17 adegas inician 'Viños das IXP da Galiza', unha entidade que pode chegar a promocionar unha produción de 208.743 kg de uva

Desde o pasado 27 de novembro as cinco Indicacións Xeográficas Protexidas (IXP) de viño galegas contan cunha asociación que defenda os seus intereses. O proxecto que agora comeza a andar leva dous anos traballándose por parte dos Grupos de Desenvolvemento Rural (GDR) Pontevedra Morrazo; Montes e Vales Orientais; Comarca de Ourense; Salnés, Ulla, Umia; Deloa; e Mariñas Betanzos. Forman parte, de inicio, 17 adegas pertencentes ás IXP Ribeiras do Morrazo, Barbanza Iria, Betanzos, Val do Miño-Ourense e Terras do Navia. O Rosal brinda polo seu viño A nova asociación nace, sumando os datos de 2022 das súas cinco IXP facilitados pola Axencia Galega de Calidade Alimentaria (Agacal), cun volume de produción de uva de 208.743 kg. e 47,3 hectáreas, tendo en conta as cifras estimadas correspondentes á de Terra do Navia. Sen contar esta última IXP, o valor económico estimado sería ese ano de 358.000 euros. Primeiro obxectivo: a promoción A presidencia da nova entidade, a adegueira da IXP Val do Miño-Ourense, Maite Maestre, explica a Nós Diario que o primeiro obxectivo será “promover e das coñecer as distintas adegas e lugares onde nos atopamos”. Lembra que non parten de cero e xa realizaron desde o ano pasado varias actividades “como foi a realización de varios túneles de cata para que a xente nos coñeza e a filosofía de traballo que temos”. Con esta idea, ademais, habilitaron unha plataforma dixital común de promoción creada a través do proxecto de cooperación. "Isto implicará unha maior difusión e comunicación de todas as IXP e de cada unha das adegas", conclúe a responsábel da entidade. Maestre, propietaria da adega Ferreiros e da iniciativa Vides singulares no municipio de Coles (comarca de Ourense), considera que a iniciativa é, ademais, “unha solución conxunta e máis rendíbel para afrontar as problemáticas comúns do sector”. Neste sentido valora que a promoción unitaria pode achegarlles unha maior oferta de produto, “máis solvente e diversificada, o que optimiza a comercialización” ademais de contar cunha maior capacidade para enfrontarse ao mercado e poder asistir a feiras ou eventos. O viño vai de festa no verán Dentro da difusión das adegas, a entidade leva meses tamén empregando o enoturismo e realizando catas dos seus produtos. No primeiro dos casos creou e deseñou cinco itinerarios enoturísticos circulares, un por zona, a partir da identificación de recursos do territorio xeoreferenciados, no que aparecen desde adegas até espazos ou recursos de interese vitícola ou enolóxico. No segundo, durante o mes de outubro organizaron catro xornadas divulgativas de viños das IXP da Galiza en catro cidades galegas (Ourense, Vigo, Lugo e A Coruña) reunido nelas máis de 700 persoas. En cada unha delas participaron expertos sumilleres da Galiza, como Alejandro e Luis Paadín ou Martiño Santos. A importancia da implicación Por parte dos GDR, o xerente responsábel do de Pontevedra Morrazo, José María Tobío, sinala a Nós Diario que a “chave” para o futuro desta entidade será fundamental “o grao de colaboración que estean dispostos a asumir todos os seus operadores”. Neste sentido, lembra que nestas IXP “hai varias velocidades e intereses, non todo os perfiles das adegas teñen o mesmo grao de orientación de cara o mercado nin os mesmo volumes de produción”. Ante esta realidade, Tobío aconsella “dar prioridade a aquelas actuacións que teñan máis interese na maioría para despois introducir outros obxectivos máis específicos”. Ademais, lembra que a asociación será unha “ferramenta útil” cando teñan que “relacionarse coas Administracións e poder captar fondos aos que, até agora, non podían acceder”. Alén diso, Tobío apunta "as facilidades que terán a partir de agora para acceder a determinadas feiras e eventos con até un 70% dos custos financiados". Ampliar superficie Outra das accións que orientará o traballo desta asociación os vindeiros meses ten como obxectivo a elaboración de estudos preliminares para desenvolver polígonos agroforestais nas IXP de viños da Galiza, que conten cun mínimo de 10 hectáreas en cada un, para permitir a posíbel ampliación da superficie cultivada. "Eu mesma non teño moitas posibilidades de medrar por non contar con terreos aptos no meu municipio, aínda que si podería telos se emprego os que están dentro da DO Ribeira Sacra", pon como exemplo a propia Maite Maestre. Estes son os problemas aos que se enfrontan os viticultores e viticultoras na vendima deste ano Un caso evidente da necesidade de contar con máis terras para viñedos é o da última indicación xeográfica protexida en crearse: a de Terra do Navia. Este Consello Regulador naceu este mesmo ano, aínda que partiu dunha iniciativa de 1993 que, nun principio, solicitaron a entrada como subzona na DO Ribeira Sacra. “Foi unha quimera”, recoñece a Nós Diario o responsábel dunha das adegas nesa zona e vicepresidente da asociación Viños da Galiza, Manuel Cancio López, “polo que decidimos pasara a ser IXP”, engade. A zona que ampara son seis parroquias do municipio da Fonsagrada, seis do de Navia e a totalidade do concello de Negueira de Muñiz. “A creación desta nova asociación coas IXP galegas será todo un revulsivo para a zona e poderá loitar contra o despoboamento que padecemos”, asegura este viticultor. En 2022 este Consello Regulador contaba con dúas adegas e este ano “hai outra e para 2024 pensa abrir unha nova, polo que as expectativas son boas”, afirma Cancio que admite que agora mesmo cos viñedos que hai na zona toda a produción que sae cada ano “absórbea o propio mercado polo que é importante incrementala se queremos manternos e medrar”.