A Real Academia Galega (RAG) realiza ao longo deste sábado no Museo de Pontevedra a VII Xornada de Onomástica Galega, dedicada á relación entre os nomes propios e a literatura.
Organizado pola institución académica, inaugurouse ás 10 horas, no salón de actos do edificio Castelao cun acto no que participaron o presidente da RAG, Víctor F. Freixanes; a coordinadora do programa, a académica Luz Méndez; a deputada de Lingua, María Ortega; e o director do Museo de Pontevedra, Xosé Manuel Rey.
O programa está aberto ao público e inclúe unha mesa redonda (17 horas) na que Berta Dávila, Marcos Calveiro e Fina Casalderrey conversarán con Marilar Aleixandre sobre a escolla dos nomes dos protagonistas das súas novelas.
Xosé María Álvarez Cáccamo e Magdalena Gamallo poranlle o ramo á xornada cun acto poético e musical titulado “Cántico dos topónimos esdrúxulos” (18:30 horas).
As intervencións poderán seguirse tamén en directo desde a páxina web da RAG e desde a súa canle de Youtube oficial.
Ana Romero Masiá, nova correspondente
A historiadora Ana Romero Masiá foi nomeada membro correspondente da RAG. A nova académica, sinala esta institución, é un referente no estudo da historia da cidade da Coruña e dos seus movementos liberais e republicanos, e conta tamén con destacados traballos sobre os castros e a cultura castrexa e sobre educadoras como María Barbeito e Mercedes Tella.
A proposta sometida a votación destaca de Romero Masiá que é "exemplo, en toda a súa actividade, de compromiso coa lingua e a cultura galegas e coa súa promoción", en particular no referente á historia da Galiza.
A súa tese de doutoramento, dedicada á figura do líder sindical do tabaco Severino Chacón, foi dirixida por Xosé Ramón Barreiro Fernández (1936-2021), presidente da Academia e catedrático de Historia Contemporánea da Galiza
