Ao longo do ano, realizáronse máis de 50 xornadas de actividade cultural, con ciclos consolidados como o Lubicán, que este ano trouxo a Lugo a Grande Amore ou a Fillas de Cassandra, ou Músicas a carón da Mosqueira, que impulsa a novas creadoras e creadores de musica clásica, e tamén se seguiron ampliando os espazos para a creación, a formación e a experimentación en diferentes eidos artísticos con festivais, encontros e certames, que converteron a cidade en escenario e fonte de inspiración para a creación artística.
O Maratón Fotográfico do Campus, con 29 edicións, as mesmas que o Lugo Cultural, é un dos certames que canalizan as inquedanzas artísticas da comunidade universitaria. Este ano, as persoas participantes foron convocadas para realizaren, nunha mañá, fotografías sobre a idea de caos, o tema proposta pola organización, e outras de asunto libre. O certame recibiu este ano 72 traballos, 72 miradas sobre distintos recunchos da cidade.
José Luis Bermúdez Salinas -Premio Carlos Valcárcel- , Esther López Álvarez –Premio Eduardo Ochoa– e Rocío Losada Iglesias –Premio á mellor fotografía de tema libre– fixéronse coas distincións do certame, coordinado por Eduardo Ochoa. As súas imaxes forman parte dunha escolma de vinte que pode verse ata o 19 de xaneiro na Biblioteca Intercentros e que, a partir do 22 de xaneiro, estará na Biblioteca Provincial de Lugo.
O certame, que cada vez conta con máis relevancia e interese mesmo fóra do ámbito universitario, tamén frutifica na edición dun calendario para o que se seleccionan 12 fotografías para ilustrar cada un dos meses do ano.
Outra das convocatorias con maior participación é o Findecurta, que impulsa a creatividade audiovisual en galego da mocidade. O multiverso centrou a temática das nove propostas creativas presentadas a concurso na oitava edición do certame, gravadas en catro días, como establecen nas bases do certame, coordinado por Bruno Ma.
O primeiro premio foi para Portas, unha curta que narra as peripecias pola cidade dunha rapaza que, de noite, sae da súa habitación cara á cociña na procura duns froitos secos. O galardón recoñeceu o talento e esforzo das súas autoras, un cuarteto feminino de mozas preuniversitarias integrado por Elba Penas, Alba Area López, Uxía Calviño e Ayla Álvarez, que captaron cos seu móbiles imaxes dunha cidade de Lugo totalmente baleira de xente.
O premio do público recibiuno a curta Dodo, de IAA, cinco estudantes universitarios e de ensino secundario que crearon o seu particular multiverso arredor dunha autocaravana e dos seus exteriores.
A convocatoria do Findecurta acompáñase de actividades complementarias, orientadas á formación na linguaxe audiovisual, nas que este ano participou Pepe Coira, que impartiu unha conferencia sobre guión.
Novas linguaxes e formatos
O Lugo Cultural aposta tamén pola creatividade en formatos e linguaxes máis eclécticas e novidosas con certames que están a ter unha boa acollida na comunidade universitaria, e que contan coa colaboración das artistas Mónica Alonso e Montse Rego para agasallar ás persoas premiadas con obras artísticas.
É o caso do Certame de Videocreación, que este ano chegou á quinta edición, ao que se presentaron 11 traballos, obras nas que conflúen a literatura e o audiovisual. Mario Pereira Goiriz con Quinta estación -Premio a mellor linguaxe visual-, Ana Valentina López e Cristiam Leiva con Carta de amor –Premio Araceli Herrero- e Diego Sanmartín e Luz Salgado con Todo flúe -Premio Isidro Novo- levaron as distincións do certame.
A proposta máis nova do Lugo Cultural é o Certame de Paisaxe Sonora, que convida a crear e recrear espazos ou transmitir sentimentos e ideas a partir do son e da escoita. A convocatoria, coordinada por Arturo Vaquero , recibiu 16 propostas e distinguiu as obras Sensacións do Morrazo, de Carlos Suárez, e El Peregrino, de Luz María Salgueiro e
Diego Sanmartín.