As carreiras populares despiden o ano deportivo tamén na Galiza

Cada ano a última competición deportiva que ten lugar na Galiza é popular e está relacionada co atletismo: son as carreiras populares, conectadas dunha ou doutra maneira co San Silvestre e o 31 de decembro. Para este 2023, foron nove as carreiras que oficializaron a súa inscrición na Federación Galega de Atletismo (FGA). Todas terán lugar o último día do ano coa excepción da Carreira e andaina popular do Nadal da Rúa (Valdeorras), que organiza a XIII edición o 24 de decembro, e VIII San Silvestre Concello de Fene (Ferrolterra), que decorrerá polas súas rúas o día 30 de decembro. Ademais, co nome de San Silvestre haberá carreiras federadas o 31 de decembro en Neda (Ferrolterra) , Ourense, Castrelo do Miño (comarca do Ribeiro), Vigo, Narón (Ferrolterra) e Santiago de Compostela. Por último, e coa denominación de Carreira Fin de Ano Ares-Mugardos-Ares, esas dúas localidades de Ferrolterra. Alén das probas que notificaron a súa realización na FGA, Nós Diario tivo constancia de que terán carreiras populares este 31 de decembro Lugo (organizada polo Club Fluvial dese municipio); Noia; Rábade (comarca de Lugo), Sarria e A Coruña. Carreira internacional O carácter internacional comezou a espallarse tras a experiencia realizada en 1925 na cidade brasileira de São Paulo baseada noutra que decorría na capital de Francia, París. Máis perto da Galiza, a carreira que leva máis tempo despedindo o ano é a de Galdakao (Euskal Herria) que se realiza desde 1961. Despois, en 1964, sería o galego Antonio Sabugueiro quen iniciara a experiencia no barrio madrileño de Vallecas, onde ten lugar, aínda hoxe, a carreira máis concorrida do Estado español. O atletismo máis popular invade o territorio galego Como recoñece a Nós Diario o presidente da FGA, Iván Sanmartín, “é a data do ano con máis carreiras”, unha circunstancia que fai que cada vez “conte con máis localidades e cústanos tratar de xestionalas ao mesmo tempo”. Unha explicación que dá o responsábel federativo para este “éxito” estaría en que estas probas “son as únicas do ano nas que podes combinar a parte deportiva e a parte lúdica” nunha data importante “o mesmo día que despedimos o ano”. Ese compoñente “festivo e mesmo familiar”, que apunta Sanmartín, “fai que sexa un evento único en toda a tempada deportiva”. Outra particularidade destas carreiras é que “hai participantes que non compiten en ningunha outra proba do ano mais si asisten ás San Silvestre”, de aí “que sexan as máis multitudinarias, superando case sempre as 1.000 inscricións”. No caso galego, Sanmartín lembra que nestas carreiras populares existen “circuítos homologados para a xente que queira competir realmente e facer unha marca para despedir o ano cun rendemento xunto coas persoas que só queren participar para pasalo ben”. Colaboración federativa Os Concellos e as entidades sociais que teñan intención de organizar unha carreira popular para o 31 de decembro saben que poden contar coa colaboración da FGA. “Facilitamos a tramitación de todo tipo de permisos que se precisan nestes casos ademais de achegar servizos de arbitraxe, elaboración de regulamentos, podios, deseños de circuítos e cortes de tráfico”, explica o presidente da federación, “mesmo temos algunha, como a de Compostela, que xestionamos nós”, engade Sanmartín. As carreiras populares que se realizan o último día do ano transcenden as cidades e chegan a vilas e concellos de todo tamaño. Un exemplo é o municipio de Quiroga, que xa leva nove edicións e que só freou a pandemia da Covid-19 en 2020. As San Silvestre ou o triunfo do atletismo festivo A proba, ademais de repetir o seu carácter lúdico e deportivo, ten a súa parte solidaria. O concelleiro de deportes da localidade, Antonio Marcos Prieto, explica a Nós Diario que as persoas participantes “levan ese día en doazón alimentos que despois entregamos a entidades sen ánimo de lucro que distribúen entre a xente necesitada da comarca”. Recoñece que a proba “non é competitiva e a xente acostuma a presentarse disfrazada e hai moitas familias que se presentan coas súas fillas e cos seus fillos”. A distancia que teñen que percorrer é de catro quilómetros e para realizar o percorrido teñen en conta o trazado doutros anos. “É moi sinxelo e apto para toda persoas que queira vir”, conclúe. En Malpica, na comarca de Bergantiños, a asociación cultural Malante organiza unha carreira por San Silvestre desde hai seis anos. Un membro da organización, Walter Pardo, relata a Nós Diario que a San Silvestre Malpicá transcorre polo camiño da Santo Adrián, de seis quilómetros polo monte: “Foi un amigo vasco quen propuxo a idea e animouse moita xente, é un percorrido moi habitual no municipio”. Comezaron con catrocentas inscricións e cada ano hai máis. “A única condición é que a xente veña disfrazada”, apunta. Outros concellos, como o de Soutomaior, apúntanse este ano ás carreiras, coa súa propia San Silvestre, de carácter eminentemente lúdico.