Terbutalina despediuse dos escenarios nun Emigrason que vibrou coa música galega
De Ninghures, Fillas de Cassandra e Tanxugueiras completaron o cartel dun festival que ateigou a sala La Madeleine de Bruxelas.
A banda galega Terbutalina puxo este sábado fin a 15 anos de traxectoria, nunha pausa que cualificaron como “indefinida”.
Fixérono a milleiros de quilómetros do seu Muros natal, nunha ateigada sala La Madeleine en Bruxelas, cidade belga que esta fin de semana celebrou a música, a lingua e a cultura galega coa terceira edición do Festival Emigrason.
O último vals de @Terbutalina no @EmigraSon_ Historia da música galega e km 0 de moitas cousas pic.twitter.com/d8ly2GPZLf
— Javier Becerra (@retroaliment) February 23, 2025
Desde 2010, Terbutalina subiu de forma ininterrompida aos escenarios, deixando tras de si a pegada de ducias de cancións, concertos enérxicos e momentos inesquecíbeis. Agora, "coas baterías pedindo un respiro", os membros da banda avogan por facer un alto na súa andaina musical.
O concerto deste sábado, para o que tiveron que colgar o cartel de sold out prometía ser un evento “inesquecíbel” para os integrantes de Terbutalina, unha das bandas máis enerxéticas da escena galega.
chuzos de punta dos De Ninghures
— Álex Gesto (@GestoFoot) February 22, 2025
facendo e celebrando terra lonxe da terra@EmigraSon_ 🩵 pic.twitter.com/pZ8W4poCuP
E así foi. Os de Muros fecharon mais unha edición do Emigrason, un festival impulsado pola diáspora galega que naceu para crear un lugar de encontro para a mocidade galega no estranxeiro. Así, mozas e mozas que se viron obrigadas a marchar do país déronse cita un ano máis en Bruxelas para desfrutar en comunidade da música galega.
Xunta a Terbutalina, compartiron cartel De Ninghures, Fillas de Cassandra e Tanxugueiras que, para engadir aínda máis emoción á xornada, interpretaron xuntas a canción “Muiñeira da Costa”, a súa particular homenaxe á despedida dos de Muros.
