A financeira Credit Suisse afunde en bolsa e reaviva o pánico no sector bancario

O Ibex-35 experimentou onte unha nova xornada netamente negativa ante as "turbulencias" que experimentou Credit Suisse. Após o derrube en bolsa do segundo banco suízo, a banca volveu liderar as caídas do selectivo con descensos de máis de 9%. En concreto, o Ibex-35 situábase arredor dos 8.700 puntos cara á media sesión, a pesar de que na apertura mantivérase por riba dos 9.100 enteiros. Así, ás 14.30 horas, o índice selectivo das bolsas e mercados españois cotizaba nos 8.739,90 puntos, o que supón unha caída de 4% respecto ao feche anterior. A creba de dous grandes bancos dos EUA causa "pánico" nos mercados globais A xornada de onte estivo marcada de novo polo caída dos seis bancos cotizados do Estado español. Banco Sabadell repetiu como o "farol vermello" da banca ao ser a entidade que máis caeu, descendendo 8,96%. A entidade de orixe catalán tamén foi o banco que máis afundiu após a resolución de Silicon Valley Bank (SVB), Silvergate Bank e Signature Bank nos últimos días. Por detrás de Sabadell situáronse BBVA (-7,38%), Bankinter (-6,95%), Banco Santander (-6,47%), Meliá (-6,14%), CaixaBank (-5,98%), ArcelorMittal (-5,46%), Inditex (-5,35%) e Unicaja Banco (-5,33%). Estas caídas na banca producíronse en paralelo ás turbulencias que está rexistrando a cotización do banco suízo Credit Suisse. A entidade financeira rexistrou descensos que chegaron a superar 30% esta cuarta feira despois de que o seu principal accionista, o Saudi National Bank, rexeitara na prensa anglosaxoa achegar máis capital para a entidade, xa que suporía unha participación de 10%, algo que rexeitou aludindo a motivos regulamentarios. O xigante Credit Suisse, ao bordo da quebra. Que acontece agora? Non obstante, as caídas non son exclusivas do Ibex, xa que o resto das grandes prazas europeas experimentaron unha evolución similar. O banco DAX alemán descendía 3,04% cara á media sesión, mentres que o CAC 40 francés facíao 3,53% e o FTSE MIB italiano, 3,70%. Desta maneira, o Euro Stoxx 50 descendía 3,35%, ao tempo que o FTSE 100 británico se contraía 2,45%. Os temores a unha crise financeira provocaron tamén descensos no Brent. O barril de petróleo para entrega en maio cotizaba onte en Londres en 74,71 dólares, 3,5% menos respecto do feche da terza feira. Así, o cru de referencia en Europa perdeu xa 9,75% do seu valor respecto do feche da pasada sexta feira. Posíbel recesión Expertos en investimentos apuntan a posíbeis problemas, que poderían seguir a estas xornadas turbulentas no mercado de accións. Entre eles, Pimco, a maior xestora de fondos de renda fixa do mundo, mostrouse onte "moi pesimista" ante a crise do SVB e abre a porta a que se produza unha recesión nos Estados Unidos de America (EUA). Ray Dalio, fundador do fondo Bridgewater Associates e un dos inversores máis escoitados do planeta, asegurou tamén onte que o colapso do SVB é "o canario na mina" que mostra as gretas no sistema financeiro global. Dalio asegurou que a caída do banco californiano é "un indicador primixenio dunha dinámica que terá un efecto cascada no mundo do capital risco e moito máis aló". Igualmente, Larry Fink, o presidente do fondo BlackRock, afirmou onte, na súa carta anual dirixida aos investidores da firma, que non descarta unha "crise de liquidez" após a quebra do SVB. Porén, asegurou que "aínda é cedo para medir as consecuencias", que aínda están por vir. "O seguinte afectado será o sector inmobiliario" O sociólogo e profesor Andrés Piqueras afirma a Nós Diario que o afundimento do SVB afectará ramas enteiras da economía, o que "infectará" tamén os bancos, que elevarán aínda máis o tipo de xuro tanto para prestar diñeiro como para prestar entre os propios bancos. Con esta restrición de crédito, "tamén máis bancos entrarán en problemas", sostén Piqueras. O seguinte sector en verse afectado, segundo o profesor, será probabelmente o inmobiliario. "Se non hai crédito, non se mercarán vivendas. Construtoras e inmobiliarias resentiranse excesivamente", augura. Na mesma liña, presaxia que a suba dos tipos de xuro restrinxirá o consumo e comezará a subir a mora bancaria, o que fará que máis bancos se vexan "con serios problemas". Andrés Piqueras, sociólogo: "A UE é unha construción estadounidense para a subordinación de Europa" A partir deste momento, sinala Piqueras, a crise pode saltar a todos os sectores económicos: "restrición do consumo, restrición do crédito, máis impagos e máis probabilidade de quebras empresariais". "Os Bancos, sectores e Estados menos afectados serán os que menos vencellados estean" ao capital ficticio e inventado en circulación desde 2008, "non menos de 22 billóns de dólares que insuflaron vida artificial a unha gran cantidade de empresas", afirma Piqueras. Veranse afectados en menor medida, tamén, os que máis sancións teñan, ou, o que é o mesmo, os que menos relación comercial teñan cos EUA e Europa. "Gran Bretaña, por exemplo, vai levar outro forte golpe á súa xa ficticia e especulativa economía. A economía do ladrillo española non parece tampouco que vaia quedar ben parada, unha vez máis", clarifica. Para Andrés Piqueras non haberá medidas que poidan frear os problemas que se aproximan. "A socialdemocracia light imperante hoxe en Europa non poderá sequera propor frear despidos, impagos, despexos e aumento xeneralizado da pobreza", sentencia o sociólogo. Alta volatilidade na inflación As turbulencias que xerou colapso de SVB, Silvergate Bank e Signature Bank levan a que, previsibelmente hoxe, o Banco Central Europeo (BCE) manteña a senda de subas dos tipos de xuro, unha medida coa que din, queren conter a inflación. O colapso da banca nos EUA fai caer o euríbor mais non abarata as hipotecas Neste senso, a vicepresidenta primeira e ministra española de Asuntos Económicos e Transformación Dixital, Nadia Calviño, sinalou onte, nunha interpelación urxente no Congreso, que as medidas aprobadas para facer fronte á suba dos prezos "aínda teñen percorrido" e fixo un chamamento á "colaboración e responsabilidade" do sector privado. "Non se trata dunha cuestión que haxa que abordar só desde o Goberno", afirmou Calviño, que augurou, ademais, "alta volatilidade" no comportamento da inflación durante a primeira parte do ano.