Os residuos urbanos convértense en material artístico nesta exposición en Pontevedra

Creada con residuos urbanos polo alumno de doutoramento da Facultade de Belas Artes da Universidde de Vigo Álex Fuertes e o artista e profesor desta facultade Ignacio Pérez-Jofre, Monstruo 16 é unha instalación de grandes dimensións que nestas semanas pode contemplarse no local da asociación Kentada, en Pontevedra.

Xunto a unha peza construída con diferentes materiais atopados nas proximidades deste espazo, a exposición complétase cunha proxección que permite coñecer os 15 “monstros” que precederon a esta peza, unha serie de creacións efémeras que Fuertes e Pérez-Jofre desenvolven en espazos abandonados con materiais de refugallo da súa contorna.

Pensamento ecolóxico na pintura

Como explica Fuertes, a liña de investigación que desenvolve para a súa tese, dirixida por Pérez-Jofre, céntrase en estudar "de maneira práctica e teórica a utilización dos residuos sólidos urbanos na pintura actual e o que isto implica", o que leva á súa vez a abordar "o pensamento ecolóxico na pintura", na idade das "cidades contemporáneas entendidas como vertedoiros" ou nas "calidades plásticas dos residuos".

Estas dimensións vense á súa vez condensadas en Monstruo, un proxecto conformado principalmente por "intervencións efémeras en espazos fóra do tecido produtivo da cidade", nas que levan a cabo instalacións precarias, como explica Fuertes, só quedan rexistradas a través de fotografías.

Ao mesmo tempo, estas vense complementadas á súa vez por exposicións para as que se constrúe unha peza inédita “cos residuos atopados nas inmediacións do espazo expositivo. Ese foi o caso de Monstruo 13, exhibido en decembro en Estudio Abierto de Vigo, e neste Monstruo 16, que pode visitarse até o 19 de abril.