A desaceleración económica deixa Galiza lonxe do medre do PIB no resto da península

Segundo certifica o Informe de Conxuntura Socioeconómica I/2024 do Foro Económico de Galicia, a economía galega está a padecer unha desaceleración do seu crecemento. Neste sentido, o produto interior bruto (PIB) da Galiza medrou 1,8% en 2023, lonxe da evolución do PIB tanto no Estado español (2,5%) como no portugués (2,3%). Con todo, o crecemento do PIB na Galiza, aínda sendo menor ao da contorna da península Ibérica, situouse por riba da media da Unión Europea (UE) e da zona euro, en ambos os casos cunha evolución positiva de 0,4% -que se viu lastrada polo PIB de Alemaña, a principal economía da área monetaria, que experimentou unha contracción de 0,3% durante o pasado exercicio-. O documento, que foi presentado esta segunda feira en Compostela polos seus autores -Santiago Lago, Patricio Sánchez e Francisco José Armesto, ademais de Fernando González Laxe como coordinador-, amosa que o crecemento do PIB real na Galiza caracterízase por unha achega positiva da demanda externa -dun punto porcentual fronte as oito décimas da demanda interna-, o que contrasta co acontecido na economía do Estado español, cunha contribución superior da demanda interna (1,7 puntos). Desaceleración da economía galega: o PIB da Galiza aumenta 7 décimas por baixo da media do Estado Esta menor contribución explica o diferencial de crecemento respecto da economía estatal, salientando a significativa desaceleración do consumo privado, cun medre interanual de 0,5%, catro puntos porcentuais menos que no ano anterior e 1,3 puntos por baixo do aumento de 1,8% rexistrado no Estado español. O investimento contraeuse 0,7% na Galiza durante o ano anterior A desaceleración da economía galega é máis pronunciada que a da estatal tamén pola maior contracción do investimento, que diminuíu 0,7% na Galiza fronte a unha menor caída de 0,5% no conxunto do Estado. Por outra parte, no que atinxe á demanda externa, aumentaron as vendas fóra da Galiza, cun aumento de 1,5%, o que contrasta coa contracción de 0,3% que se experimentou nas importacións. Desde o punto de vista da oferta, a Galiza presenta unha importante desaceleración dos servizos, se ben este se mantivo como o sector coa taxa de crecemento interanual máis elevada, de 2,3%, aínda que oito décimas porcentuais menor que no caso do Estado español. A industria manufactureira e a construción medraron 1,7% e 0,8% respectivamente en 2023. Ademais, o sector primario contraeuse,neste caso dunha forma menos acusada que na media estatal (-0,9% e -2%, respectivamente). O crecemento do sector servizos experimentou un importante freo Baixa produtividade Un dos principais problemas da economía galega segue a ser, segundo indica o informe do Foro Económico, a baixa produtividade en relación á media estatal. Neste sentido, a fenda máis ampla rexistrouse na industria manufactureira. Por contra, o sector da construción presentou unha produtividade superior á do conxunto do Estado español. Ademais, melloraron as taxas de actividade e de emprego. Con todo, destaca o documento, a Galiza mantense entre as autonomías do Estado con menores taxas de actividade e ocupación. Así, a poboación ocupada medrou 2,3% en 2023 (grazas en boa parte á poboación estranxeira), seis décimas porcentuais por riba do dato de 2022. Pola súa parte, as afiliacións á Seguridade Social medraron 1,8% (2,1% o ano anterior) e as horas traballadas 1,6% (1,7% en 2022). No perfil dos novos empregos salientaron as mulleres e as estranxeiras non comunitarias. Así mesmo, destacou o aumento do traballo asalariado, diminuíndo, pola contra, o número de persoas titulares dunha empresa que xere postos laborais. Ademais, o desemprego afectou en maior medida ás mulleres, ás menores de 25 anos, ás estranxeiras e ás cidadás con estudos primarios. Taxa de substitución no mercado laboral galego A Galiza contabiliza menos de 18 traballadores e traballadoras menores de 25 anos por cada 100 persoas en idade de abandonar o mercado laboral, segundo os datos publicados esta segunda feira polo Instituto Galego de Estatística (IGE). En concreto, en febreiro había 17,7 traballadores e traballadoras de menos de 25 anos por cada 100 afiliados á Seguridade Social con máis de 55 anos. Galiza rexistra 18 persoas traballadoras de menos de 25 anos por cada 100 en idade de abandonar o mercado laboral Neste sentido, Vigo (18,6) e A Coruña (18,5) son as cidades galegas onde mellor taxa de substitución se rexistrou. Pola contra, en Compostela, este dato ficou en febreiro en 13,6 traballadores e traballadoras de menos de 25 anos por cada 100 de máis de 55. Mentres tanto, esta taxa alcanzou 17,8 en Ferrol, seguida de Ourense (con 16,7), de Lugo (16,2) e de Pontevedra (16). Por outra parte, en febreiro do ano 2024, por cada 100 afiliados e afiliadas á Seguridade Social menores de 40 anos, residían na Galiza 226 traballadores e traballadoras maiores desta idade. En total, contabilizáronse máis de 1,05 millóns de afiliacións á Seguridade Social na Galiza, 1,7% máis que un ano antes. Destas, 1,03 millóns correspondían a persoas con residencia nun concello galego (+1,6%). Contando o número de persoas, non de afiliacións, había en febreiro 993.219 afiliadas que residían na Galiza (+1,6%). Ademais, 5% destas afiliacións correspondéronse con actividades relacionadas coa agricultura e a pesca, 14% coa industria, 7,5% coa construción, mentres que até 73% co sector servizos. Ademais, nos últimos 12 meses (de febreiro de 2023 a febreiro de 2024) o número de persoas afiliadas á Seguridade Social aumentou nas sete grandes cidades galegas. O maior incremento experimentárono as urbes de Ferrol (2,9%) e de Lugo (2,8%) . A contratación a tempo parcial gaña máis peso no mercado laboral galego En 2023, na Galiza, salientou o maior dinamismo do emprego a tempo parcial con respecto aos traballos a tempo completo, segundo salienta o informe de conxuntura do Foro económico. Así, a ocupación a tempo parcial medrou 3,4% respecto ao ano anterior fronte ao aumento de 2,1% na ocupación a tempo completo. Uns datos que contrastan novamente co acontecido no Estado, onde a xornada a tempo completo presentou un medre de 3,2%, máis do dobre do acontecido no caso da ocupación a tempo parcial (1,5%). Menos contratos indefinidos, máis temporais e a tempo parcial: todas as cifras da desigualdade no mercado laboral Tendo en conta tan só os contratos por conta allea, en 2023 rexistrouse un aumento de 7,9% respecto ao ano anterior das persoas asalariadas a tempo parcial, fronte a unha suba de 6% no caso das asalariadas a tempo completo. Tras esta evolución, 87,2% dos contratos indefinidos son contratos a tempo completo, o que supón dúas décimas porcentuais menos que no ano anterior. Ademais, 79,2% das asalariadas a tempo parcial na Galiza no último ano eran mulleres, mentres que no emprego asalariado a tempo completo o seu peso relativo ascendeu a 43,7%. Asemade, 21% das mulleres asalariadas con contrato indefinido teñen un emprego a tempo parcial (tan só 5,1% no caso dos homes). Por outra parte, a poboación activa feminina -mulleres que teñen ou buscan activamente un emprego remunerado- medrou 1% na Galiza, menos da metade que o ano anterior (+2,1%). No caso da masculina, a poboación activa medrou 0,7%. Pola súa parte, o aumento desta variábel foi superior no Estado tanto no caso das mulleres (2,6%) como dos homes (1,6%).