Os bancos con maior presenza na Galiza gañaron 27% máis tras fechar 33% das sucursais

A s entidades financeiras con maior implantación na Galiza -Santander, Sabadell, BBVA e Abanca- fecharon máis de 33% das súas oficinas nun período de tres anos, entre o final de 2018 e o comezo de 2022, xusto antes de rematar un exercicio, o do pasado ano, no que obtiveron un aumento de beneficios conxunto de até 27,21% -eliminando impactos extraordinarios como o efecto da integración de Bankoa e Novo Banco por parte de Abanca en 2021-, en pleno proceso da crise inflacionista que afectou ao conxunto da sociedade. Abanca recorrerá o imposto aos bancos despois de gañar 40% máis en 2022 As catro entidades obtiveron en 2022 unhas ganancias conxuntas de 17.340 millóns de euros, o que supón disparar o seu beneficio 27,21% en comparación cos beneficios de 13.360 millóns de euros que obtiveron no ano anterior entre as catro empresas, sen ter en conta impactos extraordinarios de 2021, segundo as contas que durante as últimas semanas as entidades deron a coñecer ao mercado. Desta forma, a banca superou o impacto da pandemia da Covid-19 con beneficios récord nalgúns casos, e sorteou polo momento a crise de inflación que está a afectar á economía global desde hai máis dun ano. A suba de tipos de xuro por parte dos principais bancos centrais contribuíu a mellorar as marxes do sector, aínda que os principais executivos dos bancos con maior implantación de sucursais na Galiza indicaron durante a presentación das contas que o impacto positivo da alza dos tipos de xuro notarase, sobre todo, a partir deste 2023. Fechamento xeneralizado de sucursais e despidos As entidades financeiras con maior implantación na Galiza fecharon entre o comezo de 2019 e o principio de 2022 un total de 397 oficinas das 1.167 coas que estas contaban, o que supón 33% das súas sucursais, tras gañar en conxunto 27% máis. A Galiza perdeu desde 2008 até 59,6% das súas oficinas bancarias Banco Santander obtivo un beneficio atribuído récord de 9.605 millóns de euros en 2022, 18% máis en euros correntes con respecto a 2021. No que atinxe ao seu negocio no Estado español, o beneficio ordinario do ano foi de 1.560 millóns de euros, 149% máis. Unhas cifras extraordinarias que chegan despois de converterse na entidade financeira que fechou unha maior porcentaxe de sucursais na Galiza entre finais de 2018 e comezos de 2022, reducíndoas en 58,65%. Da inflación, o Banco Central Europeo e os beneficios extraordinarios Desta forma, esta firma tan só conservaba a comezos do pasado ano 153 das 370 sucursais coas que contaba. En termos de emprego, os fechamentos de oficinas traducíronse na perda de 755 postos de traballo, unha perda de 35,8% do cadro de persoal da entidade na Galiza. Pola súa parte, o Banco Sabadell fechou o exercicio 2022 cun beneficio neto atribuído de 859 millóns de euros, 62% máis que no exercicio anterior. Excluíndo a súa filial británica TSB, o beneficio é de 771 millóns de euros, 87,2% máis. Iso despois de clausurar, entre o feche de 2018 e o arranque de 2022, até 40,74% das súas sucursais na Galiza, un total de 44 das 108 coas que contaba tres anos atrás. En termos de emprego, os fechamentos significaron a perda de 104 postos de traballo, a entidade rebaixou así 22,4% o seu cadro de persoal. O grupo BBVA rexistrou un beneficio neto de 6.420 millóns de euros en 2022, o que supón un incremento de 38% respecto a un ano antes, o máis alto até a data, mentres que a súa actividade no Estado Español xerou o maior resultado atribuído dos últimos doce anos, 1.678 millóns de euros, 8,4% máis con respecto ao alcanzado en 2021, incluíndo o impacto negativo pola compra de oficinas a Merlin en 2022. No caso desta entidade bancaria, o fechamento de oficinas foi dun total de 38 das 154 sucursais coas que contaba a principio de 2019, o que supón un recorte de 24,68% das mesmas. En termos de emprego, a perda de postos de traballo foi de 221 nese período, un descenso de 23,4%. Mentres tanto, Abanca obtivo un beneficio neto de 455 millóns de euros en 2022 -eliminando o efecto da integración de Bankoa e Novo Banco en 2021-, o que supón 40,7% máis que en 2021. Os bos resultados da entidade contrastan coa evolución do número de sucursais e o tamaño do cadro de persoal de Abanca na Galiza, que fechou, até o comezo de 2022, un total de 98 das sucursais coas que contaba a finais de 2018 -incluíndo as de Caixa Geral, entidade que integrou-, o que supón unha rebaixa de oficinas de 18,3%. Ademais, Abanca reduciu nese período 402 postos de traballo (7,4%) no conxunto da empresa. Por baixo da media estatal A Galiza atópase por baixo da media estatal en oficinas bancarias por habitantes. Segundo os datos ofrecidos polo Boletín Estatístico do Banco de España para setembro de 2022, último mes con cifras, o país contaba con 3,8 sucursais de entidades de crédito por cada 100.000 habitantes, unha cifra 0,9 puntos porcentuais inferior á media estatal, situada en 4,7 sucursais por cada 100.000 habitantes. A banca fechou máis de 1.400 sucursais desde 2008 A Galiza perdeu desde 2008 até 59,6% das súas oficinas bancarias, tras o fechamento dun total de 1.513 sucursais. Desta forma, o país conta hoxe con 1.026 sucursais, en contraste coas 2.539 oficinas que existían en 2008. Abre o prazo de pago das taxas a bancos e enerxéticas As entidades bancarias e enerxéticas poderán realizar desde este sábado o primeiro pago a conta dos impostos temporais postos en marcha polo Goberno do Estado español. Por outra parte, a liquidación definitiva dos novos tributos presentarase do 1 ao 20 de setembro. A xunta afirma que o imposto á banca é "moi controvertido" O novo imposto temporal á banca gravará en 4,8% os intereses e comisións de todas as entidades que facturasen máis de 800 millóns en 2019 e o tributo afectará á actividade que as entidades desenvolvan no Estado español. Pola súa parte, o tributo enerxético gravará en 1,2% a cifra de negocio das compañías enerxéticas que facturasen máis de 1.000 millóns de euros en 2019. Exclúese do gravame os ingresos das actividades reguladas. A Xunta carga contra os impostos á banca O director xeral de Política Financeira, David Cabañó, criticou esta quinta feira que o imposto á banca impulsado polo Goberno do Estado español "non conta con todas as garantías xurídicas e económicas que debe ter un gravame desta natureza". En resposta ao deputado Ramón Fernández, do Bloque Nacionalista Galego, na Comisión de Economía do Parlamento da Galiza, David Cabañó afirmou que este imposto é "moi controvertido" e tamén "moi criticado".