O Goberno español continúa sen concretar nin garantir os fondos europeos para os principais proxectos industriais que optan aos Next Generation.
Unha actitude que fai que na Xunta e empresariado se estea pasando da preocupación ao temor a que finalmente ningunha das tres propostas principais [a factoría de Viscosa para Palas de Rei , o taller de baterías para Vigo e a planta de ánodos para A Coruña] se implante, a pesar destes meses de intensa campaña de 'propaganda' da Xunta e o Goberno estatal ao redor destas iniciativas.
1.— Dubidosa cabida nos Perte
O proxecto da planta de Viscosa de Altri para Palas de Rei non ten encaixe nas liñas de axudas recollidas dentro do programa Next Generation (os Perte) e actualmente aprobadas. E se non se está dentro dalgunha desas liñas, non se pode acceder a estes fondos.
O profesor da USC e especialista en programas comunitarios Diego Sande Veiga advertiu en Nós Diario de que Altri "unicamente tería cabida no Perte adicado á economía circular. Mais o significado da economía circular transcende o obxecto deste proxecto", polo que sería forzado que entrase nesa categoría.
No que respecta á aposta de Stellantis en Vigo, que tampouco recibiu de Calviño garantía de financiamento europeo, o que máis preocupan son os prazos, ante un calendario que vai correndo contra o reloxo. En igual situación está Showa Denko, a planta de ánodos de grafito a instalar na Coruña.
2.— Menos de un euro de cada dez
A vicepresidenta e ministra de Asuntos Económicos dixo na súa visita a Galiza que transferiu á Xunta 22 millóns destes fondos para a economía circular para que os proxectos nesta categoría poidan empezar a se desenvolver. De ter Altri encaixe finalmente nesta categoría os problemas non desaparecen: os responsábeis do proxecto para Palas de Rei apuntaron que só se instalarán na Galiza de recibir 250 millóns de euros de axudas públicas.
3.— Sen axudas directas e con créditos
Desde o Goberno español anunciaron un fondo de investimento para as comunidades do fondo europeo e ao que se podería recorrer para financiar proxectos mais xa serían vía crédito e non axudas directas. E iso non era ao que se presentaron nin optaron estes proxectos.
4.— A Xunta, de perfil
O Goberno galego cambiou o relato. Se nestes meses presentábase como garante e valedora deses proxectos; agora sitúase de perfil e pon a venda antes da ferida: responsabiliza o Estado de que estas iniciativas cheguen a bo porto.
5.— Inquietude en aumento
A ausencia dunha garantía clara sobre as axudas a estes proxectos inquieta e preocupa nos responsábeis das empresas impulsoras, como temen na patronal galega, así como en representantes políticos