A PREVIA | Cita chave para o Celta na estrea de Marián Mouriño na Presidencia

Os cambios, en fútbol, moitas veces motivan. É o que agarda a afección celtista, que este sábado terá unha nova oportunidade de ver en Vigo o seu equipo, desta vez contra o Granada (Balaídos, 14 horas). Será o primeiro partido da formación celeste cunha nova Presidencia, a de Marián Mouriño, que estes días xa deixou claras as súas intencións de manter a liña seguida até agora polo club mais con algunhas incógnitas, no que ten que ver coa dirección deportiva, procurando que sexa “máis presencial”, e a incorporación de novos xogadores neste vindeiro mercado de inverno. "Total confianza" en Benítez, equipo feminino e os tres 'C' do Celta: as chaves de Marián Mouriño Onte mesmo, en rolda de prensa, o adestrador do Celta, Rafa Benítez, agradeceu “que se valorara o que facemos día a día” aínda que, a diferenza doutras profesións “no fútbol dependes das túas decisións, dos teus xogadores, dos rivais e dos árbitros”. En relación ao partido desta xornada, o técnico fuxiu do termo “final” e preferiu falar de estar “nun maratón” no que “todos os partidos van ser moi importantes”. Sobre o rival, tamén en zona de descenso e con dous puntos menos que os celestes, Benítez lembrou que o Granada é un equipo que mudou recentemente de adestrador e que “apertará máis para tentar saír de aí”. Por último, o técnico celeste agradeceu que se falara da titularidade de Aspas “cando antes era sobre Douvikas, iso significa que hai competencia nos postos de arriba”. O Rácing buscará seguir arriba na clasificación En Segunda, o Rácing de Ferrol recibirá este domingo o Tenerife (A Malata, 21 horas), noutro choque esencial contra un rival que o segue na clasificación cun único punto por tras da conta que teñen os verdes. Sobre este partido falou estes días o escollido como o mellor xogador do equipo galego da anterior xornada, Josep Señé. O catalán recoñeceu que os das Canarias “teñen un grande equipo, con bos xogadores” polo que agarda o que Rácing saque este domingo “a nosa mellor versión para gañar”. Á espera de rematar 2023 cun seguinte partido fronte ao Valladolid, Josep Señé quere “terminar o ano ben, aí arriba, onde agora estamos”. Sorteo de Copa: os Reis Magos adiántanse en Lugo e Ferrol Derbi de intensidade na Primeira RFEF Na xornada 17 de Primeira RFEF, o Celta Fortuna medirá as súas forzas para seguir de líder da categoría, nesta ocasión viaxando o domingo até Madrid para xogar contra o Fuenlabrada (Estadio Fernando Torres, 16 horas). Os de Claudio Giráldez sumaron un total de 32 puntos en 16 xornadas, todo un logro contando cun filial baseado na canteira e cunha media de idade que fai pensar en posíbeis figuras para o futuro. Con todo, a fin de semana estará marcada polo derbi de este domingo entre o Arenteiro e o Dépor no Carballiño (Espiñedo, 19 horas). Os dous equipos atópanse empatados con 23 puntos e a necesidade de adiantar posicións na táboa. O adestrador branquiazul, Imanol Idiakez, explicou onte en rolda de prensa que o encontro “preparámolo ben e estamos con ganas”. Como desexo cara aos seus xogadores pide “que o rendemento se pareza ao de Barcelona ou ao que ofrecemos contra o Tenerife”. En relación á situación do seu equipo, o adestrador vasco asegurou que “se imos xornada a xornada, non creo que haxa ningunha sen algún accidente, mais agora toca o Arenteiro”. Neste sentido afirmou que, no caso do Dépor, "no momento en que no campo non cres no que fas, iso é a morte". Por ese motivo admitiu que está a "tentar convencer os mozos para que entendan que o Arenteiro é un equipo con moitísimo mérito, e que temos que ter a mesma ilusión que eles". No Carballiño, pola súa parte, confían no efecto campo e contan coa estatística desta tempada que indica que só perderon un encontro no Espiñedo. O Lugo evita a catástrofe galega na Copa do Rei Por último, o Lugo terá este sábado o seu compromiso en Catalunya contra o Cornellà (Estadi Municipal, 15 horas), un rival por baixo na clasificación da categoría. Os galegos queren deixar atrás a alegría polo calendario da Copa do Rei, que xogarán ante o Atlético de Madrid o 6 de xaneiro, e centrarse na Primeira RFEF. "O sorteo de Copa é importante para a afección, aínda que nos enfocamos no próximo partido", comentou o seu adestrador, Pedro Munitis, esta quinta feira en rolda de prensa. "Fainos moi felices poder dar á nosa xente un partido como este, cun rival da envergadura do Atlético; o equipo traballouno e meréceo", engadiu o técnico cántabro. En relación ao compromiso deste sábado, Munitis considerou que "vai ser un partido moi diferente ao xogado en Copa ante o Mirandés e ao visto no último partido en casa contra o Barcelona B". O Rácing de Ferrol debuta na Liga Genuine Entre as diferenzas salientou que terán “un terreo de xogo de dimensións máis reducidas e descoñecemos o seu estado". Sobre o rival, Munitis considerou a posibilidade de que se topen cun equipo que "pode utilizar o xogo directo". En relación á evolución do seu equipo, o técnico asegurou que a traxectoria foi "na liña do esperado, desde a confección dun equipo novo e un proceso de adaptación que nos puxo dificultades ao principio, pero fomos crecendo e mellorando cada semana".