Onte foi un día histórico no fútbol sala ferrolán. O Parrulo Ferrol e o Valdetires Ferrol asinaron un acordo de colaboración para incrementar a potenciación do fútbol sala feminino na cidade e na súa comarca. No acto deste pacto participaron Laura García e Pili Costa, responsábeis de ambos clubs.
Ambos clubs, segundo explican nun comunicado, manterán a súa independencia como entidades deportivas e traballarán xuntas a todos os niveis “para conseguir potenciar e consolidar o fútbol sala feminino desde as categorías inferiores ata sénior, garantindo a todas as xogadoras poder dispoñer dunha estrutura en todas as etapas formativas”.
Entre os obxectivos deste acordo de colaboración está a creación e consolidación da Escola de Fútbol sala Feminino do Parrulo Ferrol, creada conxuntamente coa Fundación Gadesport, para que a medio e longo prazo as xogadoras poidan ter como referencia ao primeiro equipo do Valdetires Ferrol, que actualmente milita na Segunda División e mesmo nutrilo.
Para o Valdetires Ferrol esta colaboración co Parrulo Ferrol súmase á filialidade que formalizaron nesta tempada coa ADCR Santa Mariña.
Entidades históricas do fútbol sala galego
Grazas a este acordo de colaboración asinado esta cuarta feira, unen as súas forzas dúas das entidades máis coñecidas e con máis historia no fútbol sala ferrolán e galego.
O Parrulo Ferrol fundouse en 1981 e o Valdetires Ferrol fíxoo dous anos despois, en 1983, ambas as cunha experiencia contrastada na máxima categoría e agora emprenden este camiño conxunto loitando polos mesmos obxectivos no fútbol sala feminino.
