"Na diáspora tamén queremos galego!": A reivindicación da "lingua vital" chega a Bruxelas
Galegas e galegos concentráronse en Bruxelas convocadas por Queremos Galego para “frear”, tamén desde a diáspora, a “emerxencia lingüística.
Unha manifestación nacional percorrerá este domingo as rúas de Compostela, convocada por Queremos Galego e reclamando “Lingua vital xa!”. A marcha busca "parar a emerxencia lingüística" e exixir á Xunta da Galiza un "cambio de actitude" e a "activación de todos os recursos" para que a "tendencia da lingua cambie".
No marco desta convocatoria e coincidindo coa celebración do Festival Emigrason, perto de medio cento de galegas e galegos déronse cita este sábado en Bruxelas para exixir galego “tamén na diáspora”.
— Nós Diario (@NosDiario) February 22, 2025
Así, portando unha faixa na que se podía ler “Lingua vital xa! Na diáspora tamén queremos galego”, emigrantes galegas e galegos clamaron pola lingua galega nunha concentración na que tamén estivo presente a eurodeputada do BNG, Ana Miranda, e na que non faltou tempo para a música e o baile.
No Parlamento Europeo
— BNG_ParlamentoEuropeo (@BNG_ParlEuropa) February 22, 2025
Ademais, precisamente cando hai poucos días o ex vicepresidente da Xunta da Galiza Francisco Conde e a ex presidenta do Parlamento galego Pilar Rojo, os dous do PP, votaran para que o galego non sexa oficial na Unión Europea, as manifestantes tamén corearon “No Parlamento Europeo, queremos galego”.
Logo de que esta votación decorrese no Congreso español, o presidente da Xunta, Alfonso Rueda, limitou a oficialidade do galego na Unión Europea a "temas de status", unhas declaracións polas que foi reprendido pola Rede europea para a igualdade das linguas (ELEN, polas súas siglas en inglés).
