Alcoa anuncia contactos para a venda da factoría: as centrais sindicais requiren máis información

Alcoa, a multinacional estadounidense do sector do aluminio, informou esta terza feira de que está a "iniciar contactos con potenciais compradores fiábeis que puidesen ter interese en adquirir as operacións" no complexo industrial de San Cibrao, no municipio de Cervo (A Mariña), á vez que propuxo unha modificación do acordo de viabilidade da planta de aluminio que asinou coa representación do persoal desta factoría. Así o expuxo na mesma xornada na que se coñeceu que a reunión da mesa de seguimento de Alcoa decorrerá o 4 de abril en Madrid, na sede do Ministerio español de Industria, despois dun atraso na súa convocatoria. Alcoa non asegura que os contactos vaian implicar que se desprenda da factoría de Cervo Para ese encontro, Alcoa puxo sobre a mesa que mantén contactos con potenciais compradores, aínda que sostén que "isto non significa que se vaia realizar unha venda, xa que calquera potencial transacción debe abordar adecuadamente cuestións clave para persoal e Alcoa", argumentou. "Este paso é simplemente un esforzo por identificar partes interesadas coas que mereza a pena ter un diálogo máis profundo", afirmou a multinacional. Opinión dos sindicatos José Antonio Zan, presidente do comité: "O comité quere coñecer todas as reunións que tivo Alcoa coas Administracións e o alcance das mesmas" Ao albor deste comunicado, o presidente do comité de empresa, José Antonio Zan (CCOO), esgrimiu que se deben realizar encontros coas Administracións previos á mesa de seguimento debido ao comunicado de Alcoa, xa que este ten "unha serie de propostas e implicacións, incluída unha posíbel venda". A respecto disto, o presidente do comité explicou que queren "coñecer todas as reunións que tivo Alcoa coas Administracións e o alcance das mesmas, así como as conclusións sacadas polas institucións públicas co fin de ter unha postura común e seguir unidos o próximo día 4 de abril". Zan tamén se queixou de que "o comunicado de Alcoa chegou nove minutos antes á secretaría [do comité de empresa] que aos traballadores, polo que cremos que é unha forma de actuar pouco seria por parte da compañía". Óscar Lara, representante da CIG: "Veremos se a busca de compradores é un esforzo real ou unha mera pose por parte da multinacional" Pola súa parte, o representante da CIG no comité de empresa, Óscar Lara, explicou a Nós Diario que "parece que Alcoa está construíndo o seu relato de cara a un proceso final do complexo industrial". Neste sentido, dubidou, "propón un esforzo negociador e unha procura de compradores que veremos se é un esforzo real ou unha mera pose". Ademais, Diego Ballesteros, de UXT, aseverou en declaracións a este xornal que "seguimos exixindo que se cumpra o acordo na sua totalidade en canto a inversións e rearranque das cubas, tal e como estivo pactado co persoal". Con respecto aos contactos con posíbeis compradores, acrecentou o sindicalista, "Alcoa ten que dar máis datos e información e ser moito mais clara que este simple comentario, posto que xa vimos no anterior proceso de venda como actuou". Jorge Ballesteros, representante de UXT: "Alcoa ten que dar máis datos e información e ser moito máis clara sobre o proceso de venda que vén de anunciar" Tamén se pronunciou ao respecto a conselleira de Economía, Industria e Innovación, María Jesús Lourenzá, que pediu que Alcoa aclare "se está examinando a posibilidade dunha venda", e, "se é así, en que prazos e con que condicións". Sobre a reunión convocada polo Goberno estatal para o 4 de abril, sinalou que "urxe tendo en conta a situación" da compañía, así como pola "escasa definición por parte da dirección da empresa sobre cal vai ser o destino da factoría". Acordo de viabilidade A multinacional avogou por modificar o acordo de viabilidade para permitir "atrasos nos investimentos, flexibilidade para completar o reinicio de cubas por encima das 32 que se están arrincando na actualidade e o acceso ao depósito de garantía do acordo se fose necesario". A produción de aluminio primario parouse en xaneiro de 2022 como resultado dun acordo coa representación do persoal en decembro de 2021. En febreiro de 2023, houbo unha mudanza do acordo polo que Alcoa reiniciaría de forma gradual a produción de aluminio primario a partir de xaneiro de 2024. Deste modo, en outubro de 2023, a compañía procedeu á paralización da fundición de aluminio que aínda funcionaba. Posteriormente, a empresa anunciou a suspensión do investimento nun forno de cocción para ánodos. Xa este ano, Alcoa comezou un proceso de rearranque tras unha reunión en xaneiro da mesa de seguimento. Ademais, o acordo estabelece a obriga de pór en marcha 32 cubas para o 1 de abril (o proceso comezou esta semana con 23 cubas en marcha) e seguir coa ampliación progresiva até alcanzar o pleno funcionamento de cara ao mes de outubro de 2025. Neste contexto, Alcoa asegurou que "continúa traballando para atopar unha solución de longo prazo ao importante desafío financeiro que enfrontan as operacións de San Cibrao". Con todo, apuntou que, aínda que algunhas condicións económicas melloraron no curto prazo, "a operación da planta segue sen ser viábel". "Prevese que as operacións continúen con perdas significativas en 2024 e 2025 e a empresa non ten os fondos suficientes para sostelas", dixo. A reunión de seguimento decorrerá o día 4 de abril Segundo informou o comité de empresa de Alcoa, a reunión de seguimento da actividade na factoría mariñá decorrerá finalmente o 4 de abril en Madrid, na sede do Ministerio español de Industria, despois de que principios deste mes fora datada para o 21 de marzo, froito das constantes peticións por parte do comité de empresa "tras tres semanas de atraso". Deste modo, o Ministerio argumentou a semana pasada "motivos inescusábeis" para suspender o encontro, que tería sido mañá. Alcoa confirmou a asistencia á reunión, mais insistiu na necesidade de mudar o acordo de viabilidade. Lourenzá sustenta que a firma ten dificultades A multinacional volveu insistir en mudar o acordo de viabilidade A conselleira de Economía, Industria e Innovación, María Jesús Lourenzá, argumentou que as medidas de "aforro e eficiencia" que está a defender Alcoa están motivadas pola "difícil situación económica" que atravesa a multinacional. Así o dixo a pesar de que a última mudanza do acordo de viabilidade foi asinada pola compañía apenas hai un ano. Neste sentido, sobre a posibilidade dun novo cambio neste pacto referendado en febreiro de 2023, a conselleira de Industria solicitou a Alcoa que "aclare" que medidas contempla "para continuar xestionando a fábrica".