Vilagarcía vibra co cinema fantástico e de terror

A pasada sexta feira, o Curtas, Festival do Imaxinario de Vilagarcía de Arousa, tirou dun clásico musicado polo sexteto Casperverk para inaugurar a súa 51ª edición. A pantasma da ópera, dirixida por Rupert Julian en 1925, foi a película escollida para dar comezo ao que é o decano dos festivais galegos de cinema. Desde esa data e até o vindeiro domingo 5 de novembro, 23 longametraxes e 95 curtas, procedentes de 31 países de Europa, América, Asia e Oceanía, compiten nas tres seccións oficiais do certame que é a referencia ineludíbel cando se fala de cine fantástico na Galiza. Entre os convidados desta edición figuran os nomes de Neil Marshall, responsábel de títulos como Dog Soldiers e dos episodios máis valorados de Xogo de Tronos; Lamberto Bava, director de películas de culto como Demons ou o compositor italiano Fabio Frizzi, con máis de setenta bandas sonoras para películas e series de distintos xéneros. Os tres recollerán o premio Mestre do Fantastic o vindeiro sábado, mentres que Catriona Maccol será recoñecida como Icona do Fantastic, pola súa participación en títulos como Medo na cidade dos mortos vivos ou O máis aló. "É curioso que se xunten aquí tres primeiras figuras que, ademais, traballaron xuntos moitas veces", explica Luís Miguel Rosales, director do festival, en conversa con Nós Diario. "Son grandes creadores do xénero fantástico que consideramos un privilexio poder ter ao mesmo tempo en Vilagarcía". Estes e outros nomes como o de Federico Zampaglione -músico e director de The Well, que se proxecta hoxe despois de pasar por festivais como o de Trieste e o de Sitges- ou o debuxante de Marvel Leandro Fernández súmanse a unha longa lista de personalidades que pasaron polo festival arousán e que inclúe nomes tan ilustres como, por exemplo, o do creador dos Gremlins, Joe Dante. Outes mostra a cultura marítima desde o cinema Repensar o modelo de financiamento do festival Porén, ser o festival de cinema máis antigo da Galiza semella non ser suficiente para lograr un financiamento digno que permita a profesionalización da súa organización. O Festival do Imaxinario é o froito do traballo dunha asociación cultural sen ánimo de lucro que, ademais, ofrece completamente de balde as súas actividades. E son estes dous elementos os que, paradoxalmente, non lle permiten presentarse ás axudas por concorrencia competitiva que convoca a Axencia Galega de Industrias Culturais (Agadic), da Xunta de Galiza, para apoiar os festivais de cinema. "Entendo que o obxectivo destas axudas é crear un tecido industrial que permita o desenvolvemento do cinema galego", aclara Rosales. "Mais quizais habería que pensar como se levan a cabo estes proxectos, non se pode penalizar un evento eminentemente dirixido ao público. O feito de que un festival que leva cincuenta anos ofrecendo cinema internacional a un concello como o de Vilagarcía non ten valor ningún? As actividades do Curtas exercen unha función pública, a de dar acceso á cultura, que é un dereito da cidadanía. Creo que isto tamén debería terse en conta á hora de deseñar unha política cultural. En calquera outra parte, un festival con esa historia sería mimado e valorizado". Curtas naceu hai 51 anos no seo do Liceo Casino e, desde 2015, a actual equipa de organización fíxose cargo do certame precisamente para que non desaparecese unha das citas que xa forman parte da identidade da cidade. "Foi daquela cando decidimos adscribir o festival ao cine fantástico, xa que non existía na Galiza ningún outro que se dedicase a este xénero: adxudicabámonos un nicho propio e, ao tempo, non lle faciamos a competencia a ningún dos festivais que xa existían". Desde a organización mostran o seu agradecemento ao Concello de Vilagarcía -"sen o apoio do Concello, o festival xa tería desaparecido" afirma Rosales-, que é o que achega a maior parte dun orzamento de 73.000 euros, apenas a cuarta parte das cantidades que manexan outros festivais de referencia como Cineuropa (Compostela) ou o Festival de Cans (O Porriño). "A cuestión é que un festival deste nivel non pode depender dun equipo de entre doce e quince voluntarios: se segue así non se poderá manter no tempo", sinala o director de Curtas. "Por iso cremos que o Concello debería asumilo como propio e, a partir de aí, sacar a xestión a concurso e decidir entre as mellores ofertas que se presenten. Non queremos que o festival desapareza". "Ninguén está a salvo": a guerra en Palestina, no foco do Festival de Cine Euroárabe Amal Apoio ao cinema galego Coa nova equipa de dirección tamén se fortalecía o apoio do festival ao cinema galego que, ademais, atopaba no fantástico un novo camiño polo que transitar. "Os avances no cinema galego en pouco máis dunha década son case incríbeis", reflexiona o director do Festival do Imaxinario. "Non hai tanto tempo en que se celebraba case como un fito histórico que O apóstolo [o filme de 2012 dirixido por Fernando Cortizo] estivese na sección oficial do Festival de Sitges. Era un momento en que a presenza da nosa cinematografía era moi limitada, e agora o raro é que non haxa algunha película galega no palmarés dalgún festival de primeiro nivel. Sen ir máis lonxe, a película Jacinto (ronda o demo), de Javi Camino, que presentamos no festival, gañou o Premio do Público en Sitges". Esa evolución pode verse na selección dos dezasete filmes que conforman a sección Feito en Galicia, que inclúe algunhas películas xa vistas noutros festivais -como Miña nena, de Noelia Míguez, Na pel da memoria, de Coral e Laura Piñeiro, A rabia, de Alberto Díaz, ou O neno sardiña, de Lucía Estévez- a carón de numerosas estreas absolutas como Co demo no corpo, de Antonio Caeiro, Frenia de Óscar Doviso, ou In Half, de Jorge Morais Valle. Jaione Camborda, a sororidade que fai fronte ao control Actividades para todos os públicos A gala final do Festival do Imaxinario 2023, na que se darán a coñecer os gañadores e se entregarán os galardóns honoríficos, terá lugar o sábado 4 de novembro, co concerto de Broken Peach. Á ambiciosa programación súmanse outras tradicionais, como a Feira de Artesanía -a última fin de semana-, encontros con invitados e obradoiros, unha mostra sobre o Coche Fantástico e os Cazafantasmas, así como a exposición sobre a serie de Indiana Jones. Unha cea temática sobre o filme O exorcista e un programa especial do Samaín completan o programa.