segundo recoñeceu o Goberno español nunha resposta parlamentaria da que se tivo coñecemento esta sexta feira. Esta cifra supón máis de 60% do compromiso adquirido de 50.333 MW instalados para 2030 no Plan nacional integrado de enerxía e clima (Pniec). Os 3.887 MW instalados na Galiza xeraron en 2022 un total de 9.720.273 MWh Concretamente, segundo datos actualizados esta sexta feira polo portal Red Eléctrica (REE) no Estado español, xa hai 30.227 megawatts (MW) instalados. Destes máis de 30 GW, case 4 GW están na Galiza: arredor de 13% da potencia eólica instalada no Estado está no país. Estes 3.887 MW xeraron en 2022 uns 9.720.273 MWh. O Goberno estatal tamén apunta que o valor da potencia eólica incrementouse en 7,9% con respecto do último dato oficial de 2021, cando a potencia instalada era de case 28 GW. Da mesma maneira, a cifra que dá a coñecer o Executivo de Pedro Sánchez, en resposta a unha pregunta do grupo ultraespañolista Vox, supón un incremento de case 1% se se compara co dato de 2022, cando había 29.813 MW instalados, segundo deu a coñecer a Asociación Empresarial Eólica. O proxecto de eólica mariña Breogán afectaría até 14 especies en perigo de extinción Madrid é a excepción Durante o ano pasado incorporáronse a nivel estatal 46 parques eólicos e 395 aeroxeradores, alcanzando unha cifra total de 1.345 instalacións eólicas e 22.042 aeroxeradores. A enerxía eólica, presente en todas as autonomías excepto en Madrid, xerou en 2022 25% da electricidade consumida no conxunto estatal. Castela e León encabezou o ránking de autonomías con maior potencia eólica instalada, con 6.507 MW, seguida de Aragón (4.921 MW) e Castela-A Mancha (3.949 MW). En termos de crecemento, as comunidades que máis potencia eólica instalaron en 2022 foron Castela-A Mancha, con 837 MW máis; Aragón, con 492 MW; e Castela e León, con 105 MW. Así, 13% dos municipios estatais contaba con instalacións eólicas ao remate de 2022, ocupando estas infraestruturas 0,017% da superficie do Estado. Porén, estes datos achegados polo Goberno español non teñen en conta que nestes momentos se atopan en tramitación outros 17.550 MW na Galiza, cuxa entrada en funcionamento implicaría cuadriplicar a capacidade de produción eléctrica no conxunto do país. A Xunta da Galiza tramita 7.200 MW, incluídos en 275 parques emprazados en 189 localidades galegas. A estes hai que engadir 4.023 MW cuxa aprobación depende do Goberno estatal, que ten competencia para autorizar os polígonos eólicos que superen os 50 MW de potencia. A maiores, figuran outros 6.327 MW pendentes de eólica mariña sobre as augas galegas, cunha capacidade de xeración que duplica a prevista até o 2030 polo Ministerio para a Transición Ecolóxica e o Reto Demográfico (Miteco) para todo o Estado español. O sector eólico ten a intención de instalar no Estado 7,2 GW máis en aeroxeradores até 2025, e 5 GW adicionais para 2027 –un fin que cumpriría xa só coa potencia proxectada para a Galiza–, ficando perto do obxectivo do Pniec deses 50 GW de potencia eólica instalada para 2030. 43 parques eólicos con 1.063 Mw están situados nas Reservas da Biosfera galegas Capacidade produtiva Non obstante, se ben Castela- A Mancha lidera na actualidade o ránking estatal de potencia eólica instalada, a Galiza supera todas as comunidades en produción de enerxía eólica a pesar de contar con menos muíños. Nos meses de xaneiro e febreiro de 2023 –últimos para os que REE ten datos provisionais de produción eólica na Galiza– 25% da enerxía eléctrica xerada no Estado español mediante eólica procedía da Galiza. É máis, a taxa de xeración eólica galega supera a de todas as renovábeis no Estado español. Segundo datos provisorios achegados por REE, a produción renovábel supuxo en 2022 unha porcentaxe de 42,2% da xeración enerxética do Estado, coa eólica como segunda fonte de xeración, alcanzando arredor de 22%. Os mesmos datos para a Galiza mostran unha porcentaxe de produción eólica de 43%, superior á taxa do conxunto de todas as renovábeis a nivel estatal no total do ano. A produción eólica do país compensa a baixa produtividade de rexións como Madrid Con todo, a elevada taxa de produción enerxética da Galiza é utilizada para compensar a baixa produtividade e elevada demanda enerxética de rexións como Madrid. Segundo os datos de REE, a Galiza produciu 14.523.136 MWh en xeración renovábel e coa eólica en cabeza, e 7.891.046 MWh en xeración non renovábel, fronte a unha demanda enerxética de 13.760.055 MWh. Resulta así un excedente enerxético de 8.146.694 MWh, fronte, por exemplo, a unha Comunidade de Madrid que xerou en renovábeis durante 2022 396.903 MWh, 541.311 MWh en non renovábeis, cunha demanda de 27.523.683 MWh. A Xunta avanza a aprobación de 75 parques eólicos máis A patronal do metal aposta pola eólica mariña na eurorrexión Galiza-Portugal A Asociación de Industrias do Metal e Tecnoloxías Asociadas de Galicia (Asime) participou esta sexta feira en Viana do Castelo, en Portugal, da presentación do proxecto Atlantic Offshore Wind Energy-Aowinde. Esta iniciativa, anunciada precisamente co gallo do Día Internacional dos Océanos, busca desenvolver un plan industrial que "facilite" a produción e a instalación de eólica mariña nas costas da Galiza e Portugal. Asime busca "posicionar a eurorrexión como polo de referencia internacional na eólica mariña", segundo informou esta sexta feira o seu secretario xeral, Enrique Mallón. Así, os relatores da xornada coincidiron en que a eólica mariña "representa unha grande oportunidade para a industria de Galiza e Portugal", obviando as denuncias do sector pesqueiro portugués, que indica que a instalación de eólicos supón a desaparición da fauna na súa contorna. "A costa galega non é un polígono industrial": Adega alerta da ameaza da eólica mariña no Día Mundial dos Océanos