O día 2 de febreiro conmemórase o centenario do pasamento de Manuel Murguía e Sermos Galiza quere sumarse á súa lembranza cun número no que dúas reportaxes e unha entrevista estarán dedicadas á memoria de quen foi alcumado como o último precursor. Murguía foi máis que un precursor, foi, talvez, a pedra angular sobre a que se construíu o nacionalismo moderno.
Así o lembra Xoán Costa, presidente do Consello de Administración de Sermos Galiza S.A., no seu artigo 'As candeas de Murguía', no que debulla como a lingua, as institucións que fundou ou axudou a crear, e os símbolos que potenciou foron os piares nos que se apoiou un traballo de construción nacional que marcou o horizonte vital de todo o seu traballo.
Un traballo que Henrique Rabuñal vén de resumir e analizar no seu volume Murguía. Un século despois. Na entrevista que lle fai Montse González, Rabuñal reforza esa idea dun home volcado no seu labor de rescatar a historia propia do país e de pór todos os seus esforzos ao servizo da nación galega na que cría sen vacilacións; e, como parte desa tarefa, a defensa da imaxe e da obra de Rosalía de Castro.
Patricia Carballal Miñán deita luz sobre a figura de Alejandra Murguía, a maior das fillas do matrimonio de Murguía e Rosalía, que serve como testemuña inmellorábel do ambiente intelectual que reinaba na casa da parella.
Con este número, que ademais manterá o resto das seccións de todas as semanas, Sermos Galiza rende homenaxe e quere contribuír a un mellor coñecemento dunha figura fundamental da Historia da Galiza que, porén, aínda non ten todo o recoñecemento que merece a súa obra.
Este número especial do semanario cultural Sermos Galiza dedicado a Manuel Murguía estará á venda nos quiosques do país esta fin de semana. Como é habitual, por un prezo de 3,20 euros canda o xornal Nós Diario.
